ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ފުވައްމުލަކު ސިޓީއަށް ކުރެއްވުމަށް ހަމަޖެހިފައިވާ ކެމްޕޭނު ދަތުރުފުޅު ފަސްކުރައްވައިފި އެވެ. 

ރައީސް ޞާލިހު ފުވައްމުލަކަށް މިއަދު ވަޑައިގަތުމަށް ނިންމާފައި ވީ ނަމަވެސް އެ ދަތުރުފުޅު މާދަމާއަށް ފަސްކުރެވިފައިވާކަމަށް ރައީސް އޮފީހުން ވަނީ ބުނެފައެވެ. އެހެން ނަމަވެސް އެ ދަތުރުފުޅު ފަސްކުރެއްވި ވަކި ސަބަބެއް ރައީސް އޮފީހުން ހާމަކޮށްފައެއް ނުވެއެވެ. 

އެހެން ނަމަވެސް ރައީސްގެ ދަތުރުފުޅު ފަސްކުރައްވާފައިވަނީ މާލޭގައި ހޮޑުލުމާއި ބޭރަށް ހިންގުމުގެ ރޯގާއެއް ފެތުރިގެން ގޮސްފައިވާ ދަނޑިވަޅެއްގަ އެވެ. އަދި ދެކުނުގެ އަތޮޅުތަކަށް މޫސުން ގޯސްވުމުގެ ސަބަބުން ވަނީ ހުދު ސަމާލު ވެސް ނެރެފަ އެވެ. 

Advertisement

ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ރިޔާސީ ކެންޑިޑޭޓަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހެވެ. 

އެމަނިކުފާނު ގެންދަވަނީ އަތޮޅުތެރޭގައި ކެމްޕޭނު ހަރަކާތްތައް ވަރަށް ފޯރީގައި ކުރިއަށް ގެންދަވަމުން ނެވެ. 

އެގޮތުން ށ އަތޮޅާއި، ހއ އަތޮޅާއި މާލެ އަތޮޅުގެ ބައެއް ރަށްތަކަށް ވެސް ރައީސް ޞާލިހު ވަނީ ކެމްޕޭނު ދަތުރުފުޅުތައް ކުރައްވާފަ އެވެ. 

އެ ރަށްތަކަށް ވަޑައިގެން އެމަނިކުފާނު ވަނީ އެމަނިކުފާނަށް ދެވަނަ ދައުރެއް ލިބިވަޑައިގެންފި ނަމަ އެ ރަށްތަކަށް ކޮށްދެއްވާނެ ބައެއް ކަންކަން ފާހަގަކޮށް ވައުދުވެވަޑައިގެންފަ އެވެ.