ށ ކަނޑިތީމު ކައިރީގައި އެއާޕޯޓެއް އަޅައި، އެރަށު ބޮޑެތި މަގުހެދުން ހިމެނޭހެން ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒުގެ ވެރިކަމުގައި ކަނޑިތީމަށް ކޮށްދެއްވާނެ ކަންކަން ހާމަކުރައްވައިފިއެވެ. 

ރިޔާސީ ކެންޕެއިނަށް ށ އަތޮޅަށް ކުރައްވަމުންދާ ދަތުރުފުޅުގައި އެ އަތޮޅު ކަނޑިތީމަށް ވަޑައިގެން ވާހަކަ ދައްކަވަމުން މުޢިއްޒު ވަނީ އޭނާގެ ވެރިކަމެއްގައި އެރަށަށް ކޮށްދެއްވާނެ ކަންކަން ހާމަ ކުރައްވާފައެވެ.  

އެގޮތުން ވިދާޅުވީ، ކުނި މެނޭޖުކުރުމާއި، ރަށްގިރުމުގެ މައްސަލަ ފަދަ ކަންކަން ހައްލުކޮށްދިނުމަކީ ވެރިން ކޮށްދޭންޖެހޭ އަސާސީ ކަމެއް ކަމަށެވެ. އަދި އެކަމަށްޓަކައި ކޮންމެ ރަށަކަށް ވަކިވަކިން ވަޢުދުވެވަޑައިނުގެންނެވި ނަމަވެސް، އެއީ އަސާސީ ކަމެއް ކަމުގައި ދެކިގެން އެކަން ކަނޑިތީމަށާއި އެހެން ރަށްރަށަށްވެސް ކޮށްދެއްވާނެ ކަމަށް މުޢިއްޒު ވިދާޅުވިއެެވެ. 

މީގެ އިތުރުން މުޢިއްޒު ކަނޑިތީމަށް ވެވަޑައިގެންނެވި ވަޢުދުތަކުގެ ތެރޭގައި؛ 

1) ރައްޔިތުން އެދޭގޮތަށް ކަނޑިތީމު ބަނދަރު ބޮޑުކޮށް ގެންނަންޖެހޭ ބަދަލުތައް ގެނައުން  

2) ސިއްހީ ޚިދުމަތް ފުޅާކޮށް ކަނޑިތީމު ސިއްހީ މަރުކަޒު ވަރުގަދަ ކުރުން. 

3) ކަނޑިތީމު ބޮޑެތި މަގުތައް ހެދުން.

4) ބޭންކުގެ ފުނަދޫ ބްރާންޗުގެ ސެލް އެއް ގާއިމް ކުރުން. 

5) ބޮނާފަރު ފަޅު ހިއްކައިގެން ރިސޯޓެއް ހެދުން

6) ކުޑަދޫ އިން އިގްތިޞާދީ ފައިދާ ހޯދޭނެ މަގު ފަހިކޮށްދިނުން.

7) އަލަށް އާބާދު ކުރެވުނު ސަރަހައްދަށް ކަރަންޓާއި ނަރުދަމާގެ ޚިދުމަތް ދިނުން

8) ޒުވާނުންގެ މަރުކަޒެއް ގާއިމް ކުރުން

މީގެ އިތުރުން ވެސް މުޢިއްޒު ވިދާޅުވީ، އެ ދާއިރާގެ ރަށެއް ކަމުގައިވާ ބިލެއްފަހި ފަޅު ހިއްކައި އެއާޕޯޓް އެއް އަޅައިދެއްވާނެ ކަމަށެވެ. އަދި އެއާއެކު ދަތުރުފަތުރު ކުރުމަށް ފަސޭހަވެ އެ ސަރަހައްދުގައި ފަތުރުވެރިކަން ކުރިއަރައި ދާނެ ކަން ވެސް ފާހަގަ ކުރެއްވި އެވެ.