އަންނަ އަހަރަށް ފާސްކުރެވޭ ބަޖެޓާއެކު ޖެނުއަރީމަހުން ފެށިގެން ގިނަ ދާއިރާތަކެއްގެ މުސާރަ ބޮޑުކޮށްދިނުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ވައުދުވެވަޑައިގެންފިއެވެ. 

މިރޭ ބ ތުޅާދޫގައި ކުރިއަށްދާ އެ މަނިކުފާނުގެ ރިޔާސީ އިންތިހާބުގެ ކެމްޕެއިން ޖަލްސާގައި ވާހަކަ ދައްކަވަމުން ރައީސް ޞާލިޙް ވިދާޅުވީ، އެމްޑީޕީގެ ޕޭ ހަރމަނައިޒޭޝަން ނިމިގެންދާއިރު ސަރުކާރުގައި މަސައްކަތް ކުރާ ހުރިހާ މުވައްޒަފުންގެ މުސާރަ ބޮޑުވެގެންދާނެކަމުގައެވެ. 

އެގޮތުން އަންނަ ދައުރެއްގައި ސިފައިންނާއި ފުލުހުންގެ އިތުރުން ޖުޑިޝަރީގެ މުވައްޒަފުންނާއި ކަސްޓަމްސް، އިމިގްރޭޝަން، ކަރެކްޝަންސް، ސިވިލްސާވިސް ގައި ބާކީ ހިމެނޭ ހުރިހާ މުވައްޒަފުން، އިމާމުންގެ އިތުރުން ކައުންސިލް އިދާރާތަކުގައި މަސައްކަތްކުރާ ސިވިލްސަރވެންޓުންގެ މުސާރައަށް ބަދަލު ގެނައުމަށް މިހާރު ނިންމާފައިވަނީ ކަމުގައި ރައީސް ވަނީ ވިދާޅުވެފައެވެ. 

މީގެ އިތުރުން ރައީސްގެ ވާހަކަ ފުޅުގައި މިރޭ ވަނީ ތުޅާދޫއަށް ދެން އަންނަ ދައުރެއްގައި ކޮށްދެއްވާނެ ކަންތައްތައް އިއުލާން ކުރައްވައިފައެވެ. 

އެގޮތުން އެރަށުގައި އިތުރު 100 ހައުސިންގް ޔުނިޓް އެޅުމާއި ބަނދަރުގެ ނެރުގެ މައްސަލަ ހައްލުކޮށް ބޭރު ތޮށި ބޭނުން ކުރެވޭ ގޮތް ހެދުމާއި، އެއަރޕޯޓެއް އެޅުމުގެ އިތުރުން އެރަށުގެ ބޮޑެތި ހުރިހާ ރަށްތަކެއްގައި ތާރު އަޅުއްވައިދޭނެކަމަށް ރައީސް ޞާލިޙް ވަނީ ވައުދުވެ ވަޑައިގެންފައެވެ. 

ރައީސް އިބްރާހިމް މުހައްމަދު ޞާލިހްގެ ރިޔާސީ ކެމްޕެއިންގައި ގިނަ ރަށްތަކަކަށް ވަޑައިގެން ދެވަނަ ދައުރެއް ލިބިވަޑައިގެންފި ނަމަ ކޮށްދެއްވާނެ ގިނަ ކަންތައްތަކެއްގެ ވައުދުތަކެއް އަންނަނީ ވެވަޑައިގަންނަވަމުންނެވެ.