މާލެ ސަރަހައްދުގައި ހަލުވި ކަމާއެކު ފެތުރެމުންދާ ހޮޑާއި ބޭރަށް ހިންގުމުގެ ބައްޔަކީ ވަކި ކާނާއެއްގެ ސަބަބުން ފެތުރޭ ބައްޔެއް ނޫންކަން އެޗްޕީއޭއިން މިއަދު ޔަގީންކޮށްދީފި އެވެ.

ރެއިން ފެށިގެން، މާލޭގައި ކުއްލި އަކަށް ހޮޑާއި ބޭރަށް ހިންގުން އިތުރު ވެފައިވާއިރު، ހޮސްޕިޓަލްތައް ތޮއްޖެހި، ޚިދުމަތްދޭ ފަރާތްތަކަށް ޚިދުމަތް ދިނުމުގައި ގޮންޖެހުންތަކާއި އަންނަނީ ކުރިމަތިވަމުންނެވެ.

ބޭރަށް ހިންގުމަކީ އާއްމުކޮށް ޗުއްޓީއާއި ދިމާކޮށް އިތުރުވާ ބައްޔަކަށް ވީ ނަމަވެސް ކުއްލިއަކަށް މި ބަލި ފެތުރެން ފަށާފައި މިވަނީ މިނިވަން ދުވަހުގެ ހަރަކާތްތަކުގެ ތެރެއިން ބެހި މެޓާއެއްގެ ސަބަބުން ކަމަށް ބައެއް ނޫސްތަކާއި ސޯޝަލް މީޑިޔާގައި ދަނީ ހަބަރު ފަތުރަމުންނެވެ.

އެކަމާއި ގުޅިގެން އެޗްޕީއޭއިން މިއަދު ކުރި ޓުވީޓެއްގައި ބުނީ, ހޮޑުލުމާއި ބޭރަށް ހިންގުމުގެ ރޯގާ، މާލެ ސަރަހައްދުގައި އުޅޭތާ ގާތްގަނޑަކަށް ދެ ހަފްތާ ވެފައިވާ ކަމަށެވެ. އަދި އާއްމުކޮށް ކޮންމެ އަހަރަކުވެސް ސުކޫލް ބަންދު ތެރޭގައި އެ ބަލި ފެތުރޭ ކަމަށް އެ އިދާރާއިން ބުނެފައިވެއެވެ. 

އެހެންނަމަވެސް، ރެއިން ފެށިގެން މާލެ ސަރަހައްދުގައި އެ ބައްޔަށް ފަރުވާ ހޯދާ ކުދިންނާއި މީހުން ކުއްލި އަކަށް ބޮޑު ތަނުން އިތުރު ވެފައިވާ ކަން ފާހަގަ ކޮށް އެޗްޕީއޭ އިން ބުނީ، ފެތުރެމުންދާ ހޮޑުލުމާއި ބޭރަށްހިންގުމުގެ ބައްޔަކީ ވައިރަހެއެއްގެ ސަބަބުން ފެތުރެމުންދާ ބައްޔެއްކަން އެ އެޖެންސީން ހޯދި ހޯދުމުން އެނގިފައިވާ ކަމަށެވެ. އަދި އެއީ ވަކި ކާނާއެއްގެ ސަބަބުން ފެތުރޭ ބައްޔެއް ނޫންކަމަށް ވެސް ބުނެފައިވެއެވެ. 

"ތަހުގީގުތަކުގެ ވަގުތީ ނަތީޖާ ފެންނަ ގޮތުގައި ކުއްލިއަކަށް މި ފެތުރިގެން އުޅޭ ބައްޔަކީ ވައިރަހެއްގެ ސަބަބުން ފެތުރޭ ބައްޔެއް. އެއީ ވަކި ބާވަތެއްގެ ކާނާއަކުން ފެތުރެމުންދާ ބައްޔެއް ކަމަށް ނުބެލެވޭ. ބަލި ފެތުރޭ އަސްލު ސަބަބު ހޯދުމަށް މަސައްކަތް ކުރެވެމުންދާއިރު, އެންމެންވެސް ރައްކާތެރި ކަމުގެ ފިޔަވަޅު އެޅުމަށް އިލްތިމާސް ކުރަން" އެޗްޕީއޭއިން ބުނެފައިވެ އެވެ.

ކުއްލިއަކަށް ގިނަ ބަޔަކަށް ބަލި ޖެހުނު ސީދާ ސަބަބު ދެނެގަތުމަށް އަދިވެސް މަސައްކަތް ކުރަމުންދާ ކަމަށް އެޗްޕީއޭއިން ބުނެ އެވެ.