އެމްޑީޕީ ކޯލިޝަންގެ އޮތީ ރައްޔިތުންނަށް ޚިދްމަތްކުރުމުގެ ޝައުޤުވެރިކަން ކަމަށާއި އެހެންނޫންނަމަ  ވެރިކަމަށް ކުރިމަތިނުލެއްވީސް ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް މިހެން ވިދާޅުވީ ރިޔާސީ އިންތިޚާބުގެ ކެމްޕޭނަށް ލ އަތޮޅަށް ކުރައްވާ ދަތުރުފުޅުގައި އެއަތޮޅު އިސްދޫކަލައިދޫ އަށް ވަޑައިގެން އެރަށު ރައްޔިތުންނާއި އެކު ބޭއްވެވި ބައްދަލުވުމުގައި ވާހަކަދައްކަވަމުންނެވެ.

"އަޅުގަނޑުމެން މިވާ ވަޢުދުތައް މިވަނީ ކޮންމެހެން އިންތިޚާބަކާއި ކުރިމަތިލައިގެން ތިބީމައެއްނޫން، އަޅުގަނޑު މިވާ ވަޢުދުތަކަކީ ރައްޔިތުންނަށް ސަރުކާރުން ކޮށްދޭން ޖެހޭ ޚިދްމަތްތަކެއް ކޮށްދިނުމަކީ އެސަރުކާރަކަށް މަޖުބޫރު ކަމަކަށްވާތީ، އެކަމަކު މިކަންތައްތައް ކުރެވޭނީ މިކަން ކުރަން ދަންނަބަޔަކަށް، އަދި ކޮށްފަތިބި ބަޔަކަށް، އެއިތުބާރު، އަޅުގަނޑުހިތުން ތިބޭފުޅުންނަށް މިސަރުކާރާއި މެދުގައި އޮންނާނެ" ރައީސް ޞާލިޙް ވިދާޅުވިއެވެ.

Advertisement

ރައީސް ވިދާޅުވީ އަނެއްކާވެސް ވެރިކަމަށް ކުރިމަތިލައިގެން މިތިބީ އަމާޒުތަކެއް އޮވެގެން ކަމަށާއި، ވަޢުދުތަކެއް ވެގެން ކަމަށް ރައީސް ވިދާޅުވިއެވެ. އަދި އެއީ މިހާރު މިއޮތް ލެވަލުން އަނެއްކާވެސް އިތުރު އެހެން ލެވަލް އަކަށް އަނެއްކާވެސް ރާއްޖޭގެ ތަރައްޤީ ގެންދިޔުން ކަމަށެވެ. ތަފާތު ކުރުމެއް ނެތި  ހުރިހާ ރަށަކަށް ރައްޔިތުންނަށް ކޮށްދޭން ޖެހޭ ކަންކަން ކޮށްދިނުމަކީ އަމާޒުކަމަށް ރައީސް ޞާލިޙް ވިދާޅުވިއެވެ.

ރައީސް ވިދާޅުވީ ވޭތުވެދިޔަ ފަސްއަހަރެކޭ އެއްގޮތައް ރައްޔިތުނަށް ޚިދްމަތްކުރުމުގަޔާއި ވަޢުދުތައް ފުއްދުމުގައި ދެވަނަ ދައުރެއްގައިވެސް ދެމިތިއްބަވާނެ ކަމަށެވެ.

އިސްދޫކަލައިދޫއިން ވަނީ ރައީސް ޞާލިޙަށާއި އެމަނިކުފާނުގެ ޓީމަށް ވަރަށް ހޫނު މަރުޙަބާއެއް ވަނީ ކިޔައިފައެވެ.