ވެރިކަންކުރާ މައި ޕާޓީ، އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުއަށް ދޭ ވޯޓަކީ ސަރުކާރު ކޯލިޝަންގައި ހިމެނޭ އަދާލަތު ޕާޓީ ވެރިކަމުގައި ތިބެން ދޭ ވޯޓެއް ކަމުން އެކަމަށް ވިސްނުމަށް އެމްޑީޕީގެ ކުރީގެ ރައީސް އިބްރާހިމް އިސްމާއީލް (އިބްރާ) އިލްތިމާސް ކުރައްވައިފި އެވެ.

ހޯމަ ދުވަހު އެމްޑީޕީން ވަކިވެވަޑައިގެންނެވިކަން އިއުލާން ކުރެއްވި އެ ޕާޓީގެ ޗެއާޕާސަން ފައްޔާޟް އިސްމާއިލް ގެ ބޭބެ، އިބްރާ ރޭ ކުރެއްވި ޓްވީޓެއް ގައި ވިދާޅުވީ، މިވަގުތު ބޮދައިގެން އޮތަސް އެމްޑީޕީއަށް ދޭ ވޯޓަކީ އަދާލަތު ވެރިކަމުގައި ދަމަހައްޓަން ދެވޭ ވޯޓެއް ކަމަށެވެ.

އިބުރާ އަކީ އަބަދުވެސް އަދާލަތު ޕާޓީން ގެންގުޅޭ ސިޔާސަތުތަކާއި ސިޔާސީ މައިދާނުގައި އެ ޕާޓީގެ ހަރަކާތްތެރިވުމާމެދު ފާޑު ވިދާޅުވާ ބޭފުޅެކެވެ. 

ކުރިއަށް އޮތް ރިޔާސީ އިންތިހާބުގައިވެސް ވެރިކަންކުރާ ޕާޓީ، އެމްޑީޕީއާއި އެކު ކޯލިޝަން ހަދާފައިވާ އަދާލަތު ޕާޓީ އުފެދިގެން އައީ ދިވެހިރާއްޖޭގައި އިސްލާމް ދީން ކުރި އަރުވައި، ދީނީ ގޮތުން ހޭލުން ތެރި އިތުރު ކުރުމުގެ މަގުސަދުގައެވެ. 

އެހެންނަމަވެސް، ޕާޓީ އުފެދުނު އަސްލު މަގުސަދު ގެއްލި، އެޕާޓީގައި ތިބި، ދީނަށް ލޯބިކުރާ ގިނަ ޢިލްމުވެރިންވެސް މިހާރުވަނީ ޕާޓީން ވަކިވެވަޑައިގެންފައެވެ. އަދި ޕާޓީގައި މިވަގުތު ތިއްބެވި ޢިލްމުވެރިންވެސް ދީން ހިމާޔަތްކޮށް، ދީނީ ހޭލުންތެރިކަން އިތުރުކުރުމުގެ ބަދަލުގައި، ފެންނަމުންދަނީ، ސަރުކާރު ހިމާޔަތް ކޮށް، ސަރުކާރުގެ ސިޔާސަތުތަކާއި މެދު މީހުން ހޭލުންތެރި ކުރުވަން އުޅޭ ތަނެވެ. 

އެހެންކަމުން، އެ ޕާޓީގައި 'އިލްމުވެރިން' ގޮތުގައި ތިބި ގިނަ ބޭފުޅުންނަކީވެސް ސިޔާސީ އެކްޓިވިސްޓުން ގޮތުގައި ގިނަ ބަޔަކު ސިފަ ކުރެއެވެ.