‏ބަސް ބުނުމާ ޚިޔާލު ފާޅުކުރުމުގެ މިނިވަންކަމަށް ހުރަސް އެޅުމަކީ، ޚާއްސަކޮށް އިންތިޚާބުގެ ދުވަސްވަރު، ވަރަށް ދަށު ދަރަޖައިގެ އަމަލެއް ކަމަށް އެސްޓީއޯގެ ކުރީގެ އެމްޑީ އަދި ޑިމޮކްރެޓްސް ގެ ރަނިންމޭޓް، ހުސައިން އަމްރު ވިދާޅުވެއްޖެއެވެ. 

ދ. ކުޑަހުވަދޫ އަށް ރައީސް އިބްރާހިމް މުޙައްމަދު ޞާލިޙް އިއްޔެ ކުރެއްވި ދަތުރުފުޅާ ގުޅުވައި ދަ ޑިމޮކްރެޓްސްގެ އިންޓެރިމް ކައުންސިލްގެ މެންބަރު އަދި ކުޑަހުވަދޫ ކައުންސިލްގެ މެންބަރު އަޙްމަދު މަޢުރޫފްގެ އަމިއްލަ ގޭގައި ޝުޢޫރު ފާޅުކުރައްވަމުން ދަނިކޮށް ރޭގެ ވަގުތެއްގައި ވަނީ ހައްޔަރުކޮށްފައެވެ. 

އަހުމަދު މައުރޫފް, ހައްޔަރު ކޮށްފައި ވަނީ އަމިއްލަ ގޭގެ ޓެރެސްގައި, މައިކް އަކާއި ތާޅަފިއްޔެއް ބޭނުން ކޮށްގެން ޝުޢޫރު ފާޅުކުރައްވަމުން ދަނިކޮށް ކަން އޭނާ ހައްޔަރު ކުރި ވީޑިއޯ އިން އެންގެއެވެ. އަދި ހައްޔަރު ކުރި ފުލުހުން ވަނީ، އެ މަންޒަރު ވީޑިއޯ ކުރާ މީހުންނަށްވެސް ހުރަސް އަޅާފައެވެ. 

އެކަމާއި ގުޅިގެން އަމްރު ކުރެއްވި ޓްވީޓެއްގައި ވަނީ އެއީ ވަރަށް ދަށު ދަރަޖައިގެ އަމަލެއްގެ ގޮތުގައި ސިފަ ކުރައްވާފައެވެ. 

"ކުޑަ ހުވަދޫ ކައުންސިލަރު މައުރޫފް ހައްޔަރު ކުރުމަކީ ހުތުރު ކަމެއް. އަދި މައުރޫފް ވަގުތުން ދުކޮށްލަން ގޮވާލަން." އަމްރު ވިދާޅުވި އެވެ. 

މައުރޫފް ހައްޔަރުކުރި ކުރުން ކުށްވެރި ކޮށް ދަ ޑިމޮކްރެޓްސްއިން ނެރުނު ބަޔާނެއްގައި ވަނީ، ރައީސް ޞާލިޙް ވެރިކަމަށް ވަޑައިގަތީ ހިޔާލު ފާޅުކުރުމުގެ މިނިވަންކަމާއި، އެއްވެ އުޅުމުގެ މިނިވަންކަން ހިމާޔަތްކުރުމަށް ވައުދުވަމުން ކަން ފާހަގަކޮށްފައެވެ. 

ނަމަވެސް ދެވަނަ ދައުރެއް ހޯއްދެވުމަށްކަމަށް ވިދާޅުވެ ދިވެހިރާއްޖޭގެ އެކި ކަންކޮޅުތަކަށް ކުރައްވަމުންގެންދަވާ ކެމްޕެއިން ދަތުރުފުޅުތަކުގައި ކޮންމެ ރަށަކުންހެން ރައްޔިތުން ނުކުމެ، އިހުތިޖާޖުކޮށް، މިވެރިކަމާމެދު ނުރުހުން ފާޅުކުރަމުންދާ ދިއުން ސަލާމަތީ ބާރުތައް ނަހަމަގޮތުގައި ބޭނުންކުރައްވައިގެން ހުއްޓުވަމުން ގެންދަވާ ކަމަށް އެ ޕާޓީން ބުނެފައިވެއެވެ. 

މިއާއެކު އެޕާޓީން ބުނީ، އެންމެ ފަހުން ފުވައްމުލަކު ސިޓީއަށްވެސް ރައީސް ޞާލިޙް އަރައިވަޑައިގަތީ، ރަޔަޓުގިޔަރުގައި ތިބި ފުލުހުންނާއި، ސިފައިން ލައްވާ ރައްޔިތުންގެ އޮބަހައްޓައިގެން ކަމަށާ ދ. ކުޑަހުވަދޫ އިންވެސް ރޭ ފެނުނީ އެ މަންޒަރު ކަމަށެވެ.

ޑިމޮކްރެޓްސް އިން ވަނީ ދިވެހިރާއްޖޭގެ އެކި ކަންކޮޅުގައި މި ސަރުކާރާ ދެކޮޅަށް ސުލްހަވެރިގޮތުގައި އަޑު އުފުލަމުންދާ ރައްޔިތުން ހައްޔަރުކުރުންފަދަ އަނިޔާވެރި، ހުދުމުހުތާރު އަމަލުތައް ހުއްޓާލުމަށް ގޮވާލާފައެވެ.