ރައްޔިތުން އެދޭނަމަ އާބާދީތައް އެއްފަސްކުރެވިދާނެ ކަމަށް ޕީޕީއެމް ޕީއެންސީގެ ރިޔާސީ ކެންޑިޑޭޓް ޑރ މުޙައްމަދު މުޢިއްޒު ވިދާޅުވެއްޖެއެވެ.

ޑރ މުޢިއްޒު މިހެން ވިދާޅުވީ ރިޔާސީ ކެމްޕޭނަށް ވ އަތޮޅަށް ކުރައްވަމުން ގެންދަވާ ދަތުރުފުޅުގައި އެއަތޮޅު ތިނަދުއަށް ވަޑައިގެން އެރަށު ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ޑރ މުޢިއްޒު ވިދާޅުވީ ދެމެހެއްޓެނިވި ތަރައްޤީއެއް ހާސިލްކުރުމަށް ރައްޔިތުން އެދޭގޮތަށް ކަންކަން ކުރުމަކީ ޕީޕީއެމް ޕީއެންސީގެ ވިސްނުންކަމަށެވެ.

Advertisement

މީގެ އިތުރުން ޑރ މުޢިއްޒު ވިދާޅުވީ ރައްޔިތުން އެދޭނަމަ އެއް ރަށުން އަނެއްރަށަށް އާބާދީ އެއްފަސް ކުރުމަކީ ވެރިކަން ލިބިވަޑައިގެންފިނަމަ ކޮށްދެއްވާނެކަމެއްކަމަށެވެ.

ޑރ މުޢިއްޒު ވިދާޅުވީ ދެމެހެއްޓެނިވި ތަރައްޤީއެއް ހާސިލްކުރުމުގައި އެކަށޭނެ އާބާދީއެއް އޮތުމަކީ އެންމެ ގިނަ ފައިދާ ވާނެ ގޮތް ކަމަށެވެ. އެހެންނަމަވެސް އެއީ ރައްޔިތުން ކުރަން ބޭނުންވާ ކަމެއް ނޫން ނަމަ މަޖުބޫރުކޮށްގެން ސަރުކާރުން ކުރުމަކީ އެއްގޮތަކަށްވެސް ކޮށްގެން ވާނެ ކަމެއް ނޫން ކަމަށްވެސް ޑރ. މުއިއްޒު ވިދާޅުވިއެވެ.

ތިނަދޫގެ ރައްޔިތުން ޕީޕީއެމް ޕީއެންސީއަށް އިތުބާރުކޮށް ތާއީދު ކޮށްދޭނެކަމަށް އުންމީދު ކުރައްވާ ކަމަށް ޑރ މުޢިއްޒު ވިދާޅުވިއެވެ. އަދި އެކޯލިޝަން ކުރިއަށްދާނީ ރައްޔިތުންގެ އިތުބާރާއި ތާއިދާއި އެކުގައި ކަމަށް ޑރ މުޢިއްޒު ވިދާޅުވިއެވެ.

ވ ތިނަދޫގައި ވާހަކަ ދައްކަވަމުން ޑރ މުއިއްޒު ވިދާޅުވީ ރައްޔިތުން ދިރިއުޅެނީ އާބާދީގެ ގޮތުން ކުޑަރަށެއްގައި ކަމަށްވިޔަސް ނުވަތަ ވަރަށް ތޮއްޖެހިފައި އޮތް ރަށެއްގައިކަމަށްވިޔަސް އެ ރައްޔިތުން ބޭނުންވާ ގޮތްތައް ބަލާ އެގޮތަކަށް އެ ފުރުސަތު ހޯދައި ދިނުމަކީ ޢަދުލުވެރި އިންސާފުވެރި ވެރިކަމެއް ކުރާއިރު ކަންކުރާނެ ގޮތްކަމަށެވެ.

އެހެންކަމުން ތިނަދޫގެ ރައްޔިތުންވެސް ބޭނުންވާ އުންމީދުތައް ހާސިލްކޮށްދިނުމުގައި ދެވެން އޮތް އެންމެ ފުރިހަމަ މިނެއްގައި ސަރުކާރުން އިޖާބަ ދޭން ވާނެކަމަށާއި ރަށަށް ދިމާވެފައިވާ މައްސަލަތައް ހައްލުކޮށްދޭން ޖެހޭކަމަށް މުޢިއްޒު ވިދާޅުވިއެވެ.

ޑރ މުޢިއްޒުގެ ވާހަކަފުޅުގައި ތިނަދުއަށް ދިމާވެފައިވާ ކުނީގެ މައްސަލަ ހައްލުކުރުމަށް ކުނި މެނޭޖްކުރުމުގެ މަޝްރޫއެއް ކުރިއަށް ގެންދަވާނެކަމަށާއި ލަފާ ފުރުމުގެ ދަތިކަން ހައްލުކުރުމަށް ކުރެވެން ހުރި ކަންކަންވެސް ކޮށްދެއްވަވާނެ ކަމަށް ވިދާޅުވިއެވެ.

މީގެ އިތުރުން ވެރިކަން ލިބިއްޖެ ނަމަ ރަށް ގިރުމާއި ރަށުގެ ފަސްގަނޑު ހިމާޔަތް ކުރުމަކީ އެ ރަށުގައިވެސް ކުރާނެ މަސައްކަތެއްކަމަށް އޭނާ ވިދާޅުވިއެވެ.

ޑރ މުއިއްޒާއި ޕީޕީއެމް ޕީއެންސީގެ އިސް ބައެއް ލީޑަރުން އޮގަސްޓު 16 ވަނަ ދުވަހު ދ ކުޑަހުވަދޫއިން ފެއްޓެވި ދަތުރުފުޅުގައި މިހާރު ތިއްބެވީ  ވ އަތޮޅުގައެވެ. މިއަދު އެދަތުރުފުޅު ނިންމަވައި މާލެ ވަޑައިގަތުމަށް ވަނީ ހަމަޖެހިފައެވެ.