ޑރ މުހައްމަދު މުއިއްޒުގެ ސަރުކާރެއް ވަނީ ރައްޔިތުންގެ އަޑު އަހާ ރައްޔިތުންނާއި ގާތުން މަސައްކަތް ކުރާ ސަރުކާރެއް ކަމުގައިކަމަށް އެ މަނިކުފާނު ވިދާޅުވެއްޖެއެވެ.
ޑރ މުއިއްޒު މިފަދައިން ވިދާޅުވީ، ރިޔާސީ އިންތިހާބުގެ ކެމްޕެއިންގައި ރ އަތޮޅަށް ކުރައްވަމުންގެންދަވާ ދަތުރުފުޅުގައި މިއަދު އެ އަތޮޅު މަޑުއްވަރީއަށް ވަޑައިގެން އެރަށުގައި ބޭއްވި ޖަލްސާގައި ވާހަކަ ދައްކަވަމުންނެވެ.
މުއިއްޒުގެ ވާހަކަފުޅުގައި ވިދާޅުވީ، އެމަނިކުފާނުގެ ސަރުކާރަކީ ރައްޔިތުންގެ އަޑު އަހައިގެން ރައްޔިތުންނާއި ގާތުން މަސައްކަތް ކުރާނެ ސަރުކާރެއް ކަމަށާއި، ރިޔާސީ އިންތިހާބަށް 10 ވަރަކަށް ދުވަހަށް ވެފައިވުމުން މި އިންތިހާބު ކާމިޔާބު ކުރުމަށްޓަކައި ސަޕޯޓަރުން ވަރަށް ޖޯޝާ ފޯރީގައި، މިހާރަށްވުރެ ބުރަ މަސައްކަތް ކޮށްދެއްވުމަށެވެ.
އަޅުގަނޑުމެންނަކީ ރައްޔިތުންގެ އަޑު އަހައިގެން ރައްޔިތުންނާއެކު މަސައްކަތްކުރާނެ ސަރުކާރަކަށް ވާނެ. ކުރަންވީ ކަމަކީ އިންތިހާބު ކާމިޔާބުކުރުން، ބާކީ އޮތީ 10 ދުވަސް އަދި އެ 10 ދުވަހު ވަރަށް ގިނަ މަސައްކަތް ކުރެވޭނެ
ޑރ މުހައްމަދު މުއިއްޒު
މީގެ އިތުރުން މުއިއްޒު ވިދާޅުވީ، ޕީޕީއެމް ޕީއެންސީގެ ސަރުކާރު ވެގެންދާނީ ރައްޔިތުންގެ ފަރާތުން އެދޭ ތަރައްގީގެ ހުރިހާ ކަމަކަށް އިޖާބަދޭނެ ސަރުކާރެއް ކަމުގައި ކަމަށެވެ. މިއާއި ވިދިގެން މުއިއްޒުވަނީ މަޑުއްވަރީއަށް ކޮށްދެއްވާނެ ކަންތައްތަކެއްގެ ވައުދުތަކެއް ވެވަޑައިގެންފައެވެ.
އެރަށަށް ބިމުގެ ދަތިކަން ދިމާވެފައިވާކަން ފާހަގަކުރައްވައި ޑރ. މުއިއްޒު ވިދާޅުވީ މަޑުއްވަރީގެ ފަޅު ކުޑަ ނަމަވެސް އީއައިއޭ ހަދައި ހިއްކަން އޮތް ވަރަކަށް ބިން ހިއްކައިދޭނެ ކަމަށެވެ. އަދި ހިއްކާ ބައި ލޭންޑް ޔޫސް ޕްލޭންގައި ހިމަނައި ގެދޮރުވެރިކަމަށް ހާއްސަކުރާނެ ކަމަށެވެ.އަދި މަޑުއްވަރީގައި މިހާރު އޮތް ބަނދަރު ވަރަށް ބޮޑަށް ވީރާނާވެފައިވާތީ އާ ބަނދަރެއް ހެދުމުގެ މަޝްރޫއާއެކު ރަށުގައި ހޮސްޕިޓަލް ތަރައްގީކޮށްދެއްވާނެ ކަމަށް ވެސް މުއިއްޒު ވިދާޅުވި އެވެ.ރިޔާސީ އިންތިހާބުގެ ކެމްޕެއިންގައި މިހާރު ރ އަތޮޅަށް ކުރައްވަމުންގެންދަވާ ދަތުރުފުޅުގައި ޑރ މުއިއްޒުއާއި ކެމްޕެއިން ޓީމަށް ބޮޑު ތަރުހީބެއް ލިބެމުންދާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
