މެދުރާއްޖެތެރެއަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ކުރައްވާ ރިޔާސީ ކެމްޕޭނު ދަތުރުފުޅުގައި ދ އަތޮޅު މާއެނބުދޫއަށް ވަޑައިގެންފި އެވެ.
އެމަނިކުފާނު މާއެނބޫދޫއަށް ވަޑައިގަތުމުން އެ ރަށުން ވަނީ ހޫނު މަރުހަބާއެއް ކިޔާފައެވެ. މާއެނބޫދޫއަކީ އާބާދީ ކުޑަރަށެއް ނަމަވެސް އެ ރަށުން ހޫނު މަރުހަބާއެއް ކިޔާފައިވާއިރު، ޑރ މުއިއްޒު ވަނީ ރައްޔިތުންނާއި ބައްދަލުކުރައްވާ އެ ރަށަށް ކޮށްދެއްވާނެ ބައެއް ކަންކަން އިއުލާނުކުރައްވާފަ އެވެ.
އެގޮތުން ޑރ މުއިއްޒު ވިދާޅުވީ މާއެނބޫދޫއަށް ދިމާވެފައިވާ އެންމެ ބޮޑު މައްސަލައަކީ ބިމުގެ ދަތިކަމުގެ މައްސަލަ ކަމަށެވެ. އެކަން ދާއިރާގެ މެމްބަރު ވެސް އެމަނިކުފާނުގެ ސަމާލުކަމަށް ގެނެސްފައިވާކަމަށް ޑރ މުއިއްޒު ވިދާޅުވި އެވެ.
އެއާއެކު އެމަނިކިފާނު ވިދާޅުވީ ބިމުގެ ދަތިކަމުގެ މައްސަލަ ޙައްލުކުރުމަށް ސަރުކާރުން މިހާރު ގެންގުޅޭ ސިޔާސަތަކީ، އެ މައްސަލައަށް ދާއިމީ ޙައްލެއް ލިބިގެންދާނެ ސިޔާސަތެއްކަމަށް ދެކިވަޑައިނުގަންނަވާ ކަމަށެވެ.
އެ މައްސަލަ ޙައްލުކުރުމަށް މާއެނބޫދޫގައި 30 ހެކްޓަރުގެ ބިން ހިއްކާނެ ކަމަށާއި، އަދި އޭގެ ތެރެއިން ބިންތައް ބޯހިޔާވަހިކަމަށް ޚާއްސަކުރައްވާނެކަމަށް ޑރ މުއިއްޒު ވިދާޅުވި އެވެ.
އޭގެ އިތުރުން އެމަނިކުފާނު ވިދާޅުވީ އެރަށަށް ދިމާވެފައިވާ މައްސަލަތައް ތައްޔިތުންގެ ޚިޔާލާއެކު ޙައްލުކޮށްދެއްވާނެ ކަމަށެވެ. ރައްޔިތުން އެމަނިކުފާނަށް އިތުބާރުކޮށް ރިޔާސީ އިންތިޚާބު ޕްރޮގްރެސިވް ކޮންގްރެސް ކޯލިޝަނަށް ކާމިޔާބުކޮށް ދިނުމަށް މަސައްކަތްޕުޅުކޮށްދެއްވުމަށް ޑރ މުއިއްޒު ވަނީ އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
