2013 އިން 2018 ގެ މާޒީއަށް އަނބުރާ ގޮސްފިނަމަ އަނެއްކާވެސް ހިތިދުވަސްތަކެއް ތަޖުރިބާ ކުރަން ޖެހިދާނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ނ.އަތޮޅަށް ކުރައްވަމުން ގެންދަވާ ކެމްޕެއިން ދަތުރު ފުޅުގައި އެއަތޮޅު މިލަދުއަށް ވަޑައިގެން އެރަށުގެ ރައްޔިތުންނާއި ބައްދަލު ކުރައްވައި ވާހަކަފުޅު ދައްކަވަމުންނެވެ.

"އަޅުގަނޑުމެންގެ ވާދަވެރިން ނިކުމެ މިދައްކަވާ ވާހަކައަކީ ތިމަންނަމެން ކަންތައްތައް ކޮށްދޭނީ ބޮޑެތި އާބާދީއަށޭ، ގިނައިން މީހުން އުޅޭ ރަށްރަށަށޭ، ސާފުކޮށް އިއްޔެވެސް އެހެން ވިދާޅުވަނީ، ރާއްޖޭގެ ރަށްރަށުގެ އާބާދީތަކަށް ބަލާއިރު، މިރަށުގެ އާބާދީއަކީ ކުޑަ އާބާދީއެއް ނޫން، އެހެންނަމަވެސް މިރަށުގެ ސްކޫލް ކްލާސްރޫމް އިތުރު ކުރަން ޖެހިފަ، ފެނުގެ ނިޒާމް އަޅަންޖެހިފަ، ބަނދަރު އެހާދަތި، މިހެން ގޮސް އިންޖީނުގޭގެ ޙާލު ހުރިގޮތް އަޅުގަނޑުމެންނަށް އިނގޭނެ، އެހެންވީމަ ބޮޑެތި އާބާދީއޭ ކިޔައިގެން މިދައްކާ ވާހަކަވެސް ދިމަލެއް ނުވޭ،  ހަމައެކަނި އެންމެ ދެތިން ރަށަކަށް އަމާޒުކޮށްގެން ކުރިކަމެއް ނޫނިއްޔާ 2013 އާއި 2018 އާއި ދޭތެރޭގައި ކޮށްފައެއް ނެތް އެސަރުކާރަކު" ރައީސް ވިދާޅުވިއެވެ.

ރައީސް ޞާލިޙް ވިދާޅުވީ އެނބުރި އެމާޒީގެ ތެރެއަށް ގޮއްސިއްޔާ ތަޖުރިބާ ކުރަން ޖެހޭނީ ވަރަށް ހިތި ދުވަސްތަކެއް ކަމަށެވެ. އަދި ދެން އެމާޒީ އަލުން އަނބުރާ ދެކެން މިލަދޫ ރައްޔިތުންވެސް ބޭނުން ނުވާނެ ކަމަށް ރައީސް ވިދާޅުވިއެވެ.

ރައީސް ޞާލިޙް ވިދާޅުވީ ހުރިހާ އަސާސީ ޚިދްމަތެއް ފުރިހަމަވެ ނިމެނީ ކަމަށާއި، ދެން ބޭނުންވާނީ އޭގެ މަތީގައި ކުރިއަށްދާން ކަމަށެވެ.

ރައީސް ޞާލިޙް ނ އަތޮޅަށް ކުރައްވަމުން މިގެންދަވާ ދަތުރުފުޅުގައި މަޖިލިސް މެމްބަރުންނާއި އެމްޑީޕީ ކޯލިޝަން ޕާޓީތަކުގެ އިސް ލީޑަރުންވެސް ދަނީ ބައިވެރިވަމުންނެވެ.