ކުރީގެ ރައީސް އަބްދުالله ޔާމީން އަބްދުލް ޤައްޔޫމަށް ކުރިއަށް އޮތް ރިޔާސީ އިންތިހާބުގައި ވާދަ ނުކުރެއްވިއްޖެނަމަ، ބަދަލުގައި އިދިކޮޅުން ކެންޑިޑޭޓަކު ހޮވުމަށް ނިންމައި، ހުޅުވާލި ފުރުސަތުގައި، ޝައުގުވެރިކަން ފާޅުކުރެއްވީ މާލެ ސިޓީ ކައުންސިލްގެ މޭޔަރު އަދި ކުރީގެ ހައުސިން މިނިސްޓަރު ޑރ.މުހައްމަދު މުއިއްޒު އާއި ރައްޔިތުންގެ މަޖިލީހުގެ މަޑުއްވަރި ދާއިރާގެ މެމްބަރު އާދަމް ޝަރީފް އުމަރު ކަމަށް ޕީޕީއެމުން ބުނެފި އެވެ. 

ކުރިއަށް އޮތް ރިޔާސީ އިންތިހާބުގައި ޕީއެންސީން ވާދަކުރަން ނިންމާފައި ވަނީ އެ ޕާޓީގެ ސެނެޓުގެ 47 މެންބަރުންގެ ތެރެއިން 44 މެމްބަރުންގެ އިއްތިފާގުންނެވެ. އެއާއެކު އެކަމަށް ޝައުގުވެރިވާ ފަރާތްތަކުން ލިޔުން ހުށަހެޅުމުގެ ފުރުސަތު މިއަދު 2:00 އާ ހަމައަށް ހުޅުވާލައި، ވަގުތު ހަމަވިއިރު ހުށަހެޅީ މުޢިއްޒު އާއި އާދަމް ޝަރީފް އުމަރު ކަމަށް ޕީޕީއެމުން ބުނެފައިވެއެވެ. 

މުއިއްޒު ރިޔާސީ ޓިކެޓަށް ޝައުގުވެރިކަން ފާޅުކުރެއްވުމަށް، ކުރިން ހުންނެވި ޕާޓީ، ޕީޕީއެމުން ވަކިވެވަޑައިގެން ޕީއެންސީއާއި ގުޅިވަޑައިގެންނެވީ މިއަދުއެވެ. 

ޕީއެންސީން ބުނީ ޝައުގުވެރިކަން ފާޅުކުރައްވާ ފަރާތްތަކުގެ ތެރެއިން އެ ޕާޓީގެ ރިޔާސީ ޓިކެޓް އަރުވާނެ ފަރާތެއް ކަނޑައަޅާނީ މިއަދު ހަވީރު 16:00 ގައި ބާއްވާ ޕާޓީގެ މަޝްވަރާ މަޖިލީހުންކަމުގައެވެ. 

އިދިކޮޅު ޕީޕީއެމް/ޕީއެންސީ ގެ ފަރާތުން މި އަހަރުގެ ރިޔާސީ އިންތިޚާބުގައި ވާދަކުރުމަށްޓަކައި ކުރީގެ ރައީސް ޔާމީން ގެ ކެނޑިޑެސީ އިލެކްޝަންސް ކޮމިޝަނަށް ހުށަހެޅި ނަމަވެސް އެ ކޮމިޝަނުން ވަނީ އެމަނިކުފާނުގެ ކެނޑިޑެސީ ބަލައިނުގަތުމަށް ނިންމައިފައެވެ. 

އެއާއެކު އެ މައްސަލަ ކޯލޝަނުގެ ފަރާތުން ސުޕްރީމް ކޯޓަށް ހުށަހަޅައި، މި މައްސަލައިގައި ޖަވާބުދާރީވުމަށް ސުޕްރީމްކޯޓުން ވަނީ އިލެކްޝަންސް ކޮމިޝަނަށްވެސް އަންގައިފައެވެ. 

މިކަމާއި ގުޅިގެން އިލެކްޝަންސް ކޮމިޝަންސްގެ ނައިބްރައީސް އިސްމާއިލް ހަބީބް ވަނީ އެ ކޮމިޝަނުގެ ފަރާތުން މިއަދު 15:00 ކުރިން ސުޕްރީމް ކޯޓަށް ޖަވާބުދާރީ ވާނެކަމުގައި ބުނެފައެވެ.