ވެރިކަން ލިބިވަޑައިގެންފިނަމަ ވެވަޑައިގަންނަވާނީ އެންމެންގެ ރައީސަކަށް ކަމަށާ, ރައްޔިތުންނާއެކު ފިލްމުކުޅެ، ނަށައި، ބޯޅަކުޅެ ދުވަންވެސް ދާނެ ކަމަށް ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބު ވިދާޅުވެއްޖެ އެވެ.
ޑިމޮކްރެޓްސްގެ ރިޔާސީ މެނިފެސްޓޯ އިފްތިތާހު ކުރުމަށްޓަކައި ރޭ ބޭއްވި ޖަލްސާގައި ވާހަކަ ދައްކަވަމުން އިލްޔާސް ވިދާޅުވީ ރާއްޖެ މިހާރު ބޭނުންވަނީ ހެނދުނާއި ތެދުވެ މަަސައްކަތް ފެށޭނެ ލީޑަރެއް ކަމަށާ އޭނާ އަކީ އެފަދަ ލީޑަރެއް ކަމަށެވެ.
އިލްޔާސް ވިދާޅުވީ، ކުޅިވަރު އެސޯސިއޭޝަންތަކާއި މުނިފޫހިފިިލުވުމުގެ ދާއިރާގައި އުޅޭ މީހުންނާއި މިއުޒިކް ކުޅޭ މީހުންނާއި ރޭސް ޖަހާ މީހުންނާއެކުވެސް އޭނާ ހުންނާނެ ކަމަށާ، އަދި އެކަންކަމުގައި އޭނާވެސް އުޅުއްވާނެ ކަމަށެވެ.
"ތިބޭފުޅުންނާއެކު މުނިފޫހިފިލުވުމުގައިވެސް ފިލްމު ކުޅުމުގައިވެސް ފިލްމު ބެލުމުގައިވެސް ތިބޭފުޅުންނާއެކު ރޭސް ޖެހުމުގައި ވެސް ތިބޭފުޅުންނާއެކު މިއުޒިކު ކުޅުމުގައިވެސް ތިބޭފުޅުންނާއެކު ޑާސް ކުުރުމުގައިވެސް އަޅުގަނޑު ހުންނާނަމޭ. އަޅުގަނޑު ފުޓްބޯޅަ ވެސް ކުޅޭނަމޭ މެރެތަން ދުވަން ވިޔަސް އަޅުގަނޑަށް ވުރެ ބާރަކަށް ނުދެވޭނެ،"
އިލްޔާސް ލަބީބު
އިލްޔާސް އިތުރަށް ވިދާޅުވީ ގޯތި ދިނުމާއި އެ ގޯތީގައި ފްލެޓް އެޅުމާއި އަދި ފްލެޓް އެޅޭނެ ގޮތްތައް ހޯދައިދެވޭނީވެސް ޑިމޮކްރެޓްސްގެ ސަރުކާރެއްގައި ކަމަށެވެ. ސަބަބަކީ އެމަނިކުފާނަކީ ‘ފްލެޓް ދޮންބެ’ ގެ ދަރިވަރަކަށް ވާތީ ކަމަށް އިލްޔާސް ވިދާޅުވިއެވެ.
ޑިމޮކްރެޓްސް ނިކުތީ ރާއްޖެއަށް އިންގިލާބީ ބޮޑު ބަދަލެއް ގެންނަން ކަމަށާ ރެއާއި ދުވާލު ސައުވީސް ގަޑިއިރު މަސައްކަތް ކުރައްވާނީ އެ ބަދަލު ގެންނެވުމަށް ކަމަށް އިލްޔާސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
