ބ.އަތޮޅުގައި ވަކިން އޮތް ތިން ރަށަކީ މުޅިންހެން ބާކީކޮށްފައި އޮތް ތިން ރަށް ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ބ.އަތޮޅަށް އެމަނިކުފާނާއި އެމަނިކުފާނުގެ ކެމްޕޭނު ޓީމުން ކުރައްވަމުންގެންދަވާ ދަތުރު ފުޅުގައި އެއަތޮޅު ފުޅަދުއަށް ވަޑައިގެން އެރަށު ރައްޔިތުންނާއި ބައްދަލު ކުރައްވައި ވާހަކަދައްކަވަމުންނެވެ.

"މިއީ ކުޑަ އާބާދީއެއް ދިރިއުޅޭ ރަށެއް، އަދި މިއަތޮޅުގަ މިހިމެނޭ ވަކިން މިއޮތް ތިން ރަށަކީ މީގެ ކުރީ ޒަމާންތަކިގައި މުޅިންހެން އެކަހެރި ކޮށްފައި އޮތް ތިންރަށް، އަދި މިރަށްރަށަށް ބޭނުންކުރަމުންދިޔައީވެސް އެކި ސަރުކާރުތަކުން އެއީ ދައުލަތުން ސަރުކާރުތަކުން އެކަހެރިކުރާ މީހުން ފޮނުވާލާ ރަށްރަށެއްގެ ގޮތުގައި، ވަރަށް އިހާނެތިކޮށް މިރަށްރަށާއި ދޭތެރޭގައި ކަންތައް ކުރަމުންގެންދަނީ" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ ޒަމާންތައް ބަދަލުވެއްޖެ ކަމަށާއި، މިރާއްޖޭގައި ވެރިކަން އެތައްޒަމާނެއް ވަންދެން ކޮށް ނިމިއްޖެ ކަމަށާއި، އެމަނިކުފާނަކީ ރާއްޖޭގެ 101 ވަނަ ވެރިމީހާ ކަމަށެވެ. ނަމަވެސް އެމަނިކުފާނު ފިޔަވައި އެހެން އެއްވެސް ވެރިއަކަށް ފުޅަދޫ ފަދަ ކުދި ރަށްރަށް ފެނިފައިނުވާ ކަމަށް ރައީސް ޞާލިޙް ވިދާޅުވިއެވެ.

މީގެއިތުރުން ރައީސް ޞާލިޙް ވިދާޅުވީ މީގެކުރީގައި ރައްޔިތުން ބޭނުން ކުރަމުން ދިޔައީ ވެރިންގެ މުހުތާދުތައް ފުއްދުމަށް ކަމަށެވެ. ނަމަވެސް އެމްޑީޕީގެ 2018 ވަނައަހަރުގެ ސިޔާސަތަކަށް ވީ ކުޑަރަށެއް ބޮޑުރަށެއް ތަފާތުކުރުމެއް ނެތި ހުރިހާ ރައްޔިތުންނަށް އަސާސީ ޚިދްމަތްތައް ފޯރުކޮށްދިނުން ކަމަށެވެ.

ރައީސް ވިދާޅުވީ އެމްޑީޕީގެ އެސިޔާސަތުތައް ތަންފީޒުވަމުންދާ ކަމުގެ އެންމެ ބޮޑު ހެއްކަކީ ފުޅަދޫ ކަމަށެވެ.

ރައީސް ޞާލިޙް ވިދާޅުވީ އެމަނިކުފާނު ޤަބޫލުކުރެއްވީ ފުޅަދޫ ފަދަ ކުދިރަށްރަށަކީވެސް އިޤްތިޞާދުގައި ބޮޑު ހިއްސާއެއް ކުރެވޭނެ ފަދަ ރަށްތަކެއް ކަމުގައި ކަމަށެވެ.

"މިރަށަށް ފޭބުމުން މިލިބޭ ހިތްހަމަޖެހުން އަޅުގަނޑުމެން ކޮންމެ މީހަކަށްވެސް އެބަ އިޙްސާސް ކުރެވޭ، މިތާ އުޅެން ބޭނުން ނުވާނީ ކާކުތޯ؟، މިއީ އުފާވެރި މާހައުލެއް، އެހެންނަމަވެސް އުޅެވޭނެ ގޮތެއް ސަރުކާރުތަކުން ދައްކާދީފައެއް ނެތް، ފަސޭހައިން އާދެވެން އެބަޖެހޭ، ސާފު ބޯފެން ލިބެޖެހޭ، ކުދިންނަށް ކިޔަވައިދެވެން ޖެހޭ، ސިއްޚީ ޚިދްމަތް އެބަ ލިބެންޖެހޭ، އެނެތި ކިހިނެއްތޯ ދިރިއުޅޭނީ" ރައީސް ވިދާޅުވިއެވެ.

ރައީސް ވިދާޅުވީ އެމަނިކުފާނުގެ ސަރުކާރެއްގައި ކުރިއަށް އޮތް ހަތަރުއަހަރެއްހާ ދުވަސް ތެރޭގައި ފުޅަދޫގެ އިޤްތިސާދު ވަރަށް ބޮޑަށް ކުރިއަރައިދާނެކަމަށެވެ.

ރައީސް ޞާލިޙާއި ޓީމުން ބ އަތޮޅަށް ކުރައްވަމުން މިގެންދަވާ ދަތުރުގައި މިއަދު އެއަތޮޅުގެ ފުޅަދޫ، ފެހެންދޫ، ގޮއިދޫ، އޭދަފުށި، ހިތާދޫ، އަދި ތުޅާދޫ އަށެވެ. މީގެ ތެރެއިން ތުޅާދޫގައި މިރޭ ޖަލްސާ ބާއްވާ ގޮތަށް ވަނީ ހަމަޖެހިފައެވެ.