މާލެ އަތޮޅު ތުލުސްދޫ ގިނަ އަދަދެއްގެ ޒުވާނުން، އިދިކޮޅު ޕީޕީއެމާއި ގުޅިއްޖެއެވެ. 

ތުލުސްދޫ އިން ޕީޕީއެމާއި ގުޅުނު ޒުވާނުންގެ ފޯމުތައް ހަވާލުކޮށްފައިވަނީ އިދިކޮޅުު ޕީޕީއެމް/ޕީއެންސީ ވަގުތީގޮތުން ހިންގެވުމާއި ހަވާލުވެ ވަޑައިގެން ހުންނެވި ޕީއެންސީގެ ރައީސް އަބްދުއްރަހީމް އަބްދުالله އާއެވެ. 

ތުލުސްދޫގެ އިތުރުން ކ. ގުރައިދޫ އަށް ނިސްބަތްވާ ގިނައަދަދެއްގެ ޒުވާނުންވެސް ވަނީ ޕީޕީއެމާއި ގުޅި، މެމްބަރޝިޕް ފޯމުތައް އަބްދުއްރަހީމް އާއި އިދިކޮޅުު ރިޔާސީ ކެންޑިޑޭޓް ޑރ މުހައްމަދު މުއިއްޒު އާއި ރޭގެ ގުރައިދޫ ކެންޕެއިން ޖަލްސާގައި ހަވާލު ކުރައްވާފައެވެ. 

ރިޔާސީ އިންތިހާބުގެ ކެމްޕެއިނަށް އިދިކޮޅުގެ ޓީމުތައް މާލެ އާއި ރާއްޖެތެރޭގައި ހަރަކާތްތައް ހިންގަމުން އަންނަ އިރު، ޕާޓީއަށް މެންބަރުން އިތުރު ކުރުމަށްވެސް އެ ޕާޓީން އަންނަނީ ގިނަ މަސައްކަތް ތަކެއް ކުރަމުންނެވެ. 

އެގޮތުން، ޑރ. މުޢިއްޒު އާއި ރަނިންމޭޓް ހުސައިން މުހައްމަދު ލަތީފް ކުރައްވަމުންދާ ދަތުރުގެ ތެރެއިން ޕާޓީއަށް ވަންނަ މެންބަރުން އަންނަނީ ލީޑަރޝިޕާއި ފޯމު ހަވާލުކުރަމުން އަންނައިރު، ޕާޓީއާއި ގުޅެމުންދާ ބޭފުޅުންގެ ތެރޭގައި މަޝްހޫރު ވިޔަފާރި ވެރިންނާއި ސިޔާސީ އެކިއެކި ފަރާތްތައް ހިމެނެއެވެ.