ޑިމޮކްރެޓްސްގެ ވެރިކަމެއްގައި ގްރޭޓާ މާލެ އޭރިއާގެ އިހުތިސޯސްގެ ތެރޭގައި ކ. އަތޮޅު ތުލުސްދޫ، ހުރާ، އަދި ހިންމަފުށި ހިމެނުމަށް ނިންމައިފިއެވެ.
ރޭ އިފްތިތާހް ކުރި ޑިމޮކްރެޓްްސްގެ "ވެށިފަހި މާލެ މެނިފެސްޓޯ"ގައި ބުނެފައިވަނީ ގުޅީފަޅުންނާއި ގިރާވަރުފަޅުން ހިއްކާ ބިމުގެ ސަރަހައްދުގައި އަސާސީ ހިދުމަތްތައް ގާއިމުކޮށް މީހުން ރަނގަޅަށް ދިރިއުޅޭން ފަށަން އަދި ދިގު މުއްދަތެއް ނަގާނެ ކަމަށެވެ. އަދި މި އަންދާޒާއަކީ ހުޅުމާލޭ މަޝްރޫއަށް ބަަލައި ކުރެވިފައިވާ އަންދާޒާއެއް ކަމުގައި މި މެނިފެސްޓޯގައި ވަނީ ބުނެފައެވެ.
މިގޮތުން އެ ފަޅުތައް ހިއްކައި ނިމި، އަސާސީ ހިދުމަތްތަކާއި އުމްރާނީ ތަރައްގީގެ ބިނާތައް ގާއިމުވެ ނިމެންދެން މަޑުކޮށްގެން ތިބެފިނަމަ އާއިލާތައް އިތުރަށް ނިކަމެތިވެގެންދާނެކަމުގައި ޑިމޮކްރެޓްސްގެ މެނިފެސްޓޯގައި ވަނީ ބުނެފައެވެ.
އޭގެ ހައްލެއް ގޮތުގައި މެނިފެސްޓޯ ހިމަނާފައި ވަނީ މާލެ އަތޮޅުގައި މިހާރު ވެސް މީހުން ދިރިއުޅޭ ތިން ރަށެއް ގްރޭޓާ މާލެ އޭރިއޭގެ އިހުތިސޯސްގެ ތެރޭގައި ހިމެނުމަށެވެ. އެއީ އަތޮޅުގެ ވެރިކަންކުރާ ރަށް ތުލުސްދޫގެ އިތުރަށް ހިންމަފުއްޓާއި ހުރާއެވެ.
މި ބަދަލުގެނައުމަށް ހަމަޖެއްސުމަށް ފަހު އަމާޒަކީ ފަސް އަހަރު ދުވަހުގެ ތެރޭގައި 25،000 އާއިލާއަށް ބޯހިޔާވަހިކަން ހަމަޖައްސައިދިނުމާއި މާލެ ތޮއްޖެހުމުގެ މައްސަލަ ހައްލުކުރުމަށް، އެންމެ ތޮއްޖެހިފައިހުރި ކޮށިތަކުގައި ހުރި ގޯތިގެދޮރަށް އެއްބަސްވެވޭ އަދުލުވެރި ބަދަލެއް ދިނުމަށް ފަހު އެ ގޭގޭގެ މީހުނަށް ގޯތި ނުވަތަ ކޮންޑޮމީނިއަމް ޔުނިޓެއް ފޯރުކޮށްދިނުން ވެސް ސިޔާސަތެއްގެ ގޮތުގައި ހިމަނާފައިވެއެވެ.
އެމްޑީޕީ ބައިބައިވެ، އެ ޕާޓީގެ ކުރީގެ ރައީސް މުހައްމަދު އިސްވެ ހުންނަވައި އުފެއްދެވި ޕާޓީ، ދަ ޑިމޮކްރެޓްސް އިން މި އަހަރުގެ ރިޔާސީ އިންތިހާބުގެ ފުރަތަމަ ބުރުގައި ކެންޑިޑޭޓެއްހެ ގޮތުގައި އިލިޔާސް ލަބީބް ނެރެގެން ވާދަކުރުމަށް އަންނަނީ ކެމްޕެއިން ކުރަމުންނެވެ.
Advertisement
This content is created and paid for by advertisers and does not involve Voice Journalists
