ސެޕްޓެމްބަރ 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ ކެމްޕޭނު ދަތުރުފުޅުތައް މެދު ކަނޑާލުމަށްފަހު އަނެއްކާވެސް އަތޮޅު ދަތުރުފުޅުތައް ރައީސް އިބްރާހިމް މުޙައްމަދު ޞާލިޙް ފައްޓަވައިފިއެވެ.
ރައީސް ޞާލިޙް ކުރައްވަމުން ގެންދެވި ކެމްޕޭނު ދަތުރުފުޅު މެދުކަނޑައިލެއްވީ އަރިއަތޮޅަށް ކުރައްވަމުން ގެންދެވި ދަތުރުފުޅުގެ މެދު ތެރެއިންނެވެ. ރައީސް ޞާލިޙްގެ ކެމްޕެއިން ތަރުޖަމާނު މާރިޔާ އަޙްމަދު ދީދީ ވިދާޅުވެފައިވަނީ ރައީސް ޞާލިޙް ކެމްޕޭނު ދަތުރުފުޅު މެދުކަނޑައިލައްވައި މާލެ ވަޑައިގަތީ ސިއްޚީ ޙާލުކޮޅު ތަންނުދިނުމުގެ ސަބަބުން ކަމަށާއި ޑޮކްޓަރުގެ ހުއްދަ ލިބިލެއްވިހާ އަވަހަކަށް އަނެއްކާވެސް ދަތުރުތައް ފައްޓަވާނެ ކަމަށެވެ.
އެގޮތުން މިއަދު ރައީސް ޞާލިޙާއި އެމަނިކުފާނުގެ ޓީމުން ވަނީ ކެމްޕޭނު ދަތުރުފައްޓަވައިފައެވެ. މިއަދު ރައީސް ޞާލިޙްގެ ޓީމުން ދަތުރުފައްޓަވައިފައިވަނީ ބ.އަތޮޅަށެވެ.
އެ އަތޮޅުގެ ހަ ރަށަކަށް މިއަދު ރައީސް ޞާލިޙާއި ޓީމުން ވަޑައިގަތުމަށް ހަމަޖެހިފައިވާއިރު މިހާރުވަނީ ފުޅަދޫ އަށް ވަޑައިގެންފައެވެ. އެއަށް ފަހު ދެން ވަޑައިގަންނަވާނީ ފެހެންދޫ، ގޮއިދޫ، އޭދަފުށި، ހިތާދޫ، އަދި ތުޅާދޫ އަށެވެ. މީގެ ތެރެއިން ތުޅާދޫގައި މިރޭ ޖަލްސާ ބާއްވާ ގޮތަށް ވަނީ ހަމަޖެހިފައެވެ.
މީގެ އިތުރުން މާދަމާ އެމަނިކުފާނު މާޅޮސް، ދޮންފަނު، ކިހާދޫ، ކަމަދޫ، ކެންދޫ އަދި ދަރަވަންދޫއަށް ވަޑައިގަންނަވާނެއެވެ. އަދި ދަރަވަންދޫގައި ޖަގަހަ ބައްދަލުވުމެއް ބާއްވާނެއެވެ.
މީގެއިތުރުން މިއަދު ފެއްޓެވި ދަތުރުފުޅުގައި ރ.އަތޮޅުގެ ބައެއް ރަށްރަށަށްވެސް ވަޑައިގަންނަވާނެއެވެ.
Advertisement
This content is created and paid for by advertisers and does not involve Voice Journalists
