ސަރުކާރު ވެރިކަން ކުރާ މައި ޕާޓީ، އެމްޑީޕީ އުފެދުނު އަސާސްތަކާއި މިހާރު ދުރަށް ގޮސްފައިވާ ކަމަށާ، މި އެމްޑީޕީ ސަރުކާރާއި ދެކޮޅަށް ބެނާއެއް ދަމައިގެންވެސް ޚިޔާލުފާޅު ނުކުރެވޭ ކަމަށް، ޑިމޮކްރެޓްސްގެ ރިޔާސީ ކެނޑިޑޭޓް ގެ ތަރުޖަމާނު، އިމްތިޔާޒް ފަހުމީ (އިންތި) ވިދާޅުވެއްޖެއެވެ.
ޑިމޮކްރެޓްސް ގެ ތަރުޖަމާނުގެ ފަރާތުން މިއަދު ބޭއްވި ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން އިންތި ވިދާޅުވީ، ސަރުކާރެއްގެ ބޭނުމަކީ ހުރިހާ ބަޔަކަށްވެސް ހަމަހަމަ ކަމާއި އެކު ކެންޕެއިން ކުރުމުގެ ފުރުޞަތު ދިނުން ކަމަށެވެ.
މިސާލަކަށް ރަށަކަށް ރައީސުލްޖުމްހޫރިއްޔާ ވަޑައިގަންނަވާއިރު، މާލޭ ތިބޭހާ، ނުވަތަ އަތޮޅެއްގެ ތިބޭހާ ސިފައިންނާއި، ފުލުހުން ކުޑަކުޑަ ރަށެއްގެ އާބާދީއަށް ވުރެ އިތުރަށް ލައިގެން، އަދި ސުލްހަވެރިކަމާ އެކުގައި، އިހްތިޖާޖު ކުރަން އިދިކޮޅު ފަރާތްތަކުން ތިބީމާ، އެމީހުންގެ އަޑު، ރައީސުލްޖުމްހޫރިއްޔާ އަށް ނީއްވާ، ނުވަތަ މެސެޖު ދިނުމާއި ގާތަށްވެސް ނުދެވޭ ހިސާބަށް ޖަންގަލީ ތެރެއަށް ކޮށްޕަމުން ކޮށްޕަމުން ގޮއްސަ އަދި އަނިޔާވެރިކަމާއެކު، މީހުން ހިފައި ހައްޔަރު ކުރީމާ، އޮޕޮޒިޝަންސް އާ މެދު މިގޮތަށް އަމަލު ކުރުމަކީ ކުރެވިގެންވާނެ ކަމެއް ނޫން.
އިމްތިޔާޒް ފަހުމީ
އިންތި ވިދާޅުވީ، އިދިކޮޅުގެ އަޑުއެހުމަކީ ސަރުކާރުން ކުރަންޖެހޭ ކަމެއް ކަމަށެވެ. އެހެންނަމަވެސް، އެމްޑީޕީ ސަރުކާރެއްގައި ރައްޔިތުން ބަލަން ބޭނުން ނުވާނެ ކަންކަން މިހާރު ފެންނަމުންދާ ކަން ފާހަގަކުރައްވައި އިންތި ވިދާޅުވީ، މިހާރު އޮތް އެމްޑީޕީ އަކީ ކުރީގެ އެމްޑީޕީ ނޫން، ކަމަށާ އެ އެމްޑީޕީގެ ސިފަ ގެއްލިފައިވާ ކަމަށެވެ.
ހަމައެއާއެކު ބެނާއެއް، ސަރުކާރަށް ފާޑުކިޔައި، ރައީސުލްޖުމްހޫރިއްޔާ އަށް ފާޑުކިޔައި ރައްޔިތުން ދަމާލާ ބެނާއެއް، އެ ބެނާ ދަމައި ޝުޢޫރު ފާޅުކުރުމުގެ ހައްގެއް ނެތް މިހާރު. ފުލުހުން ފޮނުވައި އެ ނައްޓާލާ ކަންތައްތައް ކުރަމުންދާތަން އެބަ ފެނޭ. އެހެނީ ވީޑިއޯ ތަކުގައި ހެކިތަކާއި އެކު އެކަން ފެންނަން. މިއީ ވަރަށް ނާތަހުޒީބު ކަމެއް.
އިމްތިޔާޒް ފަހުމީ
އިންތި ވިދާޅުވީ، އިދިކޮޅުގެ އަޑު ކަނޑުވާލަމުންދަނީ، ސަރުކާރުން ދެވަނަ ދައުރެއް ހޯދައި، ވެރިކަމުގެ ލައްޒަތައްޓަކައި ކަމަށެވެ. ނަމަވެސް އެފަދަ ކަންކަން ކުރުމަކީ ގައުމު ފަހަތަށް ޖައްސާލުން ކަމަށާ، އެހެން އެކަން ނުކޮށް، އިދިކޮޅަށް ޝުޢޫރު ފާޅުކުރުމުގެ ފުރުސަތު ދޭން ޖެހޭ ކަމަށެވެ.
އިންތި މިފަދައިން ވިދާޅުވެފައި ވާއިރު، ރައީސް ޞާލިހު ކެންޕެއިނަށް ޏ. ފުވައްމުލަކަށް ވަޑައިގެންނެވުމުން ސަރުކާރުން ވަނީ އެމަނިކުފާނާއި ދެކޮޅަށް ކެންޕެއިން ކުރި މީހުން ހައްޔަރު ކުރަން ފުލުހުންނާއި ސިފައިން ނެރެ، ވިނައިގެ ތެރެއަށް އިހްތިޖާޖު ގެ ބައިވެރިން ވައްދައި އަނިޔާ ކޮށްފައެވެ. އަދި އެނޫން ރަށްރަށުގައި ވެސް އިހްތިޖާޖު ކުރާ ބައިވެރިންނަށް ހުރަށް އަޅައި، ސަރުކާރަށް ފާޑުކިޔާ ދަމާފައި ހުންނަ ބެނާތައް ފުލުހުން އަންނަނީ ނަގަމުންނެވެ.
Advertisement
This content is created and paid for by advertisers and does not involve Voice Journalists
