ރަށްރަށަށް އަސާސީ ހިދުމަތްތައް ފޯރުކޮށްދެވި، ރިސޯޓުތައް ފެންވަރަށް ރަށްތަކަށް ކުރިއެރުމާއި ތަރައްގީ ގެނެސްދެވިއްޖެ ކަމަށާއި ދެން އަވަސްވެގަންނަންވީ ރަށްތަކުގައި ގެސްޓްހައުސް ތަރައްގީކުރަން ކަމަށް އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ޞާލިހު މިއަދު ވިދާޅުވެއްޖެ އެވެ.
ރިޔާސީ ކެމްޕެއިންގައި ނ. އަތޮޅަށް ކުރައްވަމުން ގެންދަވާ ދަތުރުފުޅުގައި އެ އަތޮޅު މިލަދޫއަށް ވަޑައިގެން ރައީސް ވިދާޅުވީ, 2018 ވަނަ އަހަރު ޖަޒީރާ ރާއްޖެއެއްގެ މެނިފެސްޓޯ އާއި އެކު އެމްޑީޕީ ކޯލިޝަނުން ނުކުތީ ކުޑަރަށެއް ބޮޑު ރަށެއް ތަފާތު ކުރުމެއްނެތި ހުރިހާ ރަށަކަށް ޚިދުމަތްތައް ފޯރުކޮށްދެއްވަން ކަމަށެވެ.
އެކަން ހާސިލްކުރުމަށް، ރަށްރަށުގައި ފެނާއި ނަރުދަމާގެ ޚިދުމަތް ގާއިމްކޮށް، ބަނދަރުގެ ޚިދުމަތާއި، ކަރަންޓުގެ ޚިދުމަތުގެ އިތުރުން ސްކޫލް ތަކުގައި ކްލާސްރޫމްތައް އެޅުން ފަދަ ކަންކަން އަސާސީ ޚިދުމަތްތައް ގިނަ ރަށްރަށަށް ފޯރުކޮށްދެވިފައިވާ ކަމަށް ރައީސް ޞާލިހު ވިދާޅުވި އެވެ. އަދި ހުރިހާ އަސާސީ ޚިދްމަތެއް ފުރިހަމަވެ ނިމުމުން، ދެން ބޭނުންވާނީ އޭގެ މަތީގައި ކުރިއަށްދާން ކަމަށްވެސް ވިދާޅުވި އެވެ.
"އަޅުގަނޑުމެންގެ ކޮންމެ ރަށެއް މިހާރު މިވަނީ ރިސޯޓެއްގެ ގޮތަށް ފައްކާވެފައި. ގެސްޓްހައުސް އަޅަންވީ. ފެން ލިބޭނެ، ނަރުދަމާ އޮންނާނެ. ސިއްހީ ޚިދުމަތް ލިބޭނެ. ބޭރުން ޓޫރިސްޓުން އަންނައިރު ބަލާނެ ކިހިނެއްތޯ ސިއްހީ ޚިދުމަތް މިތާ ހުރީ. ދެން އެ ސުވާލު ކޮށްފިއްޔާ ކޮންމެ ރަށަކަށް ވެސް ޖަވާބު ދެވޭނެ. ފާހަގަޖެހޭނެ. މިރަށުގައި އެ ހުއްޓޭ މި ކަންކަން. އަޅުގަނޑު ހިތުން މިއީ ރަނގަޅު މުސްތަގުބަލެއްގެ ފެށުން."
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މިއާއެކު ރައީސް ވިދާޅުވި، ގެސްޓްހައުސް އެޅުމަށް އިންވެސްޓްމެންޓްތައް ކުރަން ބޭނުންވާ މީހުންނަށް ލުއި ލޯނު ލިބޭނެ އިންތިޒާމް ހަމަޖައްސަވާނެ އެވެ.
Advertisement
This content is created and paid for by advertisers and does not involve Voice Journalists
