ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް، ރިޔާސީ ބަހުސަށް އަރަން ކެރިވަޑައިނުގެންނެވުމަކީ އެ ބަހުސް ކެންސަލް ކުރަންވީ ސަބަބެއް ނޫން ކަމަށް ރައްޔިތުންގެ މަޖިލީހުގެ ނާއިބު ރައީސް އީވާ އަބްދުالله ވިދާޅުވެއްޖެއެވެ.

އީވާ މިފަދައިން ވިދާޅުވެފައި ވަނީ، އަންނަ ހުކުރު ދުވަހުގެ ރޭ 21:00 އިން 23:00 އަށް ބޭއްވުމަށް ނިންމާފައިވާކަން އިއުލާން ކުރެވުނު ޕީއެސްއެމް ގެ ރިޔާސީ ބަހުސް ކެންސަލް ކުރިކަން އެ މީޑިއާ އިން އިއުލާން ކުރުމާ ގުޅިގެންނެވެ. 

އެކަމާއި ގުޅިގެން ޕީއެސްއެމްއިން ނެރުނު ބަޔާނެއްގައި ބުނީ، ރިޔާސީ އިންތިހާބާއި ގުޅިގެން ކެންޑިޑޭޓުން ބައިވެރިވެވަޑައިގަންނަވާ ތަފާތު ކެމްޕެއިން ހަރަކާތްތައް ރާއްޖޭގެ އެކި ކަންކޮޅުތަކުގައި ހިނގަމުންދާތީ އެ ދުވަހުގައި ބާއްވަން ތައްޔާރުވަމުންދިޔަ ޕީއެސްއެމްގެ ބަހުސްގައި ބައެއް ކެންޑިޑޭޓުންނަށް ބައިވެރިވެވެން ނެތުމުންނާއި، އިންތިހާބަށް ވަގުތު ކުޑަތަންވެފައި ވުމުން ޕީއެސްއެމްގެ ބަހުސް ފަހުގެ ތާރީހަކަށް ބަދަލުކުރުމަކީ ކެންޑިޑޭޓުންނަށް ކެމްޕެއިން ކުރުމަށް ދަތިތަކެއް ކުރިމަތިވާނެކަމެއް ކަމަށް ދެކޭ ކަމަށެވެ. 

އެހެންކަމުން ޕީއެސްއެމްގެ ބަހުސް ފަހުގެ ތާރީހަކަށް ބަދަލު ކުރުމަކީ އެންމެ ރަނގަޅު ގޮތް ނޫންކަމަށް ފެންނާތީ، އެ މީޑިއާއިން ގަސްތުކުރަނީ މިހާރު ވެސް ބަހުސެއް ރާވާފައިވާ ފަރާތަކާއި ގުޅިގެން ބަހުސް ކުރިއަށް ގެންދިއުމަށް ކަމަށްވެސް ޕީއެސްއެމްގެ ބަޔާނުގައި ވެއެވެ.

މިކަމަށް ފާޑުވިދާޅުވެ އީވާ ކުރެއްްވި ޓުވީޓެއްގައި ވިދާޅުވީ، ޕީއެސްއެމް އަކީ ރައްޔިތުންގެ ޓެކްސް ފައިސާއިން ހިންގާ ޓީވީ ޗެނަލަކަށް ވާއިރު، އެ ބަހުސް ބޭއްވުމަކީ ގާނޫނީ ގޮތުންވެސް އެ މީޑިއާ އަށް ލާޒިމް ކަމެއް ކަމަށެވެ. 

"ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ބަހުސަށް އަރަން ނުކެރިގެން ބަހުސް ކެންސަލް ކުރަން އެދިލެއްވީއޭ ކިޔާފައި ޕީއެސްއެމް އަށް އެކަމެއް ނުކުރެވޭނެ. އެންމެ ކެންޑިޑޭޓެއް ބަހުސަށް އަރަން ތައްޔާރަށް ހުއްޓަސް އެ ބަހުސް ބޭއްވުމަކީ ޕީއެސްއެމްގެ ޒިންމާއެއް." އިވާ ވިދާޅުވި އެވެ. 

ޕީއެސްއެމް އިން ބަހުސް ކެންސަލް ކުރަން ނިންމާފައިވަނީ،  އެ ރޭ އެމްޑީޕީގެ “އުފާވެރި މާލެ“ ގެ ނަމުގައި އިވެންޓެއް ބާއްވާތީ، އެ ޕާޓީން ބަހުސް ފަސް ކޮށްދިނުމަށް އެދިފައިވާ ދަނޑިވަޅެއްގައެވެ. 

އެކަމާއި ގުޅިގެން ގިނަ ބައެއްގެ ފާޑުކިޔުންތައް ޕީއެސްއެމަށް އަމާޒުވަމުން އަންނަ އިރު، މީގެ ކުރިންވެސް އިންތިހާބުގެ ކެންޕެއިން ކަންކަން ކުރިއަށް ގެންދަމުން ދިޔަ އިރުވެސް މި ބަހުސް ކެންސަލް ކޮށްފައެއް ނުވެއެވެ. އެގޮތުން، 2018 ވަނަ އަހަރު އެންމެ ކެންޑިޑޭޓަކާއި އެކުވެސް އެ ބަހުސް ވަނީ ކުރިއަށް ގެންގޮސްފަ އެވެ.