ޖުމްހޫރީ ޕާޓީގެ އަޣްލަބިއްޔަތު އޮތް ށ ނަރުދޫ ކައުންސިލްގެ އަޣްލަބިއްޔަތު ވެރިކަން ކުރާ މޯލްޑިވްސް ޑިމޮކްރެޓިކް ޕާޓީ, އެމްޑީޕީ އިން ހޯދައިފިއެވެ.

ނަރުދޫ ކައުންސިލްގެ އިސް ބޭފުޅުންތަކެއް ވަނީ މިއަދު އެމްޑީޕީ އަށް ސޮއިކުރައްވައިފައެވެ. އެގޮތުން ނަރުދޫ ކައުންސިލުގެ ރައީސް މުޙައްމަދު މުސްތަރުޝިދު، ނާއިބްރައީސް އަލީ ޝަރީފް އަދި ކައުންސިލު މެންބަރު މުޙައްމަދު މަދީހުއާއި، ކައުންސިލު މެންބަރު ސާމާ މުޙައްމަދު އެމްޑީޕީ އާއި ގުޅިވަޑައިގެންނެވި ފޯމު ރައީސް ޞާލިޙަށް ވަނީ އަރުވާފައެވެ.

އެފަރާތްތަކުން އެމްޑީޕީއަށް ސޮއި ކުރެއްވި ފޯމުތައް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުޙައްމަދު ޞާލިޙާއި ހަވާލު ކުރައްވާފައި ވަނީ ނަރުދޫގައި ބޭއްވި ޖަލްސާއެއްގައެވެ.

ނަރުދޫ ކައުންސިލްގެ 4 ބޭފުޅުން އެމްޑީޕީއާއި ގުޅިވަޑައިގަތުމުން ކުރިން ޖޭޕީ އަށް އޮތް އެކައުންސިލްގެ އަޣްލަބިއްޔަތު މިވަނީ ގެއްލިފައެވެ.

ކައުންސިލްގެ މެމްބަރުންގެ އިތުރުން އެރަށުގެ ކުރީގެ ކައުންސިލަރު އަދި ޕީޕީއެމްގެ އެކްޓިވިސްޓު ހުސައިން ސިރާޖާއި، ޑަބްލިއުޑީސީގެ ރައީސާ މަރިޔަމް ރަޝީދާ ވެސް ވަނީ އެމްޑީޕީއަށް ސޮއިކުރައްވާފައިވާ ފޯމު ރައީސް ސާލިޙަށް ޙަވާލުކުރައްވާފައެވެ.