ބަދަލު ކުޅުންތެރިނަންނާއެކު ނިކުމެ ދަ ޑިމޮކްރެޓްސްއަށް ރިޔާސީ އިންތިހާބު ކާމިޔާބު ނުކުރެވޭނެ ކަމަށް ރައީސް ޞާލިހް ބުނަމުންދާއިރު، ޚުދު އެ މަނިކުފާނަކީވެސް 2018 ވަނަ އަހަރުގެ ރިޔާސީ އިންތިހާބަށް ނުކުތް ބަދަލު ކުޅުންތެރިއެއްކަމުގައި ވިދާޅުވެ ދަ ޑިމޮކްރެޓްސް ގެ އިންތިހާބީ ތައުޖަމާނު އަދި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީގެ ހޫނު ބަހުގެ ހަމަލާތަކެއް ރައީސް ޞާލިހަށް އަމާޒުކުރައްވައިފިއެވެ. 

ޑަ ޑިމޮކްރެޓްސް ގެ ރިޔާސީ ކެނޑިޑޭޓް، އިލިޔާސް ލަބީބްގެ ވެށިފަހި މާލެ - މާލެ ވިޝަން އިފްތިތާހްކުރުމުގެ ޖަލްސާގައި ވާހަކަދައްކަވަމުން އިމްތިޔާޒު ވިދާޅުވީ، ވެރިކަމެއް ނިމުމަށް ދާއިރު ފެންނާނެ ގިނަ އަލާމާތްތައް މިހާރު މި ވެރިކަމުން ފެންނަމުންދާކަމަށެވެ. އޭގެ ހެއްކެގެ ގޮތުގައި އިމްތިޔާޒު ދެއްކެވީ، ރައީސް ޞާލިހަށް ތިމާއަކީ ކާކުކަން ނޭނގޭ ހިސާބަށް ކަންތައް ދިއުންކަމުގައި ވިދާޅުވެފައެވެ.

މީގެ އިތުރުން ރައީސް ޞާލިހްގެ ކެމްޕެއިން ޖަލްސާއެއްގައި އެންމެ ބޮޑު މައްސަލައަކީ ވެރިކަމަށް އާދެވުނު ގޮތް ހަނދާންނެތުން ކަމުގައި ވިދާޅުވެ ދައްކެވި ވާހަކަފުޅުތަކަށް ރައްދުދެއްވައި އިމްތިޔާޒް ވިދާޅުވީ، އެހެން ވިދާޅުވާ ވިދާޅުވުމަކީ ތިމާއަކީ ކާކުކަން ތިމާއަށް ނޭނގުންކަމުގައެވެ. 

އެމްޑީޕީގެ ރިޔާސީ ޕްރައިމަރީއަށްފަހު އެ ޕާޓީ ރޫޅި އުފެދުނު ދަ ޑިމޮކްރެޓްސް އިންވެސް މި އަހަރުގެ ރިޔާސީ އިންތިހާބުގައި ވާދަކުރަމުންދާއިރު ދެ ޕާޓީންވެސް އެއް ބަޔަކު އަނެއްބަޔަކަށް ވަރަށް ބޮޑަށް ފާޑުކިޔަމުން އަންނަކަން ފާހަގަކޮށްލެވެއެވެ.