ރާއްޖެއަށް ބަދަލެއް ގެނެވޭނީ މުޅިރާއްޖެއަށް އިންޤިލާބީ ބަދަލެއް ގެނެވިގެން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ ރިޔާސީ އިންތިޚާބަށް ކެމްޕޭނު ކުރެއްވުމަށް ށ. އަތޮޅަށް އެމަނުކުފާނާއި އެމަނިކުފާނުގެ ޓީމުން ކުރައްވަމުން ގެންދަވާ ދަތުރުފުޅުގައި ށ. ނަރުދޫއަށް ވަޑައިގެން އެރަށުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ނަރުދޫއަކީ ކުޑަ އާބާދީއަކަށްވާތީ ކުރީގެ ސަރުކާރުތަކުން މާއެކަށީގެންވާ ގޮތެއްގައި އެރަށް ބަލައިގެންފައިނުވާ ކަމަށް ރައީސް ޞާލިޙްގެ ވާހަކަފުޅުގައި ވިދާޅުވިއެވެ. މިދައުރުގެ ކުރިން ދިޔަ ދައުރުގައި ނަރުދޫގައި ހިންގާފައިވަނީ އެންމެ ދެ މަޝްރޫޢު ކަމަށާއި އެކަހަލަ ކިތަންމެ ރަށެއް ފާހަގަވެފައިވާ ކަމަށް ރައީސް ޞާލިޙްގެ ވާހަކައިގައި ވިދާޅުވިއެވެ.

Advertisement

"ރާއްޖެއަށް ބަދަލެއް ގެނެވޭނީ މުޅި ރާއްޖެއަށް ބޮޑު އިންޤިލާބީ ބަދަލެއް ގެނެސްގެން، ވަކި ރަށެއްގަ ވަކި ބަޔަކަށް ކަމެއް ކޮށްގެނެއް މުޅި ރާއްޖެއަކަށް ބަދަލެއް ނާދޭ، މިއަދު ތިބޭފުޅުންނަށް، އަރާ ކޮންމެ ރަށަކުން ތިފެންނަނީ އެބަދަލު ގެންނަމުންދާ މަންޒަރު" ރައީސް ވިދާޅުވިއެވެ.

ކުރިއަށް މިއޮތް ތިން ހަތަރު އަހަރެއްގެ ތެރޭގައި މުޅި ރާއްޖެއިން މިބަދަލު ފެނިގެންދާނެ ކަމަށް ރައީސް ޞާލިޙް ވިދާޅުވިއެވެ.

ލަފާފުރުމުގެ ދަތިކަމަކީ ނަރުދޫފަދަ ކުދި ރަށްރަށުގައި އޮތް ވަރަށް ބޮޑު ދަތިކަމެއް ކަމަށާއި، އަދި ނަރުދޫއިން ފެންނަނީ އެކަމަށް ހައްލު ހޯދަމުންދާ ތަން ކަމަށްވެސް ރައީސް ވިދާޅުވިއެވެ.

ކުރިއަށް މިއޮތް ރިޔާސީ އިންތިޚާބުގެ ވޯޓަކީ މިފެށިފައިހުރި މަސައްކަތްތަކާއިގެން ކުރިއަށްދާނިތޯ ނުވަތަ އަނެއްކާވެސް އޭރު ދުށް 2014 އިން 2018ގެ ތާރީޚުގެ ތެރެއަށް އެނބުރި ދާނީތޯ ނިންމާ ނިންމުމެއް ކަމަށް ރައީސް ޞާލިޙް ވިދާޅުވިއެވެ.  

އަދިވެސް ވާދަވެރިންގެ ގޮތުގައި ނުކުނަންއޮތީ ޕީޕީއެމް ކަމަށާއި، ވިސްނުން ތެރިކަމާއި އެކު މިކަން ނުކޮށްފިނަމަ އަނެއްކާވެސް އެނބުރި ދާންޖެހޭނީ އެއަނިޔާވެރިކަމާއި އަނދިރިކަމުގެ ތެރެއަށްކަމަށްވެސް ރައީސް ވިދާޅުވިއެވެ.

ނަރުދޫގައި ބޭއްވުނު ޖަލްސާގައި ދައުލަތުގެ ވަޒީރުންނާއި ބައެއް މަޖްލިސް މެމްބަރުން ބައިވެރިވެވަޑައިގަންނަވާފައިވެއެވެ.