ކުރިއަށް އޮތް ފަސް އަހަރުވެސް ރައްޔިތުންނަށް ހެޔޮހިތުން ކަމެއް ކޮށްދޭނީ އެމްޑީޕީ އިން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ރިޔާސީ ކެމްޕޭނަށް ބ އަތޮޅު ފެހެންދުއަށް ވަޑައިގެން އެރަށު ރައްޔިތުންނާއި ބައްދަލު ކުރައްވައި ވާހަކަފުޅު ދައްކަވަމުންނެވެ.

"ކުރިއަށް އޮތް ދައުރުގައިވެސް، ކުރިއަށް އޮތް ފަސް އަހަރުދުވަހުގެ ތެރޭގައިވެސް ރައްޔިތުންނަށް ހެޔޮހިތުން ކަމެއް ކޮށްދޭނެ ޕާޓީއަކީ އެމްޑީޕީ، އަޅުގަނޑުމެން މިތަނަށް އައިސް މިތިބީ ވަޢުދުތަކެއްވެ ވަޢުދުތަކެއް ފުއްދައިގެން، ކުރިމަތިވި ދަތިތަކާއި އެކުގައިވެސް، މިރަށްރަށުގެ ރައްޔިތުން އެކަން ޤަބޫލުފުޅު ކުރައްވާނެ، ބަލާލި ކޮންމެ ދިމާއަކުން ރާއްޖޭގެ ކޮންމެ ރަށަކުންވެސް އެކަން ފެނިވަޑައިގަންނަވާނެ" ރައީސް ޞާލިޙް ވިދާޅުވިއެވެ.

ރައީސް ޞާލިޙް ވަނީ އިދިކޮޅު ކެންޑިޑޭޓަށާއި ކެންޑިޑޭތުގެ މެނިފެސްޓޯއަށް ވަރަށް ބޮޑަށް ވަނީ ފާޑު ވިދާޅުވެފައެވެ.

"ރިޔާސީ އިންތިޚާބުގެ އެންމެ ފަހުދުވަސްކޮޅު އަޅުގަނޑުމެން ގުނަމުންމިދަނީ، ތަފާތު ވަޢުދުތައް ކެންޑިޑޭޓުން ވާނެ، މީގަ އަޅުގަނޑުމެން ކުޑަކޮށްވެސް ބަލާލަން ޖެހޭ ބަޔަކަށް ތިބޭނީ ޕީއެންސީ، ދެން އަލަށް އައިސްގެން އުޅޭ ޕާޓީއެއްގެ ނަން މިދެންނެވީ، ޕީއެންސީއިން އެހުށައަޅާ މެނިފެސްޓޯގަ އެކިޔާ އެއްޗެއް ކޮންމެވެސް ވަރަކަށް އަޅުގަނޑުމެން ބަލާލަންވާނެ، ދެން ނުފެނޭ މާބޮޑު ވިޝަނެއް އޮތް މާބޮޑު ސިޔާސަތުތަކެއް އޮވެގެން ކުރިމަތިލައްވައިގެން ހުރި ބޭފުޅެއް" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ ރާއްޖޭގެ ރަށްރަށުގެ އަސާސީ ޚިދްމަތް ތައް ފުރިހަމަ ކޮށްދެއްވާނެ ކަމަށް އިދިކޮޅު ކެންޑިޑޭޓު ރޭގައި ވިދާޅުވިކަމަށެވެ. އަދި މިއޮތް ހުރިހާ ދުވަހު ކުރެއްވީ ކޮންކަމެއްތޯ ރައީސް ވަނީ ސުވާލު ކުރައްވާފައެވެ.

ރާއްޖޭގެ ޕްލޭނިންގ މިނިސްޓަރަކަށް އެންމެ ގިނަ ދުވަހު ހުންނެވީ އެބޭފުޅާކަމަށާއި، އޭރު ރަށްރަށުގައި ކަރަންޓާއި ނަރުދަމާ އަދި ފެނުގެ ނިޒާމު ނެތްތަން ފެނިނުލައްވާތޯ ރައީސް ޞާލިޙް ވަނީ ވިދާޅުވެފައެވެ.

އިދިކޮޅު ކެންޑިޑޭޓު ޑރ މުޢިއްޒު ގުޅީފަޅުން ދޫކުރާ ގޯތިތައް ހައްދަވައިދެއްވާނެ ކަމަށް ވިދާޅުވި ވިދާޅުވުމަށް ފާޑު ވިދާޅުވަމުން ރައީސް ޞާލިޙް ވިދާޅުވީ ޑރ މުޢިއްޒު މިނިސްޓަރު ކަމުގައި ހުންނެވައިގެން ކުރީ ސަރުކާރުން ގުޅީފަޅުން މީހުނަށް ދިން ގޯތިތައް ނެންގެވީ ކަމަށާއި، އޭގެ ބަދަލުވެސް ނުދެއްވާ ކަމަށެވެ. އަދި އޭގެބަދަލު ރައްޔިތުންނަށް މިސަރުކާރުން ދޭން ޖެހުނު ކަމަށްވެސް ރައީސް ޞާލިޙް ވިދާޅުވިއެވެ.

ރައީސް ޞާލިޙް ކެމްޕޭނަށް ކުރައްވަމުން މިގެންދަވާ ދަތުރުފުޅުގައި އެމްޑީޕީ ކޯލިޝަންގައި ހިމެނޭ ޢަދާލަތު ޕާޓީއާއި އެމްޑީއޭގެ އެންމެ އިސް ދެލީޑަރުން ބައިވެރިވެ ވަޑައިގަންނަވައެވެ.