ދަ ޑިމޮކްރެޓްސްގެ ވެރިކަމެއްގައި އެކި ނަންނަމުގައި ރާއްޖޭގައި ހިންގަމުން އަންނަ ވަގު ވިޔަފާރީތައް ހުއްޓުވާަނެ ކަމުގައި އެ ޕާޓީގެ ރިޔާސީ ކެންޑިޑޭޓް އިލިޔާސް ލަބީބު ވިދާޅުވެއްޖެއެވެ.
ރިޔާސީ އިންތިހާބުގެ ކެމްޕެއިންގައި ބޭއްވި ކަންމަތީ ޖަލްސާއެއްގައި ވާހަކަ ދައްކަވަމުން އިލިޔާސް ވިދާޅުވީ، ރާއްޖޭގައި ވިޔަފާރި ކުރަން ތިބޭ ފަރާތްތަކުގެ ތެރެއިން ޚާއްސަކޮށް ކުދި އަދި މެދު ވިޔަފާރިތައް ކުރަން ތިބޭ ފަރާތްތަކަށް ސަރުކާރުގެ ތެރެއިން ވަރަށް ގިނަ ގޮންޖެހުންތައް އެބަ ހުރި ކަމަށާއި، އެ މީހުން ކުރާ ވިޔަފާރިތައް ކުރާ ބޭރު މީހުންވެސް ތިބިކަމަށެވެ.
އެގޮތުން އެކި ނަންނަމުގައި އެކި ތަންތަނުގައި ބޮޑެތި އަދި ކުދި ވިޔަފާރިތައްް ބިދޭސީން ކުރަމުން އަންނައިރު، އެކި އެކި ކުންފުނިތަކުގެ ނަމުގައި ބީލަންތަކާއި އެފަދަ މަސައްކަތްތަކައް ބިދޭސީން އަތް ގަދަކުރަމުން އަންނަ ކަމުގައެވެ.
ނާޖާއިޒު ގޮތްގޮތުންނާއި ދިވެހީންނަށް ރިޝްވަތު ދީގެން އެ ބިދޭސީން ކުރާ ވިޔަފާރިތައް ދިވެހީންނަށްވެސް އެނގޭ ކަމަށް ފާހަގަކުރައްވަމުން އިލިޔާސް ވިދާޅުވީ، އެފަދަ ވިޔަފާރިތަކުގެ ސަބަބުން ގެއްލުން ލިބެނީ ވެސް ހަމަ ކުދި އަދި މެދު ފަންތީގެ ވިޔަފާރި ކުރާ ފަރާތްތަކަށް ކަމަށެވެ.
އެ މީހުން ރަސްމީކޮށް ރާއްޖޭގައި ވިޔަފާރިއެއްކޮށް އިގުތިސާދެއް ބިނާކުރުމަށް އެ މީހުން އެކުރާ މަސައްކަތް ފުނޑި އަދި ހަލާކުވެ ނިމިގެން އެދަނީ. އަޅުގަނޑު މި އަންނަނީ އެހެން ވަގު ވިޔަފާރި ކުރާ ހުރިހާ އެންމެންގެ ވަގު ވިޔަފާރިތައް ހުއްޓުވަން. އިރާދަ ކުރެއްވިއްޔާ އަޅުގަނޑުމެން އެކަން ހުއްޓުވާނަން
އިލިޔާސް ލަބީބު
މީގެ އިތުރުން އިލިޔާސްގެ ވާހަކަފުޅުގައި ވަނީ ކުދި އަދި މެދު ފަންތީގެ ވިޔަފާރިތައް ކުރިއަރުވަން ބޭނުންވަނީ ފައިސާއާއި ވަސީލަތްތައް ކަމަށާއި އަދި އެ މީހުންނަށް ހުރި ހުރަސްތައް ވެސް ނައްތާލަން ޖެހޭ ކަމަށާއި ޕްރޮޕޯސަލެއް ހުށަހެޅުމުން 15 ދުވަސް ތެރޭގައި ބޭނުންވާ ފައިސާއާއި ވަސީލަތްތައް ހަމަޖައްސައިދޭނެ ކަމަށް ވިދާޅުވެ، އިތުރު އިކުއިޓީއެއް ރަހުނުކުރާކަށް އެއްޗެއް ނުނަގައި، ވިޔަފާރި ކޮޅަށް ޖަހަން ލޯނު ހަމަޖައްސަދެއްވާނެ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
