ތ ވިލުފުށީގައި ހޮސްޕިޓަލަކާއި އެއަރޕޯޓެއް އަޅަން ވަޢުދުވީ އެމްޑީޕީ އިން ކަމަށާއި، އެވަޢުދު ފުއްދާނީވެސް އެމްޑީޕީ ސަރުކާރުން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ރިޔާސީ އިންތިޚާބުގެ ކެމްޕޭނަށް ތ އަތޮޅަށް މިއަދު ފެއްޓެވި ދަތުރުފުޅުގައި ތ ވިލުފުއްޓަށް ވަޑައިގެން އެރަށުގައި އޮތް ބައްދަލުވުމެއްގައި ވާހަކަފުޅު ދައްކަވަމުންނެވެ.

ރައީސް ޞާލިޙް ވިދާޅުވީ ވިލުފުށީގެ ރައްޔިތުންގެ ކަންބޮޑުވުންތައްކެއް ހުރިކަން އެމަނިކުފާނު ދެނެވަޑައިގަންނަވާ ކަމަށާއި، އެއަރޕޯޓާއި ހޮސްޕިޓަލުގެ ވާހަކައަކީ ކަންބޮޑުވުމާއި އެކު ދައްކަވާ ވާހަކައެއް ކަމަށެވެ.

"ކޮން ސަރުކާރަކުން ކާކަށްތޯ ކެރުނީ ވިލިފުށީގައި ހޮސްޕިޓަލަކާއި އެއަރޕޯޓެއް އަޅަން، ކިތައް ވެރިން އަތުވެއްޖެތޯ، މިރަށް އޮތެއްނޫންތޯ، އެވަޢުދުވީ އަޅުގަނޑުމެން، އިރާދަކުރެއްވިއްޔާ އެވަޢުދު ފުއްދާނީވެސް އަޅުގަނޑުމެން" ރައީސް ޞާލިޙް ވިދާޅުވިއެވެ.

ރައީސް ވިދާޅުވީ މިހާރުވަނީ ކުވައިތް ފަންޑުގެ ދަށުން ހޮސްޕިޓަލްގެ މަސައްކަތް ވަނީ ބިޑްކޮށް ކޮންޓްރެކްޓްކޮށް ބަޔަކާއި ހަވާޅުކުރެވިފައި ކަމަށެވެ. އެއަރޕޯޓުގެ މަސައްކަތްވެސް މިހާރު ވަނީ ފެށުމާއި ގާތުގައި ކަމަށް ރައީސް ވިދާޅުވިއެވެ.

ރައީސް ޞާލިޙްގެ ވާހަކަފުޅުގައި ވިދާޅުވެފައިވަނީ ސެޕްޓެމްބަރ 9ވަނަ ދުވަހު މި ލާވޯޓުގައި ވިސްނަންވީ ދެވޭ ވޯޓުގެ ސަބަބުން ތިމާއަށް އަންނަނީ ކޮން ބަދަލެއްތޯ، ތިމާގެ ރަށަށް އަންނަނީ ކޮން ބަދަލެއްތޯ އަދި މުޅި ޤައުމަށް އަންނަނީ ކޮން ބަދަލެއްތޯ ވިސްނަން ޖެހޭ ކަމަށެވެ.

މިއަދު ވިލުފުށީގައި ރައީސް ދެއްކެވި ވާހަކަފުޅު ފައްޓަވަމުން ވަނީ އިދިކޮޅު ޕީއެންސީ ޕީޕީއެމް ގެ ކެންޑިޑޭޓް ޑރ މުޙައްމަދު މުޢިއްޒަށް ވަރަށް ބޮޑަށް ފާޑު ވިދާޅުވެފައެވެ.

މީގެ އިތުރުން އެމްޑީޕީއަށް ގިނަ ދުވަސްތަކެއްވަންދެން ޚިދްމަތް ކޮށްދެއްވި ވިލުފުށީ ދާއިރާގެ މެމްބަރު ހަސަން އަފީފް ރައީސް އާއި އެކު ނެތުމުން ހިތާމަ ކުރައްވާ ކަމަށާއި އަލުން އަފީފް އެމްޑީޕީއަށް އައުމަށް ރައީސް ޞާލިޙް ވަނީ ދައުވަތު ދެއްވައިފައެވެ. އަދި އަފީފަކީ ޚިދްމަތް ތެރިއެއް ކަމަށާއި އަދިވެސް އެމްޑީޕީގެ ކުރީ ސަފުން އަފީފު ފަދަ ބޭފުޅުންނަށް ޖާގަ ލިބޭނެ ކަމަށް ރައީސް ޞާލިޙް ވިދާޅުވިއެވެ.

ތ އަތޮޅަށް ރައީސް ކެމްޕޭނު ދަތުރުފުޅު ފައްޓަވައިފައިވަނީ މިއަދު ހެނދުނުގެ ވަގުތެއްގައެވެ.