ޕްރޮގްރެސިވް ކޮންގެސް ކޯލިޝަންގެ ފަރާތުން ވާދަކުރައްވާ ރިޔާސީ ކެންޑިޑޭޓު ޑރ މުޙައްމަދު މުއިއްޒަށް ވެރިކަން ލިބިވަޑިގެންފި ނަމަ މަކުނޫދޫއަށް ކޮށްދެއްވާނެ ކަންކަން އެމަނިކުފާނު ހާމަކުރައްވައިފި އެވެ.
އެކަންކަން އެމަނިކުފާނު ހާމަކުރައްވާފައި ވަނީ ރިޔާސީ ކެމްޕޭނަށް ތިލަދުންމައްޗަށް ކުރައްވާ ދަތުރުފުޅުގައި މަކުނުދޫއަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ނެވެ.
ޑރ މުއިއްޒު ވިދާޅުވީ މަކުނުދޫ ރައްޔިތުން ބޭނުންވާގޮތަށް އެއާޕޯޓު މަޝްރޫއު ކުރިއަށް ގެންދަވާނެކަމުގެ ޔަގީންކަން ދެއްވާކަމަށެވެ.
އޭގެ އިތުރުން ޑރ މުއިއްޒު ވިދާޅުވީ އެއާޕޯޓު އެޅުމަށް ބިން ހިއްކުމުގެ މަޝްރޫއު ކުރިއަށް ގެންދާއިރު، އެކަން ކުރައްވާނީ މަކުނޫއަށް ދިމާވެފައިވާ ބޯހިޔާވަހިކަމުގެ މައްސަލަ ޙައްލުކުރުމަށް ބޯހިޔާވަހިކަމަށް ބޭނުންވާ ބިމާއި ވެސް އެކުގައި ކަމަށެވެ. އަދި މަކުނޫއަށް ދިމާވެފައިވާ ބޯހިޔާވަހިކަމުގެ މައްސަލަ ވެސް ޙައްލުކޮށްދެއްވާނެ ކަމަށެވެ.
"މިރަށުގައި ގެދޮރު ބިނާކުރަން، ގޯތި ދޭން އޮތް ބިންކޮޅު މިހާރު ހުސްވަމުންދާ ވާހަކަ ވިދާޅުވި. އެހެންވީމާ އެއާޕޯޓު ތިބޭފުޅުން ބޭނުންވާ ގޮތަށް ބިނާކުރުމުގެ މަސައްކަތް ކުރިއަށްދާއިރު މި ރަށަށް ގޯތި ދިނުމަށް ބޭނުންވާ ބިން ވެސް އެއާއި އެކުގައި ހިއްކިގެން ދިއުމަކީ އަޅުގަނޑު ހިތުން އެކަން ކުރަން ޖެހޭނެ ގޮތް"
ޑރ މުހައްމަދު މުއިއްޒު
ސިއްޙީ ޚިދުމަތް ހޯދުމަށް މަކުނޫގެ ރައްޔިތުން މިހާރު އުފުއްލަވަމުން ގެންދަވާ ބުރަ އިހުސާސްކުރެވޭކަމަށް ޑރ މުއިއްޒު ވިދާޅުވި އެވެ. އަދި ސިއްޙީ ފަރުވާއަކީ އަސާސީ ހައްޤަކަށް ވާއިރު، އެ ހައްގު ހޯދުމަށް އެހާ ބޮޑު ތަކުލީފެއް ރައްޔިތުންނަށް ޖައްސައިގެން ނުވާނެކަން ޑރ މުއިއްޒުގެ ވާހަކައިގައި ފާހަގަކުރެއްވި އެވެ. އެކަމާއި ގުޅޭގޮތުން ޑރ މުއިއްޒު ވިދާޅުވީ ވެރިކަން ލިބިވަޑައިގެންފި ނަމަ ރަށުގައި ތިބެގެން ސިއްޙީ ޚިދުމަތް ލިބޭނެ އިންތިޒާމުތއް ހަމަޖައްސަވާ އެ ވަސީލަތްތައް ޤާއިމްކޮށްދެއްވާނެ ކަމަށެވެ.
"އަމިއްލަ ފައިމައްޗަށް ތެދުވެ ހުރި ސިއްޙީ މަރުކަޒެއް ހުންނަން ޖެހޭނެ. އެކްސް-ރޭއާއި ސްކޭން ހެދުމާއި ކުޑަކުދިންގެ ޑޮކްޓަރުންނާއި އަންހެނުންގެ ޑޮކްޓަރުންނާއި، ވިހެއުމަށް ބޭނުންވާ ކްލިނިކް ފެސިލިޓީއާއި. މި ދެންނެވި ހުރިހާ ކަމަކީ އަސާސީ ކަންކަން ހަގީގަތުގައި. އެހެންވީމަ މިހެން ވަކިން ދުރުގައި އޮންނަ ތަނަކަށް ވާއިރު އެކަންކަމުގެ ޚިދުމަތް ހޯދަން މާ ދުރަށް ދާން ޖެހުމަކީ އެއީ އިންސާފެއް ނޫން. އެހެންވީމާ ތިބޭފުޅުން ތި އެދިލެއްވި ގޮތަށް އަޅުގަނޑުމެން މިރަށުގެ ސިއްޙީ މަރުކަޒު ތަރައްގީކޮށްދޭނަން"
ޑރ މުހައްމަދު މުއިއްޒު
ޑރ މުއިއްޒުގެ ވާހަކައިގައި ވަނީ މަކުނުދޫ ޒުވާނުންނަށް ޚާއްސަކޮށްގެން ތަރައްގީކޮށްދެއްވާނެ ކުޅިވަރު ފެސިލިޓީތަކުގެ މައުލޫމާތުތައް ވެސް ހިއްސާކުރައްވާފަ އެވެ.
"ޒުވާނުން ބޭނުންވޭ މިތަނުގައި ފުޓުބޯޅަ ދަނޑެއް ހެދިގެން ދާން. އަދި ޒަމާނީ ފެންވަރުގެ ޒުވާނުންގެ މަރުކަޒެއް މިތަނުގައި ހުރުމަކީ އަޅުގަނޑު ހިތުން ޒުވާނުންގެ ދުޅަހެޔޮކަމަށްޓަކައި، ޒުވާނުން ބިނާކުރުމަށް މުހިންމު ކަމެއް. އެހެންވީމާ ޒަމާނީ ބޮޑު ފުޓުބޯޅަ ދަނޑަކާއި ޒުވާނުންގެ މަރުކަޒެއް ޤާއިމްކުރުމަކީ އަޅުގަނޑުމެންގެ ސަރުކާރެއްގައި އިސްކަން ދޭނެ ކަމެއް"
ޑރ މުހައްމަދު މުއިއްޒު
ޑރ މުއިއްޒު ވިދާޅުވީ ފާހަގަކުރެވުނު ކަންކަމުގެ އިތުރުން ވެސް މަކުނުދޫއަށް ބޭނުންވާ ކަންކަން ކޮށްދިނުމަށް މަސައްކަތްޕުޅު ކުރައްވާނެ ކަމަށެވެ. އެމަނިކުފާނު ގެންގުޅުއްވަނީ ރައީސް ޔާމިނުގެ މެނިފެސްޓޯކަމަށާއި، އެ މެނިފެސްޓޯގައި ހުރިކަންކަން ފުއްދާދެއްވާނެކަމުގެ ޔަގީންކަނަށް ޑރ މުއިއްޒު ވަނީ ދެއްވާފަ އެވެ.
Advertisement
This content is created and paid for by advertisers and does not involve Voice Journalists
