ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު، ރިޔާސީ ކެންޕެއިނަށް ރަށްރަށަށް ވަޑައިގަންނަވާއިރު، އެމަނިކުފާނަށް މަރުހަބާ ދެންނެވުމަށް އެހެން ރަށް ރަށުން މީހުން ގެނެސް، އެ ވަޑައިގަންނަވާ ރަށަށް ޖަމާކުރަން ނުޖެހޭ ކަމަށް އެމަނިކުފާނުގެ ކެންޕެއިން ތަރުޖަމާނު، މާރިޔާ އަހުމަދު ދީދީ ވިދާޅުވެއްޖެއެވެ.
މިއަދު ރައީސް ޞާލިހު ގެ ކެންޕެއިން ތަރުޖަމާނުގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މާރިޔާ ވިދާޅުވީ، ފާއިތުވި ހަފްތާގައި އެމަނިކުފާނު އުޅުއްވީ ކެންޕެއިން ކުރެއްވުމަށް ތ އަޮޅާއި އަދި ލ އަތޮޅުގެ ރަށްތަކަށް ދަތުރު ކުރެއްވުމުގައި ކަމަށެވެ.
އަޅުގަނޑުމެންނަށް އެތަނުން އެ ފެނިގެން ދިޔަ މަންޒަރުތަކަކީ ފިއްކަނޑައިގެންދާ ވަރުގެ މަންޒަރުތަކެއް. އެހާމެ ތާއީދު ބޮޑުކޮށް ފެނިގެން ދިޔައީ. އަޅުގަނޑުމެންގެ ހިސާބުތަކަށް ބަލާއިރު، ހިސާބުތައް ވަރަށް ތަނަވަސް އަގުލަބިއްޔަތަކުން ރައީސް ޞާލިހު، ކެންޑިޑޭޓް ނަންބަރު ތިނެއް، އެއްބުރުން މި އިންތިޚާބު ކާމިޔާބު ކުރައްވާތަން ފެނިގެން ދޭ.
މާރިޔާ އަހުމަދު ދީދީ
މާރިޔާ ވިދާޅުވީ، ކެންޕެއިނަށް އަތޮޅު ތަކުގެ ހުރިހާ ރަށަކަށް ހެން ރައީސް ޞާލިހު ޒިޔާރަތްކުރެއްވަމުންދާ ކަމަށެވެ. އެހެންކަމުން މަރުހަބާ ދަންނަވާ މީހުން ގިނަ ކުރަން ރަށް ރަށުން މީހުން ގެންނަން ނުޖެހޭ ކަމަށްވެސް އޭނާ ވިދާޅުވި އެވެ.
އަތޮޅު ތަކުގެ ހުރިހާ ރަށަކަށް ހެން ރައީސް ޞާލިހު ވަޑައިގަންނަވާ. އެހެންވީމާ ރަށްރަށުން މީހުން ގެންނަވާކަށް ނުޖެހޭ. ޖަމާކުރާކަށް ނުޖެހޭ އެއްތަނަކަށް، ރައީސް ޞާލިހު ވަޑައިގަންނަވާއިރު.
މާރިޔާ އަހުމަދު ދީދީ
މިއާއެކު މާރިޔާ ވިދާޅުވީ، އިދިކޮޅުު ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ރަށްރަށަށް ވަޑައިގަންނަވާއިރު މީހުން ގިނަ ވަނީ އެހެން ރަށްރަށުން މީހުން ގެންދާތީ ކަމަށެވެ.
Advertisement
This content is created and paid for by advertisers and does not involve Voice Journalists
