މިދައުރުގައިވެސް ޒުވާނުންނަށް ކުރިން ލިބިފައިނުވާ އެތައް އައު ފުރުސަތުތަކެއް ހޯދައިދެވުނު ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ ނ.އަތޮޅަށް ކުރައްވަމުން ގެންދަވާ ކެމްޕޭނު ދަތުރުފުޅުގެ ތެރެއިން އެ އަތޮޅު ލަންދޫ އަށް ވަޑައިގެން އެރަށު ރައްޔިތުންނާއި ވާހަކަދައްކަވަމުންނެވެ.
"ޒުވާނުންނަކީ މާދަމާގެ ވެރިންކަމަށް އަޅުގަނޑުމެން ޤަބޫލު ކުރާ ކަމަށްވަންޏާ، މިއަދު ޒުވާނުންނަށް ފުރުސަތު ލިބެން އެބަޖެހޭ ބަސްބުނުމުގެ ފުރުސަތު ލިބެން އެބަޖެހޭ، ސިޔާސަތުތައް ކަނޑައެޅުމުގައި ބައިވެރިކުރަން އެބަޖެހޭ، ކުރިއަށްއޮތް ދައުރުގައި ތިބޭފުޅުންނަށް އެކަން ފެނިވަޑައިގަންނަވާނެ، މިދައުރު ނިމިގެން ދާއިރުގައިވެސް ރާއްޖޭގެ ޒުވާނުންނަށް މީގެ ކުރިން ލިބިފައިނުވާ އެތައް ފުރުސަތެއް އެތައް ގޮތަކުން ލިބިފައިވާނެ" ރައީސް ޞާލިޙް ވިދާޅުވިއެވެ.
ރައީސް ވިދާޅުވީ ހަމައެކަނި ތަޢުލީމީ ދާއިރާއަށް ބެލިޔަސް ކުރިން އޮތް އެތައް ދަތިތަކެއް މިހާރު ހައްލު ކުރެވިފައިވާ ކަމަށެވެ. އަދި މަތީ ތަޢުލީމަށް ކިޔެވުމަކަށް މިހާރު އެއްވެސް އާއިލާއަކަށް ހުރަހެއް ދައްޗެއް ނެތް ކަމަށާއި އެކަން ވަރަށް ސާފުކޮށް މިހާރު އެނގޭނެކަމަށް އެމަނިކުފާނު ވިދާޅުވިއެވެ.
ރައީސް ޞާލިޙް ވިދާޅުވީ މަތީ ތަޢުލީމަށް ބޭރަށް ދިޔުމަށް ނަގާ ލޯނު ކިޔަވައި ނިންމައިގެން އަންނަތާ 6 މަސް ދުވަހުގެ ތެރޭގައި ދެއްކުމަށް އޮންނަ އޮތުމުގެ ސަބަބުން ތަކްލީފުތަކެއް ހުރި ކަމަށާއި ކުރިއަށް އޮތް ތަނުގައި އެމުއްދަތު ދިގުކޮށްދެއްވާނެ ކަމަށެވެ.
މީގެކުރިން އެލޯނުގެ އެޑްމިނިސްޓްރޭޓިވް ޗާޖް އެއްގެ ގޮތުގައި ނަގަމުން އައި ފަސް ޕަސެންޓް މިހާރު ވާނީ އެއް ޕަސެންޓަށް ކުޑަ ކޮށްދެއްވައިފައިކަމަށް ރައީސް ޞާލިޙް ވިދާޅުވިއެވެ.
ނ. އަތޮޅަށް ކުރައްވަމުން މިގެންދަވާ ކެމްޕޭނު ދަތުރުގެ ތެރެއިން ރޭ ނ.ވެލިދޫގައި ބޭއްވި ޖަލްސާގައިވަނީ "އާ ޒުވާނުންގެ ޖީލު"ގެ ނަމުގައި ޒުވާނުންނަށް ޚާއްސަ ސިޔާސަތުތައް ތަޢާރަފްކޮށްފައެވެ.
Advertisement
This content is created and paid for by advertisers and does not involve Voice Journalists
