ޕްރޮގްރެސިވް ކޮންގްރެސް ކޯލިޝަންގެ ވެރިކަމުގައި މަޑުއްވަރީ ރައްޔިތުންނަށް ބޭނުންވާ ބޯހިޔާވަހިކަން ކަށަވަރުކޮށްދީ މިހާރު ރަށަށް ދިމާވެފައިވާ ބަނދަރުގެ ދަތިކަން ޙައްލުކޮށްދެއްވާނެ ކަމަށް އެ ކޯލިޝަންގެ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ. 

ޑރ މުއިއްޒު މިފަދައިން ވިދާޅުވެފައި ވަނީ ރ އަތޮޅަށް މިހާރު އެމަނިކުފާނު ކުރައްވަމުން ގެންދަވާ ރިޔާސީ ކެމްޕޭނު ދަތުރުފުުގައި މަޑުއްވަރިއަށް ވަޑައިގެން އެ ރަށުގެ ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ. 

އެ ރަށުގައި ބޭއްވި ޖަލްސާގައި ރަށު ކައުންސިލްގެ ފަރާތުން ވަނީ މަޑުއްވަރިއަށް ދިމާވެފައިވާ ބައެއް މައްސަލަތައް ހިއްސާކުރައްވާފަ އެވެ. އެގޮތުން ކައުންސިލްގެ ރައީސް ވިދާޅުވީ މަޑުއްވަރިއަށް ދިމާވެފައިވާ އެންމެ ބޮޑު މައްސަލައަކީ ބިމުގެ ދަތިކަމުގެ މައްސަލަ ކަމަށެވެ. ބިމުގެ ދަތިކަން ހުރުމުން ޒުވާނުންނަށް ބޭނުންވާ ބޯހިޔާވަހިކަން ފޯރުކޮށްދިނުމަށް ޖޮންޖެހުންތައް ހުރި ކަމަށާއި، އެއީ ޚާއްސަ ސަމާލުކަމެއް ދީގެން ޙައްލުކުރަން ޖެހޭ މައްސަލައެއްކަން ކައުންސިލްގެ ރައީސް ފާހަގަކުރެއްވި އެވެ. 

އޭގެ އިތުރުން މަޑުއްވަރީ ބަނދަރު އޮތީ ވަރަށް ބޮޑަށް ހަލާކުވެފައިކަމަށާއި، އެކަމުގެ ސަބަބުން ލަފާ ފުރުމަށް ދަތިތައް ކުރިމަތިވާކަން ވެސް ކައުންސިލުން ފާހަގަކުރެއްވި އެވެ. އެއާއެކު ކައުންސިލުން ވަނީ އެއީ ޚާއްސަ އަހަންމިއްޔަތެއް ދީގެން ޑރ މުއިއްޒުގެ ވެރިކަމުގައް ހައްލުކޮށްދެއްވާނެ ކަންކަމަށް ހައްދަވާދެއްވުމަށް އެދިވަޑައިގެންފަ އެވެ. 

މަޑުއްވަރީގައި ބޭއްވި ޖަލްސާގައި ކައުންސިލްގެ ރައީސް ވާހަކަދައްކަވަނީ

ކައުންސިލްގެ ވާހަކަތަކަށް ރިއާޔަތްކުރައްވާ ޑރ މުއިއްޒު ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި މަޑުއްވަރީ ރައްޔިތުން ބޭނުންވާ ގޮތަށް ތަރުތީބުކޮށްގެން އެ ރަށަށް ދިމާވެފައިވާ މައްސަލަތައް ޙައްލުކޮށްދެެއްވާނެ ކަމަށެވެ. 

ސަރުކާރުގެ ހައުސިން ޕޮލިސީގެ ދަށުން މަޑުއްވަރީ ރައްޔިތުންނަށް ބޭނުންވާ ބޯހިޔާވަހިކަން ފޯރުކޮށްދިނުމަށް ބިން ހިއްކުމުގެ މަޝްރޫއެއް ކުރިއަށް ގެންދާނެ ކަމަށާއި، ބޯހިޔާވަހިކަން ކަށަވަރުކޮށްދެއްވާނެކަމަށް ޑރ މުއިއްޒު ވިދާޅުވި އެވެ. އޭގެ އިތުރުން މަޑުއްވަރީ ބަނދަރު ޒަމާނީ ފެންވަރަކަށް ތަރައްގީކޮށްދެއްވާނެ ކަމަށް ޑރ މުއިއްޒު ވިދާޅުވި އެވެ. 

މަޑުއްވަރީގައި ބޭއްވި ޑރ މުއިއްޒުގެ ކެމްޕޭނު ޖަލްސާގެ ތެރެއިން

އެމަނިކުފާނު ވިދާޅުވީ ރައްޔިތުން ކޮށްދެއްވަންވީ ކަމަކީ މި ރިޔާސީ އިންތިޚާބު ޕްރޮގްރެސިވް ކޮންގްރެސް ކޯލިޝަނަށް ކާމިޔާބުކޮށްދިނުމުގެ މަސައްކަތް ކަމަށެވެ. މަޑުއްވަރީން ވެސް ރަނގަޅު މެޖޯރިޓީއެއް ހޯއްދަވާދެއްވުމަށް ގަދައަޅާ މަސައްކަތްކޮށްދެއްވުމަށް ޑރ މުއިއްޒު އެދިވަޑައިގެންނެވި އެވެ. 

އެއާއެކު އެމަނިކުފާނު ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ރައްޔިތުންނަށް ބޭނުންވާ އަސާސީ ކަންކަން ނުފުދިގެން އުޅެން ނުޖެހޭނެ ކަމަށެވެ. އެ މަސައްކަތްތައް ކޮށްދެއްވާނެ ކަމަށާއި، ހުރިހާ ރައްޔިތުންނަށް ވެސް ހަަމަހަމަކަމާއެކު ތަރައްގީގެ މަންފާ ހޯއްދަވާދެއްވާނެ ކަމަށް ޑރ މުއިއްޒު ވިދާޅުވި އެވެ.