ވެރިކަމުގެ ފުރަތަމަ ދައުރުގައި މަސްވެރިން ބާނާ މަހަށް ހަމަ އަގު ހޯދައިދޭނެކަމަށް ވައުދުވި ނަމަވެސް އެކަން ނުކުރެވުނީ ކޮން ސަބަބަކާއި ހުރެކަން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ސާފުކޮށްދެއްވައިފި އެވެ. 

2018 ވަނަ އަހަރުގެ ރިޔާސީ އިންތިޚާބާއި ދިމާކޮށް އެމްޑީޕީން އަދި ގުޅިފައިވާ ސިޔާސީ ޕާޓީތަކުން މަސްވެރިންނަށް އަމާޒުކޮށް ވީ އެންމެ މުހިންމު ވައުދަކީ މަސްވެރިން ބާނާ މަހަށް ހަމަ އަގުހޯދައިދިނުމުގެ ވައުދެއެވެ.

އެގޮތުން އޭރު މަސްވެރިން ބާނާ މަސް ކިލޯއަކަށް ސަރުކާރުން (ރައީސް ޔާމީންގެ ސަރުކާރުން) ދެމުން އައީ އެކަށީގެންވާ އަގަށްވުރެ މާ ދަށް އަގެއްކަމަށް އެމްޑީޕީއާއި ގުޅިފައިވާ ކޯލިޝަނުން ދިޔައީ ބުނަމުން ނެވެ. 

Advertisement

ފިނޭންސް މިނިސްޓަރު އަމީރު ގދ އަތޮޅަށް ކުރެއްވި ކެމްޕޭނު ދަތުރެއްގައި ވިދާޅުވެފައިވަނީ 2018 ގައި އުފެދޭ އެމްޑީޕީގެ ވެރިކަމެއްގައި މަސްވެރިން ބާނާ މަހަށް ހަމަ އަގު ހޯދައިދެއްވާނެ ކަމަށެވެ. އަދި މަހުގެ އަދު 15 ކިލޯއިން 34 ކިލޯއަށް އުފުއްލައިދެއްވާނެ ކަމަށެވެ. 

އެހެން ނަމަވެސް ދައުރު ނިމެން ކުޑަތަންވެފައިވާއިރު ވެސް އެ ވިދާޅުވާ އަގަށް ސަރުކާރުން މަސް ގަނެފައެއް ނުވެއެވެ. އަދި މަސް ކިލޯއެއްގެ އަގު މިހާރު ވަނީ 15 ކިލޯއަށްވުރެ ވެސް ދަށަށް ވެއްޓިފައެވެ. 

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ގދ އަތޮޅަށް ކުރައްވާ ކެމްޕޭނު ދަތުރުފުޅުގައި އެ އަތޮޅުގެ ފަރެސްމާތޮޑާއަށް ވަޑައިގެން އެ ރަށުގެ މަސްވެރިންނާއި މުޚާތަބުކުރައްވާ ވަނީ ފުރަތަމަ ދައުރުގައި މަސްވެރިން ބާނާ މަހަށް ހަމައަގު ހޯދައި ނުދެވުނު ސަބަބު ސާފުކޮށްދެއްވާފަ އެވެ. 

އެގޮތުން ރައީސް ޞާލިހު ވިދާޅުވީ މަހަށް ހަމައަގުހޯދައިދިނުމަށް ކުރީ ސަރުކާރުން ގެންގުޅުނު ޕްރައިވެޓައިޒޭޝަން ސިޔާސަތަކީ ރަނގަޅު ސިޔާސަތެއް ނޫންކަން މި ދައުރުގައި އެމަނިކުފާނަށް ވިސްނިވަޑައިގެންފައިވާ ކަމަށެވެ. 

އޭގެ އިތުރުން ވެރިކަން ބަދަލުވިއިރު މަސްވެރިންނަށް ނުދައްކާހުރި ގިނަ އަދަދެއްގެ ފައިސާތަކެއް ދަންކަން ޖެހުނުކަމަށް ވެސް ރައީސް ޞާލިހު ވިދާޅުވި އެވެ. 

އެ ހުރިހާ ކަމަކާއި އެކުވެސް ރައީސް ޞާލިހު ވިދާޅުވީ މަހަށް ހަގީގަތުގައި ހަމަ އަގު ހޯދައި ނުދެވުނީ ރާއްޖެއިން ބޭރުގެ މާކެޓުތަކުގައި މަހުގެ އަގުތައް ހުންނަ ގޮތުން ކަމަށެވެ. 

ރައީސް ޞާލިހު ވިދާޅުވީ މި ދައުރަށް ވައުދުވި ގޮތަށް މަސްވެރިން ބާނާ މަހަށް ހަމައަގު ހޯދޭނީ މުޅި ސިނާއަތަށް ބޮޑެތި ބަދަލުތަކެއް ގެނެސްގެން ކަމަށެވެ. 

މަސްވެރިން ބާނާ މަސް ތާޒާކަންމަތީގައި ގަނެވޭނެ އިންތިޒާމުތައް ހަމަޖެއްސުމާއި، އެކަން ކުރަން ޖެހޭނީ ސަރުކާރުގެ ސިޔާސަތުގެ ތެރެއިންކަމަށް ރައީސް ޞާލިހު ވިދާޅުވި އެވެ. އަދި އެމަނިކުފާނަށް ދެވަނަ ދައުރެއް ލިބިވަޑައިގެންފި ނަމަ އެކަންކަން ކުރައްވާނެކަމަށް ރައީސް ޞާލިހު ވަނީ ވިދާޅުވެފަ އެވެ.