ކޮވިޑް19 ގެ ވަބާ ރާއްޖެއަށް ކުރިމަތިވެ، ރާއްޖޭގެ އިގްތިސާދަށް އައި ހީނަރުކަމާއެކު ރާއްޖޭގެ ވެރިކަމުގައި ހުންނެވި ރައީސް އިބްރާހީމް މުހައްމަދު ސޯލިހު ވެސް "ފިތިގެން" ދިޔަ ކަމަށާއި އެކަމަކު އެވަގުތު އެމަނިކުފާނުގެ ގައިކޮޅުން އައީ ފޮނި މީރު މާމުއި ކަމަށް އެމްޑީއޭގެ ލީޑަރު، އަދި ވިޔަފާރިވެރިޔާ އަހްމަދު ސިޔާމް މުހައްމަދު (ސަން ސިޔާމް) ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ކެމްޕޭނަށް ރޭ ޏ. ފުވައްމުލަކުގައި ބޭއްވި ޖަލްސާގައި ވާހަކަ ދައްކަވަމުން ސިޔާމް ވިދާޅުވީ ފޮނި އެއްޗެއް ފިތާލުމުން، އެއިން ނުކުންނާނީ ފޮނި ކަމަށެވެ. އަދި އެއީ އެއްވެސް ޝައްކެއްނެތް ކަމެއް ކަމަށް ވެސް އޭނާ ވިދާޅުވި އެވެ.
"އެހެންވީމާ އަޅުގަނޑުމެން (ކޮވިޑް ތެރޭގައި) ފިތިގެން ދިޔަ ވަގުތު ރާއްޖޭގެ ރައީސުލްޖުމްހޫރިއްޔާ ފިތިގެން ދިޔައީ. ފިތިގެން ދިޔަ ވަގުތު އެމަނިކުފާނުގެ ގައިން އައީ ކޯއްޗެއްތޯ؟ މާމުއި!. މީހުންނަށް ދެއްކޭނެ. އަދި އުފާވާނެ. ކަރަށް ރަހަލާނެ. ރީތި މާމުއި. އަޅުގަނޑު ދޮގު ހަދައިގެން ވާހަކަ ދައްކާކަށް ނުޖެހޭނެ. މިއީ ހަގީގީ ވާހަކަ. ހުރިހާ ބޭފުޅުންނަށްވެސް އެނގޭނެ.
އަހުމަދު ސިޔާމް
ސިޔާމް ވިދާޅުވީ ރައީސް ސޯލިހާ އެކު މަޖިލީހުގައި 20 އަހަރު ހޭދަ ކުރެވިފައިވާ ކަމަށެވެ. އަދި އޭރުވެސް އެކި ބޭފުޅުން އެމަނިކުފާނާއި ދިމާއަށް "ފުއްމައިގެން އަރާ" ކަމަށާ އެހެން ނަމަވެސް އެމަނިކުފާނު ހަޑިހުތުބަހުން މުއާމަލާތް ނުކުރައްވާ ކަމަށެވެ. ސިޔާމް ވިދާޅުވީ ރައީސް ޞާލިހަކީ ބަސް މަދު އަހުލާގު ރަނގަޅު ބޭފުޅެއް ކަމަށެވެ.
"އޭރުވެސް ޕާލަމެންޓުގައި ފުންމަފުންމައިގެން އެމަނިކުފާނު އަރިހަށް ދާނެ. ރުޅިވެސް އަންނާނެ. ހަޑި އެއްޗެހި ވެސް ކިޔާ. އެމަނިކުފާނު ދުވަހަކު ވެސް މީހަކާ ދިމާލަށް ހަޑިއެއްޗެއް ނުބުނޭ. ރުޅިއެއް ވެސް ނާދޭ، އަޅުގަނޑު ބުނަން މަނިކުފާނު ރުޅި ނާންނަނީ ހޭ؟ ކީއްކުރަންހޭ ތިމަންނަ ރުޅި އަންނަން ވީ. ތިމަންނާ އެއްކޮށް ހުރެ އެއްކޮށް ހަލާކު ވާންވީކީ."
އަހުމަދު ސިޔާމް
ސިޔާމް ވިދާޅުވީ ރައީސް ސޯލިހު ވަނީ ދިވެހިންނަށް ކުރިމަތިވި އެތައް ދަތި ހުރަސްތަކެއް ނައްތާލަ ދެއްވާފައި ކަމަށެވެ. އެމްޑީއޭ އިން ކުރިޔަށް އޮތް ރިޔާސީ އިންތިހާބުގައި ރައީސް ސޯލިހާއެކު ކުރިއަށް ދިއުމަށް ނިންމީ އެފަދަ އެތައް ސަބަބުތަކަކާ ގުޅިގެން ކަމަށް ސިޔާމް ފާހަގަކުރެއްވިއެވެ.
"ދެން އަޅުގަނޑުމެންވީ އެހެން ބޭފުޅަކު ޓެސްޓު ކުރަން. ޓެސްޓުކޮށް ޓެސްޓުން ފާސްވެފައި ހުރި ބޭފުޅަކާއެކު ކުރިޔަށް ދިއުން މާ ރަނގަޅެއް ނޫންތޯ، އިތުރަށް 50 ނޫނީ 40 ޕަސެންޓް ކިހިނެއްތޯ ވާނީ، މީނަ ރަނގަޅުވާނެތޯ، މީނަ ގޯސްވާނެތޯ ބަލާކަށް ނުޖެހޭ ނޫންތޯ؟ މިއަދު މި އޮތީ ރީތި މީރު މާމުއި އަޅުގަނޑުމެންނަށް ލިބިފައި."
އަހުމަދު ސިޔާމް
ސިޔާމް ވިދާޅުވީ ކުރިއަށް އޮތް ރިޔާސީ އިންތިހާބުގައި ވޯޓު ލާއިރު އެ ހުރިހާ ކަމަކަށް ވެސް ވިސްނަން ޖެހޭ ކަމަށެވެ.
Advertisement
This content is created and paid for by advertisers and does not involve Voice Journalists
