ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު މެދުރާއްޖެތެރެއަށް ކުރައްވާ ކެމްޕޭނު ދަތުރުފުޅުގައި ފ، ދ އަދި މ އަތޮޅުގެ ރަށްތަކަށް ވަޑައިގަތުމަށް ފަހު، ވ އަތޮޅުގެ ފުރަތަމަ މަންޒިލް ކެޔޮދޫއަށް ވަޑައިގެންފި އެވެ. 

ޑރ މުއިއްޒު ކެޔޮދޫއަށް ވަޑައިގަތުމާއި އެކު އެރަށުގައި ތިބި ޕީޕީއެމްގެ ސަޕޯޓަރުން ވަނީ އެމަނިކުފާނަށް ހޫނު މަރުހަބާއެއް ދަންނަވާފަ އެވެ. 

ޑރ މުއިއްޒު ވަނީ އެމަނިކުފާނަށް ވެރިކަން ލިބިވަޑައިގެންފި ނަމަ ކެޔޮދޫއަށް ކޮށްދެއްވާނެ ކަންކަން ހިއްސާކުރައްވާފަ އެވެ. އެގޮތުން ޑރ މުއިއްޒު ވިދާޅުވީ އެންމެ ޚާއްސަ އިސްކަމެއް ދެއްވާނީ ރަށުގެ ބިން ބޮޑުކުރުމަށް ކަމަށެވެ.

Advertisement

ކެޔޮދޫއަކީ ބިމުގެ ދަތިކަން ދިމާވެފައިވާ ރަށެއްކަން ރައްޔިތުން ވެސް ފާހަގަކުރާއިރު، އެ ކަންބޮޑުވުންތަކަށް ޙައްލު ހޯއްދަވާ ދެއްވާނެކަމަށް ޑރ މުއިއްޒު ވިދާޅުވި އެވެ. 

އެކަން ފާހަގަކުރައްވާ ޑރ މުއިއްޒު ވިދާޅުވީ ބިން ހިއްކާ، އެ ރަށުގެ ބިން ބޮޑުކޮށްދިނުމުގެ އިތުރުން ރަށަށް ބޭނުންވާ ބޯހިޔާވަހިކަމުގެ މައްސަލަ ޙައްލުކޮށްދެއްވާނެ ކަމަށެވެ. 

ޑރ މުއިއްޒު ގެންދަވަނީ އެމަނިކުފާނަށް ވެރިކަން ލިބިވަޑައިގަންނަވާއިރު ރައީސް އަބްދުﷲ ޔާމީން އަބްދުލްގައްޔޫމަށް އިންސާފު ނުލިބި، އެމަނިކުފާނު ޖަލުގައި ހުންނަވާން ޖެހިވަޑައިގެންފި ނަމަ، އެންމެ ފުރަތަމަ ކަމެއްގެ ގޮތުގައި ކުރައްވާނެ ކަމަކީ ރައީސް ޔާމީން މިނިވަން ކުރުމަށް ކަމަށެވެ. 

ރައްޔިތުންނަށް ތަރައްގީގެ މަޝްރޫއުތައް ހިންގުމުގައި އަމަލުކުރައްވާނީ ރައީސް ޔާމިނުގެ ސްޕީޑުކަމަށް ޑރ މުއިއްޒު ވިދާޅުވި އެވެ. އަދި އެމަނިކުފާނު ވަނީ ރައްޔިތުން އެމަނިކުފާނަށް އިތުބާރު ކުރެއްވުމަށް އެދިވަޑައިގެންފަ އެވެ. އަދި މި އިންތިޚާބަކީ ގައުމީ ފިކުރުގައި ވޯޓު ދޭ އިންތިޚާބަކަށް ހެއްދެވުމަށް ވެސް ޑރ މުއިއްޒު ވަނީ އެދިވަޑައިގެންފަ އެވެ.