ވެވަޑައިގަންނަވަމުން އަންނަ ވަޢުދު ތަކަކީ ހަމަ ހުންނަވާފައިވާ ވަޢުދު ތަކެއް ނޫން ކަމަށް ވިދާޅުވެ ބ.ކުޑަރިކިލަށް ތަރައްޤީގެ ގިނަ ވަޢުދުތަކެއް ރައީސް އިބްރާހިމް މުޙައްމަދު ޞާލިޙް ވެވަޑައިގެންފިއެވެ.

ބ.އަތޮޅަށް ކުރައްވަމުން ދިޔަ ކެމްޕޭން ދަތުރުގެ އެންމެ ފަހު މަންޒިލެއްގެ ގޮތުން ކުޑަރިކިލަށް ވަޑައިގެން ރައީސް ޞާލިޙް ވަނީ އެރަށުގެ ރައްޔިތުންނާއި ބައްދަލު ކުރައްވައި ވާހަކަފުޅު ދައްކަވައިފައެވެ.

ކުޑަރިކިލު ރައްޔިތުންނާއި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ އެރަށުގެ ސިއްޚީ މަރުކަޒުގެ ޚިދްމަތް އިތުރަށް ފުޅާކޮށް ރައްޔިތުންނަށް ބޭނުންވާ ވަޞީލަތްތައް ހެލްތް ސެންޓަރުގައި ޤާއިމް ކޮށްދެއްވާނެ ކަމަށެވެ.

Advertisement

މީގެއިތުރުން އެރަށު ސްކޫލަށް ބޭނުންވާ އިތުރު ވަޞީލަތްތައް ހޯދައިދީ ސްކޫލްގެ މަލްޓިޕަރޕަސް ހޯލް އަޅައިދޭނެކަމަށް ރައީސް ވިދާޅުވިއެވެ. އަދި ޒުވާނުން ބޭނުންވާގޮތައް ވަޞީލަތްތަކާއި އެކު ޒުވާނުންގެ މަރުކަޒެއް އަޅައިދެއްވާނެ ކަމަށް ރައީސް ޞާލިޙް ވިދާޅުވިއެވެ.

ހަމައެއާއި އެކު ރައްޔިތުން ބޭނުންވާގޮތައް ބޭންކިންގެ ޚިދްމަތް ފަސޭހަކަމާއި އެކު ފޯރުކޮށްދިނުމަށްޓަކައި އޭޓީއެމް އެއް ޤާއިމްކޮށްދެއްވާނެ ކަމަށާއި، ރަށުގެ ކަރަންޓަށް ދިމާވެފައި އޮތް ދަތިކަން ހައްލުކޮށްދިނުމަށް ޓަކައި މިހާރަށްވުރެ ފަސޭހައިން އެޚިދްމަތް ފޯރުކޮށްދިނުމަށް ފެނަކަ މެދުވެރިކޮށް އެމަސައްކަތް ކޮށްދެއްވަވާނެ ކަމަށް ރައީސް ވިދާޅުވިއެވެ.

އެރަށުގެ ޒުވާނުން އެދޭގޮތައް އެރަށުގެ ފުޓްބޯޅަ ދަނޑު އަޅައިދެއްވާނެ ކަމަށް ރައީސް ޞާލިޙް ވިދާޅުވިއެވެ. އަދިހަމަ އެރަށުގެ ރައްޔިތުމން އެދިފައިވާ ގޮތައް އެރަށުގައި ކުޑަކުދިންގެ ޕާކެއް އަޅައިދެއްވާނެ ކަމަށްވެސް ރައީސް ވިދާޅުވިއެވެ.

"އަޅުގަނދުމެންގެ މިވަޢުދުތަކަކީ ހަމަމިހެން ތިބެފަ ބުނެލާ އެއްޗެއްނޫން، އަޅުގަނޑުމެންގެ ބައެއް އިދިކޮޅު ކެންޑިޑޭޓުން ދައްކާ ވާހަކައެއް އެއީ، ހަމައަރާގޮތައް އަރާ ވަޢުދުތަކެއް ވަމުންނޭ އެދަނީ، އެއްގޮތަކަށްވެސް ބަލައެއް ނުލައޭ" ރައީސް ޞާލިޙް ވިދާޅުވީއެވެ.

ރައީސް ވިދާޅުވީ ވެރިކަމަށް ވަޑައިގަތީ ރައްޔިތުންނަށް ޚިދްމަތް ކޮށްދެއްވުމަށް ޓަކައި ކަމަށެވެ. ރައްޔިތުން ޓެކްސް ދައްކަނީ އެމީހުންނަށް ލިބެންޖެހޭ ޚިދްމަތްތައް ފޯރުކޮށްދޭނެ ކަމަށް ކަމަށާއި، އެއީ ސަރުކާރުން ކޮށްދޭން ޖެހޭ ކަމެއް ކަމަށް ރައީސް ޞާލިޙް ވިދާޅުވިއެވެ. އަދި އެފައިސާ އެހެން ކަންކަމަށް ބޭނުން ކުރެވިގެން ނުވާނެ ކަމަށްވެސް ރައީސް ވަނީ ވިދާޅުވެފައެވެ.

ބ.އަތޮޅަށް ކުރައްވަމުން ގެންދެވި ކެމްޕޭނު ދަތުރުފުޅަށް ފަހު މިހާރު ރައީސް ޞާލިޙާއި ޓީމު ވަނީ ރ.އަތޮޅަށް ވަޑައިގެންފައެވެ.