ހަނިމާދު ރައްޔިތުންގެ އެދުމައި އެއްގޮތަށް އިންޑިޔާގެ ބިޔަ ލޯނު އެހީއެއްގެ ދަށުން ތަރައްގީ ކުރަމުންދާ ހަނިމާދޫ އިންޓަރނޭޝަނަލް އެއަރޕޯޓަކީ ދިވެހި ސަރުކާރުގެ ދަށުގައި އޮންނަ އެއާޕޯޓެއްކަން ޔަގީންކޮށްދެއްވާނެ ކަމުގައި އިދިކޮޅު އިއްތިހާދުގެ ރިޔާސީ ކެންޑިޑޭޓު ޑރ.މުޙައްމަދު މުޢިއްޒުގެ ވިދާޅުވެއްޖެއެވެ. 

ޑރ.މުޢިއްޒުގެ މިފަދައިން ވިދާޅުވީ، ރިޔާސީ ކެމްޕެއިން ދަތުރުތައް ފެއްޓެވުމުގެ ގޮތުން ބޮޑު ތިލަދުންމައްޗަށް ކުރައްވާ ދަތުރުފުޅުގައި ފުރަތަމަ ރަށަކަށް ހދ ހަނިމާދޫއަށް ވަޑައިގެން އެމަނިކުފާނާއި ޕީޕީއެމްގެ ލީޑާޝިޕުގެ ޓީމުން އެ ރަށުގެ ސަޕޯޓަރުންނާއި ބައްދަލު ކުރައްވައި ދެއްކެވި ވާހަކަފުޅުގައެވެ. 

އެރަށުގައި ހުންނަ ޕީޕީއެމް ގެ ޖަގަހައިގައި ކުރިއަށްދިޔަ މި ބައްދަލުކުރެއްވުމުގައި، އިންޑިޔާއިން 136.6 މިލިއަން ޑޮލަރުގެ ދަރަންޏެއް ނަގައިގެން  ތަރައްޤީކުރަމުން އަންނަ އެރަށުގައި އޮންނަ ބައިނަލްއަގްވާމީ ބަނދަރަކީ ދިވެހި ސަރުކާރުގެ ބާރުވެރިކަން ފުރިހަމައަށް ހިނގާ ތަނެއްކަމުގައި ހައްދަވައިދެއްވުމަށް ޑރ މުއިއްޒުގެކިބައިން އެދިފައެވެ. 

މީގެ އިތުރުން އެ ރަށުގެ ރައްޔިތުންވަނީ، މި ސަރުކާރުން އެ ރަށުގައި ތަރައްޤީކުރަން ވައުދުވި ހޮސްޕިޓަލުގެ މަސައްކަތް އަންނަ ވެރިކަމުގައި ނިންމައިދިނުމަށާއި  ހޮސްޕިޓާ އަޅަން ކަނޑައެޅި ބިމުގައި ވާހެދި ޖަންގަލި ބޯވެފައި އޮތްއިރު އެތަނުގައި އެއްވެސް މަސައްކަތެއް މިހާތަނަށް ކުރެވިފައިނުވާކަން އެރަށުގެ ރައްޔިތުން ވަނީ ފާހަގަކޮށްފައެވެ. 

ހަނިމާދު ރައްޔިތުންގެ ވާހަކަތައް އަޑު އެއްސެވުމަށްފަހު ޑރ މުއިއްޒުވަނީ، އެހުރިހާކަމެއްވެސް ކޮށްދެއްވާނެކަމުގެ ފުރިހަމަ ޔަގީންކަން އެރަށުގެ ރައްޔިތުންނަށް އަރުވާފައެވެ. އަދި މިވެރިކަމުގައި ހިންގަން ފަށައި ކުރިއަށް ނުގޮސް މަޑުޖެހިފައިހުރި ތަރައްޤީގެ މަޝްރޫޢުތައް އެމަނިކުފާނުގެ ވެރިކަމެއްގައި ހިންގަވައި ނިންމަވައިދެއްވާނެ ކަމުގެ ޔަގީންކަންވެސް ޑރ.މުޢިއްޒު ދެއްވިއެވެ. 

މި އަހަރުގެ ރިޔާސި އިންތިހާބަށް އަތޮޅުތެރޭގެ ކެމްޕެއިން ފެށުމުގެ ގޮތުން ޑރ މުއިއްޒުއާއި ކެމްޕެއިން ޓިމުން ބޮޑު ތިލަދުންމަށްޗަށް ކުރަމުން ގެންދާ ދަތުރުގައި ހަނިމާދޫގެ އިތުރުން ނޮޅިވަރަމާއި ކުޅުދުއްފުށްޓަށް ޒިޔާރަތްކުރުމަށް ވަނީ ހަމަޖެހިފައެވެ.