ރ. އުނގޫފާރު ރީޖަނަލް ހޮސްޕިޓަލުގައި ހިތުގެ ބަލިތަކުގެ ޚާއްސަ ފަރުވާ ނުވަތަ ކާޑިއޮލޮޖީގެ ހިދުމަތް ދޭން ފަށައިފިއެވެ.

މި ޚިދުމަތް ފެށުމަށްޓަކާ ކާޑިއޮލޮޖިސްޓް އެހޮސްޕިޓަލުގެ ޚިދުމަތާއި މިދިޔަ ހަފްތާ ތެރޭގައި ގުޅިފައިވާއިރު، މިއީ މިފަދަ ސަބް ސްޕެޝަލިސްޓް ޚިދުމަތެއް އެހޮސްޕިޓަލުގައި ފެށި ފުރަތަމަ ފަހަރެވެ.

މި ޚިދުމަތް އެ ހޮސްޕިޓަލުގައި ފެށުމުގެ އުފަލުގައި، އެ ހޮސްޕިޓަލުން ބުނެފައިވަނީ މިއީ އެ ހޮސްޕިޓަލަށް ތާރީޚީ ދުވަހެއްކަމަށެވެ. އަދި މިފަދަ ޚިދުމަތެއް ފެށިގެން ދިޔުމަކީ އެ ހޮސްޕިޓަލަށް ލިބިގެން ދިޔަ ވަރަށް ބޮޑު ކުރިއެރުމެއްކަމަށް ކަމަށާއި އަލަށް މި ފެށުނު ޚިދުމަތާއެކީ ރައްޔިތުންނަށްވެސް ލުއިފަސޭހަތަކެއް ލިބިގެންދާނެކަމަށެވެ. 

މިއާއެކު އެ ހޮސްޕިޓަލުން ބުނީ، އެ ތަނުން މިހާރު ތައްޔާރުވަމުން އަންނަނީ އިތުރު އައު ޚިދުމަތްތައްވެސް އެ ހޮސްޕިޓަލުގައި ފެށުމަށް ކަމަށެވެ. އެގޮތުން އިކޯކާޑިއޯގްރާމްގެ ޚިދުމަތާއި، އެމް.އާރު.އައި ޚިދުމަތް ފެށުމަށް އިދާރީގޮތުން ކުރަންޖެހޭ ކަންކަން ކުރަމުން އަންނަ ކަމަށްވެސް އެ ހޮސްޕިޓަލުން ބުނެއެވެ.

އަދި ހަމައެހެންމެ ޓްރޯމާ ސާރޖަރީގެ ޚިދުމަތް ފެށުމަށް ބޭނުންވާ ވަޞީލަތްތައް ހޯދުމުގެ މަސައްކަތް ކުރިއަށްދާއިރު، ލެޕްރޯސްކޮޕިކް ސާޖަރީގެ ޚިދުމަތް ފެށުމަށް ވާންޖެހޭ އިދާރީ މަސައްކަތްތައް ކުރަމުންދާކަމަށްވެސް އެ ހޮސްޕިޓަލުން ބުނެފައިވެއެވެ.

އުނގޫފާރު ރީޖަނަލް ހޮސްޕިޓަލަކީ ރ އަތޮޅުގެ އިތުރުން، އެ ރަށާއި ކައިރި އަތޮޅު ތަކުގެ ރަށްރަށުންވެސް ޚިދުމަތް ހޯދަމުން އަންނަ ހޮސްޕިޓަލެއްކަން ފާހަގަކޮށްލަންޖެހެއެވެ.