2018 ވަނަ އަހަރުން ފެށިގެން މިދިޔަ ފަސްއަހަރަކީ ރާއްޖޭގެ އެންމެ ކުށްމަދު ފަސް އަހަރުގެ ގޮތުގައި ރިކޯޑް ކުރެވިފައިވާ ފަސް އަހަރު ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ރިޔާސީ އިންތިޚާބަށް ކެމްޕޭނު ކުރެއްވުމަށް ގދ ކުރައްވަމުންދަ ދަތުރުފުޅުގައި އެއަތޮޅު ނަޑެއްލާގައި ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.

"އުފާވެރި އަމާން ރާއްޖެއެއް ހޯދުމަށްޓަކައި މުޖްތަމަޢަކީ ކުށާ ދުރުގައި ކުށުގެ ވެށިން ރައްކާތެރިވެފައިވާ މުޖްތަމަޢަތަކަށް ހަދަންޖެހޭ، އޭގެ މަސައްކަތްވެސް ފެށިގެން ކުރިއަށްއެބަދޭ، ވޭތުވެދިޔަ އަހަރުތަކާއި އަޅައިބަލާއިރުގަ، 2018 އިން 2023އަށް މި ދިޔަ ފަސްއަހަރަކީ ރާއްޖޭގެ ތާރީޚުގައި އެންމެ ކުށް މަދު ފަސްއަހަރުގެ ގޮތުގައި ރިކޯޑް ކުރެވިފައި އެބަހުރި، ކުރިއަށް އޮތް ތަނުގައި  މިކަން އެބަ ދަމަހައްޓަން ޖެހޭ" ރައީސް ޞާލިޙް ވިދާޅުވިއެވެ.

Advertisement

ރައީސް ވިދާޅުވީ އާއިލީދިރިއުޅުމަށް އުފާވެރިކަން ގެންނަން އެބަޖެހޭ ކަމަށާއި، ފުދުންތެރިކަން ރައްޔިތުންނަށް އިތުރުކޮށްދޭން ޖެހޭ ކަމަށެވެ. އަދި ފުރުސަތުތައް ހަމަހަމަކޮށް ފަހިވެފައިވާ ޤައުމަކަށް ރާއްޖެ ހަދަން އެބަޖެހޭ ކަމަށާއި، އިޖްތިމާއީ ރައްކާތެރިކަމާއި އިޖްތިމާއީ އެހީ ކޮންމެ ރައްޔިތަކަށް ލިބެން ޖެހޭ ކަމަށް ރައީސް ޞާލިޙް ވިދާޅުވިއެވެ.

ރައީސް ވިދާޅުވީ މިކަންކަން ހާސިލް ކުރެވޭނެ ސިޔާސަތުތައް މިހާރު ކަނޑައެޅިފައިވާ ކަމަށެވެ.

ގދ އަށް ރައީސް ޞާލިޙާއި އެމަނިކުފާނުގެ ރަނިންގމޭޓް މުޙައްމަދު އަސްލަމް މިކުރައްވާ ކެމްޕޭނު ދަތުރުފުޅުގައި އެމްޑީޕީ ކޯލިޝަންގެ އިސް ލީޑަރުން ބައިވެރިވެ ވަޑައިގަންނަވައެވެ.