ސިނަމާލެ ބްރިޖަކީ ހަމައެކަނި ދެ ރަށެއް ގުޅާލާ ބުރިޖެއް ނޫން ކަމަށް، އެ ބްރިޖު އެޅުނު އިރު ހައުސިންގް މިނިސްޓަރުގެ މަގާމުގައި ހުންނެވި، ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވިދާޅުވެއްޖެއެވެ. 

ސިނަމާލެ ބުރިޖު އެޅިތާ 5 އަހަރު ފުރުމާއި ގުޅިގެން، މިއަދު މުޢިއްޒު ކުރެއްވި ޓްވީޓެއްގައި ވިދާޅުވީ، މީގެ ފަސް އަހަރު ކުރިން، 30 އޮގަސްޓު 2018 ވަނަ އަހަރު ހުޅުވުނު ޗައިނާ-ދިވެހިރާއްޖެ ފްރެންޝިޕް ބްރިޖަކީ ދެ ގައުމުގެ ދެމެދުގައި އޮތް ދިގުދެމިގެންވާ ގުޅުމުގެ ރަމްޒެއް ކަމަށެވެ. 

އަދި، އެއީ ކުރީގެ ރައީސް އަބްދުالله ޔާމީން އަބްދުލްގައްޔޫމް އާއި، ޗައިނާގެ ރައީސް ޒީ ޖިންޕިންގގެ ކާމިޔާބީ އާއި ތަސައްވުރުގެ ނިޝާނެއް ކަމަށްވެސް މުޢިއްޒު ވިދާޅުވިއެެވެ. 

"(ޗައިނާ-މޯލްޑިވްސް ޕްރެންޝިޕް ބްރިޖް) އަކީ ހަމައެކަނި ދެ ރަށެއް ގުޅުވާލާ ބުރިޖެއް ނޫން. އެހެނެއްް ކަމަކު އެއީ އުއްްމީދުގެ ބްރިޖެއް. އަދި އެއީ މި ގައުމުގެ ކުރިއެރުން" މުޢިއްޒު 

2018 ވަނައަހަރުގެ އޮގަސްޓުމަހު 30 ވަނަ ދުވަހުގެރޭ ސިނަމާލެ ބްރިޖް ހުޅުވުމުގެ ރަސްމިއްޔާތު އޮތީ ހަވާ އަރުވައި ލޭޒަރ ލައިޓްގެ ކުލަގަދަ ހަރަކާތްތަކާއި އެކުއެވެ. މި ބުރިޖަކީ ރާއްޖޭގައި މިހާތަނަށް ހިންގި އުމްރާނީ ތަރަށްޤީގެ އެންމެ ބިޔަ އެއް މަޝްރޫއެވެ.

ސިނަމާލެ ބުރިޖުގެ މަސައްކަތަކީ ރައީސް ޔާމީންގެ ވެެރިކަމުގައި 210 މިލިއަން ޑޮލަރު ހަރަދުކޮށްގެން ހެދި ބުރިޖެކެވެ. އޭގެ ތެރެއިން 126 މިލިއަން ޑޮލަރަކި ޗައިނާ ސަރުކާރުގެ ހިލޭ އެހީއެވެ. އަދި ބުރިޖުގެ މަސައްކަތް ބެލެހެއްޓެވީ ޑރ.މުއިއްޒުއެވެ.