މިސަރުކާރާއި މެދު ރައްޔިތުންގެ މާބޮޑު ކަންބޮޑުވުމެއް ނެތް ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ ބ.ކިހާދޫއަށް ކުރެއްވެވި ޒިޔާރަތުގައި އެރަށުގައި ބޭއްވި ކެމްޕޭނު ހަރަކާތުގައި ވާހަކަފުޅު ދައްކަވަމުންނެވެ.
"އަޅުގަނޑުމެން މިކުރާ ދަތުރުތަކުން ވަރަށް ބޮޑަށް ސާފުވާއެއް ކަމެއް އެބެއް، ރައްޔިތުންގެ މާބޮޑު ކަންބޮޑުވުންތަކެއް މިސަރުކާރާއި މެދުގައި ނެތްކަން، އަރާ ފައިބާ ކޮންމެ ރަށަކުން ސިޔާސީ ވަކި ބަޔަކު އަމިއްލަ ވަކި ބޭނުމެއްގައި ކޮށްލާ ބައެއް ކަންތައް ބައެއް ރަށްރަށުން ފެނޭ، އެހެންނަމަވެސް ޖުމްލަކޮށް އަޅުގަނޑަކަށް އަދިއެއް ނުފެނޭ އެއްވެސް ރަށަކުންނެއް މިސަރުކާރާއި ދޭތެރޭގައި އެހާބޮޑަށް ހިތްހަމަނުޖެހިގެން އުޅޭތަނެއް"
ރައީސް ޞާލިޙް ވިދާޅުވިއެވެ.
ރައީސް ޞާލިޙް ވިދާޅުވީ ކޮންމެ ބައެއްގެވެސް ހިތްހަމަނުޖެހޭ ކަންތައްތަކެއް ހުރެދާނެ ކަމަށާއި، އެއްވެސް މީހަކީ ހުރިހާ ކަމެއް 100 ޕަސެންޓް ރަނގަޅަށް ކުރެވޭނެ މީހެއް ނޫން ކަމަށެވެ.
ރައީސް ވިދާޅުވީ ރިޔާސީ އިންތިޚާބުގައި ރައްޔިތުން ނިންމާ ނިންމުމަކީ ވަރަށް މުހިންމު ނިންމުމެއް ކަމަށެވެ.
ރައީސް ޞާލިހް އިތުރަށް ވިދާޅުވިގޮތުގައި ކުރީގައި ނުކުންނަނީ އިދިކޮޅުން އެންމެން އެކުވެގެން އެއިރެއްގައި އޮންނަ ސަރުކާރެއް ވައްޓާލުމަށް ކަމަށާއި، ނަމަވެސް އެއާއި ޚިލާފަށް މިހާރު އެޖޯޝު ނެތް ކަމަށް ރައީސް ޞާލިޙް ވިދާޅުވިއެވެ.
ރައީސް ވިދާޅުވީ ރައްޔިތުން މިވެރިކަމާއި މެދު މާބޮޑަކަށް ހިތްހަމަނުޖެހިގެން އުޅޭތަން ނުފެންނަކަމަށެވެ.
ބ.އަތޮޅަށް ރައީސް ކުރައްވާ ދަތުރުފުޅަށް ފަހު ރ.އަތޮޅުގެ ބައެއް ރަށްރަށަށް ވެސް ވަޑައިގަތުމަށް ވަނީ ހަމަޖެހިފައެވެ.
Advertisement
This content is created and paid for by advertisers and does not involve Voice Journalists
