ފުވައްމުލަކަކީ ރީތި ކަނބަލުން ގިނަ ރަށެއް ކަމަށާ، އެ ސިޓީއަށް ހުރިހާ ގޮތަކުން ވެސް އަޅާލާނެ ކަމަށް އެމްޑީއޭގެ ރައީސް އަދި ވިޔަފާރިވެރިޔާ އަހުމަދު ސިޔާމް މުހައްމަދު (ސަން ސިޔާމް) ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ކެމްޕޭނަށް ރޭ ޏ. ފުވައްމުލަކުގައި ބޭއްވި ޖަލްސާގައި ވާހަކަ ދައްކަވަމުން ސިޔާމް ވިދާޅުވީ ކޮވިޑްގެ ވަބާ ދުނިޔެއަށް ކުރިމަތިވެ، ރާއްޖެއަށްވެސް އޭގެ އަސަރު ކުރަން ފެށުމުން، ފަތުރުވެރިކަމުގެ ދާއިރާގައި އިސްކޮށް ހަރަކާތްތެރިވަމުންދިޔަ ފަރާތްތަކުން ބުނަމުން ދިޔައީ "ތިމަންނަ މެންގެ ދުވަސް މި ދިޔައީ" ކަމަށެވެ.
އެކަމަކު އެވަގުތު ރައްޖޭގެ ރައީސުލްޖުމްހޫރިއްޔާ ކަމުގައި ހުންނެވީ، ހިކުމަތްތެރި، ވިސްނުން ތޫނު، އަދި އެހާމެ ރައްޔިތުންނަށް އޯގާތެރި ވެރިއެއް. އެދުވަހު، އެމަނިކުފާނު، އަޅުގަނޑުމެން ގެންދަވާފައި ވިދާޅުވީ، ތިމަންނަ އިރާދަކުރެއްވިޔާ ތި ވިޔަފާރިތައް ހަލާކުވެ، މީހުން ބަނޑަށް ޖެހި، މީހުންނަށް ނޫޅެވޭވަރު ވެގެން ދިޔަ ނުދޭނަމޭ. އިރާދަކުރެއްވިޔާ ތިމަންނަ ލާރި ކުރިވަރަކުން ހޯދައިގެން ތި ވިޔަފާރި ތަކާއި، އަދި ކަލޭމެންގެ މުވައްޒަފުންނާ، އަދި ކަލޭމެންގެ ކައިރީގައި ތިބޭ، ބޭރުގެ މުވައްޒަފުންނާ އެންމެނަށް މުސާރަދޭ ވަރު ތިމަންނަ ކޮށްދޭނަމޭ. ޝުކުރިއްޔާ ރައީސް.
އަހުމަދު ސިޔާމް ( ސަން ސިޔާމް)
މިއާއެކު ސިޔާމް ވިދާޅުވީ ފަތުރުވެރިކަމުގެ ދާއިރާ އަކީ ދިވެހިންގެ ލޭނާރު ކަމަށެވެ. އެއީ ދެކޮޅު ހެދޭނެ ކަމެއް ނޫން ކަމަށާ، މަސްވެރިންވެސް މަހަށް ފޮނުވަނީ އެ ދާއިރާއިން ލިބޭ ފައިސާއިން ކަމަށް ސިޔާމް ވިދާޅުވި އެވެ. އަދި ފަތުރުވެރިކަމާއި މަސްވެރިކަންވެސް މިއަދާއި ހަމައަށް ދެމިއޮތީ ކޮވިޑުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ދެއްކެވި ހިތްވަރުން ކަމަށް އޭނާ ވިދާޅުވި އެވެ.
"އެހެން ނޫން ނަމަ، މިއަދު ފަތުރުވެރިކަމެއް ނޯންނާނެ" ސިޔާމް ވިދާޅުވި އެވެ.
ސިޔާމް އިތުރަށް ވިދާޅުވީ، ފުވައްމުލަކަކީ "ޑެސްޓިނޭޝަން" އަކަށް ހަދައި ދެއްވުނަށް އެ ރަށުގެ ރައްޔިތުން އެދެމުން އަންނަ ކަމަށާ، އެކަން އެ ސިޓީއަށް ކޮށްދެއްވާނެ ކަމުގެ ޔަގީންކަންވެސް ރައީސް ޞާލިހު ދެއްވާފައިވާ ކަމަށެވެ.
އެގޮތުން ބޮޑެތި ފުލައިޓްތައް އެ ރަށުގެ އެއާޕޯޓަށް ޖައްސާނެ ކަމަށާ، ކުރިއަށް އޮތް ތަނުގައި، ފުވައްމުލަކަކީ ރާއްޖޭގައި އޮންނަ އިތުރު ޑެސްޓިނޭޝަން އެއްގެ ގޮތުގައި ހައްދަވައިދެއްވާނެ ކަމަށް ސިޔާމް ވިދާޅުވި އެވެ.
އޭގެ ސަބަބުން ފުވައްމުލަކު ވެގެން ދާނީ ވިދާލާ ގައުމަކަށް. ވިދާލާ ރަށަކަށް. މިގައުމުގައި އޮތް ވިދާލާ ރަށަކަށް. އިރާދަކުރެއްވިޔާ ފުވައްމުލަކު ޒުވާނުން ތިބޭނުންވާ ފުވައްމުލަކު އަޅުގަނޑުމެން ހޯދައި ދޭނަން.
މީދޫ ދާއިރާގެ މެންބަރު އަހުމަދު ސިޔާމް
މިއާއެކު ސިޔާމް ވިދާޅުވީ ފުވައްމުލަކަކީ މަސައްކަތްތެރި, ހީވާގި، އަދި އަޚުލާގު ރަނގަޅު ޒުވާނުން އުޅޭ ރަށެއް ކަމަށެވެ. އަދި އެރަށަކީ އަންހެން ކަނބަލުން ރީތި ރަށެއް ކަމަށްވެސް އޭނާ ވިދާޅުވި އެވެ.
މަސައްކަތްތެރި، ހީވާގި، އެހާމެ ކެތްތެރި، އެހާމެ އަހުލާގު ރަނގަޅު ބައެއް. އަދި އެހާމެ އަންހެން ބޭކަލުން ރީތި ރަށެއް އިނގޭތޯ ފުވައްމުލަކު މިއީ. އެހެންވީމާ އަޅުގަނޑުމެން އިރާދަކުރެއްވިޔާ މިރަށަށް އަބަދުވެސް އޯގާތެރި ވާނަން. އަޅާލުންވެސް އޮންނާނެ. ހަމަ ހުރިހާ ރަނގަޅަކަށް. މިއީ އެހެން ރަށްރަށަށް ބުނާ ހުތުރު ބަހެއް ނޫން. ދެރަ ބަހެއް ނޫން. އެކަމަކު ފުވައްމުލަކަކީ ހަމަ ރީތި ކަނބަލުން، ހަމަ ގިނަ ރަށެއް.
މީދޫ ދާއިރާގެ މެންބަރު އަހުމަދު ސިޔާމް
ސިޔާމް ވަނީ، މުޅި ފުވައްމުލަކު އެކީގައި އައިސް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމަށް އެއްބުރުން އިންތިޚާބު ކުރުމަށް އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
