ކުރިއަށް އޮތް ދައުރުގެ ވެސް ސިޔާސަތަކީ ޙިޔާލު ފާޅުކުރުމަށް މިނިވަންކަންދީގެން، ރައްޔިތުންނަށް ވީ ތަރައްޤީގެ ވަޢުދުތައް ފުއްދުން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް  ޞާލިޙް މިހެން ވިދާޅުވީ ބ އަތޮޅު ގޮއިދޫގައި ރައްޔިތުންނާއި ބައްދަލުކުރެއްވުމަށް ބޭއްވެވި ބައްދަލުވުމުގައި ވާހަކަދައްކަވަމުންނެވެ.

"މިގޮއިދުއަށާއި ފުޅަދުއަށާއި ފެހެންދުއަށް ގެނެވުނު ބަދަލު ތިބޭފުޅުންނަށްވެސް ފެންނާނެ، ހަޤީޤަތުގައި އަޅުގަނޑުމެންނަށް އެބަދަލު ގެނެވުނީ އެމަސައްކަތްތައް ކުރެވުނީ ސިޔާސީ ހަލަބޮލިކަމުގެ ތެރެއަށް އެވާދަވެރިކަމުގެ ތެރެއަށް ނުގޮސް ހަމައެކަނި އަޅުގަނޑުމެން ވީ ވަޢުދުތައް ފުއްދުމަށް ޢަޒުމް ކަނޑައަޅައިގެން މަސައްކަތް ކުރީމަ، އެހެންނޫންނަމަ އެމަސައްކަތްތަކެއް ނުކުރެވުނިސް، ރާއްޖޭގެ އެކިކަންކޮޅުތަކުގައި ހިނގައި ނިމެމުންއެދާ މަސައްކަތްތަކުގެ ނަތީޖާއަކީ އެއީ، އަޅުގަނޑުމެނަށް ކެބިނެޓާ ކުންފުނިތަކާއި އެކީގައި މިމަސައްކަތްތައް ކުރެވުނީ އެސަބަބަށްޓަކައި" ރައީސް ޞާލިޙް ވިދާޅުވިއެވެ.

Advertisement

ރައީސް ޞާލިޙް ވިދާޅުވީ ވެރިކަމުގެ ދައުރެއް ނިންމަވާ އެލައްވަނީ  ސިޔާސީ ބޭނުމަކު އެއްވެސް ބޭފުޅަކު ހައްޔަރުނުކޮށް ބަންދުނުކޮށް ކަމަށެވެ. އަދި އެއްވެސް ނޫސްވެރިޔަކަށް ބިރުދެއްކުމެއް ނެތި ކަމަށާއި، އެއްވެސް ނޫހެއްވެސް އެއްވެސް ޓީވީ ޗެނަލެއް ބަންދުނުކޮށް ޖޫރިމަނާ ނުކޮށް ކަމަށެވެ.

"ކުރިއަށް އޮތް ތަނުގައިވެސް އަޅުގަނޑުމެންގެ ސިޔާސަތަކީ  ޚިޔާލުފާޅު ކުރުމާއި ނޫސްވެރިކަމާއި ސިޔާސީ ހަރަކާތައް ޖާގަދީގެން ރައްޔިތުންނަށް އަޅުގަނޑުމެން ވީ ވަޢުދުތައް ފުއްދުމުގައި ކުރިއަށް ދިއުން" ރައީސް ޞާލިޙް ވިދާޅުވިއެވެ.

ރައީސް ގޮއިދޫ ރައްޔިތުންނާއި ވާހަކަފުޅު ދައްކަވަމުން ވިދާޅުވީ ކަރަންޓުގެ މައްސަލައަކީ ގޮއިދުއަށް ދިމާވެފައިވާ ވަރަށް ބޮޑު މައްސަލައެއް ކަމަށާއި އެމައްސަލަ ހައްލު ކުރުމަށް ލަސްވެސް ވެއްޖެ ކަމަށެވެ.

އަދި ލަސްތަކެއްނުވެ އެރަށު އިންޖީނުގެ މީހުން ދިރިއުޅޭ ސަރަހައްދާއި ދުރަށް ބަދަލުކޮށް ރަނގަޅު ފެންވަރެއްގައި އެރަށަށް ކަރަންޓު ލިބޭނެގޮތައް އެކަމުގެ ޢަމަލީ މަސައްކަތް ފަށައިގަންނާނެ ކަމަށެވެ.  އަދި އެރަށުގެ ބަނދަރު ބޮޑުކޮށް ޒަމާނީ ފެންވަރަށް ހަދައިދެއްވާނެ ކަމަށާއި ކުރިއަށް އޮތް ދައުރުތެރޭގައި އެކަންނިންމައި ދިނުމަށް މިއަދު ވަޢުދުވެލައްވާ ކަމަށް ރައީސް ޞާލިޙް ވިދާޅުވިއެވެ.

ބ.އަތޮޅުގެ ހަ ރަށަކަށް ރައީސް ޞާލިޙާއި ޓީމުން މިއަދު ވަޑައިގަތުމަށް ވަނީ ހަމަޖައްސައިފައެވެ. އެގޮތުން މިހާރު ވަނީ ފުޅަދޫ، ފެހެންދޫ، ގޮއިދޫ އަދި އޭދަފުއްޓަށް ވަނީ ވަޑައިގެންފައެވެ. މީގެ އިތުރުން ހިތާދޫ، އަދި ތުޅާދޫ އަށްވެސް ވަޑައިގަތުމަށް ވަނީ ހަމަޖެހިފައެވެ. މީގެ ތެރެއިން ތުޅާދޫގައި މިރޭ ޖަލްސާ ބާއްވާ ގޮތަށް ވަނީ ހަމަޖެހިފައެވެ.

މީގެ އިތުރުން މާދަމާ އެމަނިކުފާނު ބ.އަތޮޅު މާޅޮސް، ދޮންފަނު، ކިހާދޫ، ކަމަދޫ، ކެންދޫ އަދި ދަރަވަންދޫއަށް ވަޑައިގަންނަވާނެއެވެ. އަދި ދަރަވަންދޫގައި ޖަގަހަ ބައްދަލުވުމެއް ބާއްވާނެއެވެ.