ޖުމްހޫރީ ޕާޓީގެ ރިޔާސީ ކެންޑިޑޭޓް އަދި އެޕާޓީގެ ލީޑަރު ޤާސިމް އިބްރާހީމް ދިވެހިންނަށް ޓަކަޔާއި، ދިވެހިރާއްޖެ އަށްޓަކައި ކޮށްދެއްވާފައިވާ ކަންކަމުގެ ވާހަކަ އެމަނިކުފާނު ދައްކަވަނީ ކަލަ ގޮވަން ނޫން ކަމަށާ، އެހެނެއް ކަމަކު އެއީ ހަނދުމަކޮށްދެއްވުން ކަމަށް އެމަނިކުފާނުގެ އަނބިކަނބަލުންގެ ތެރޭގައި ހިމެނިވަޑައިގަންނަވާ، ޓްރާންސްޕޯރޓް މިނިސްޓަރު ޢާއިޝަތު ނަހުލާ ވިދާޅުވެއްޖެއެވެ. 

ޖުމްހޫރީ ޕާޓީގެ ހެންވޭރު ޖަލްސާ ހުޅުވުމަށް ރޭ ބޭއްވި ހަފުލާގައި ވާހަކަދައްކަވަމުން ނަހުލާ ވިދާޅުވީ، ޤާސިމް އިބްރާހީމް އެމަނިކުފާނު ކޮށްދެއްވި ކަންކަމުގެ ވާހަކަދައްކަވަނީ ކަލަގުވުމަށް ކަމަށް ބައެއް ފަރާތްތަކުން ބުނަމުން އައި ނަމަވެސް އެއީ ކަލަ ގޮވާން ދައްކަވާ ވާހަކައެއް ނޫން ކަމަށެވެ.

އަދި އެކި ކެންޕެއިން ޖަލްސާތަކުގައި އެމަނިކުފާނު އެފަދަ ވާހަކަތައް ދައްކަވަނީ ރައްޔިތުންނަށް ކަންކަން ހަނދުމަ ކޮށްދެއްވާން ކަމަށާ، ހަނދާންކޮށްދިނުމަކީ މުއުމިނުންގެ ސިފައެއް ކަމަށް ވެސް ނަހުލާ ވިދާޅުވިއެވެ.

ނަހުލާ އިތުރަށް ވިދާޅުވީ އަހަރެމެންލާ ވޯޓަކީ އެއާއި މެދު ސުވާލު ކުރެވޭނެ އެއްޗެއް ކަމަށެވެ. އަދި ގައުމުގެ މިނިވަންކަމާއި އިސްތިގުލާލު ގެއްލޭ ހާލަތެއްގައި ވޯޓަކުން އެކަން ބަދަލުކުރުމަކީ ރައްޔިތުންގެ ބޮލުގައި އެޅިފައިވާ ޒިންމާއެއް ކަމަށްވެސް ނަހުލާ ވިދާޅުވިއެެވެ. 

ރިޔާސީ ކެންޕެއިނަށް ރަށްރަށަށް ކުރައްވަމުންދާ ދަތުރުފުޅުގައި، ރަށްރަށުގެ ވަކިވަކި ފަރުދުންގެ އިތުރުން މުޅި ރަށުގެވެސް ތަޢުލީމާއި، ސިއްްހަތާއި އަދި އެނޫންވެސް ދާއިރާތަކުގެ ކުރިއެރުމަށް ގާސިމް ކޮށްދެއްވި ޚިދުމަތްތަކުގެ ވާހަކަ އެމަނިކުފާނާއި އެ ޓީމުން އަންނަނީ ފާހަގަކުރައްވަމުންނެވެ. އެއީ ކަލަ ގޮވުން ކަމަށްބުނެ ބައެއް ފަރާތްތަކުން ފާޑުކިޔަމުން އަންނައިރު ގާސިމް ވެސް ވަނީ އެކަމަށް ރައްދު ދެއްވައި އެއީ ހަނދުމަކޮށްދެއްވުން ކަމަށް ވިދާޅުވެފައެވެ.