ރިޔާސީ އިންތިޚާބު 2023 ގައި ވާދަކުރައްވާ ކެންޑިޑޭޓުންނަށް އެންޓި-ކެންޕެއިން ނުކުރުމަށް މޯލްޑިވްސް މީ ވަރަށް އެ ޑިޔާ ކައުންސިލް (އެމްއެމްސީ) އިން ހުރިހާ މީޑިއާތަކަށް ގޮވާލައިފި އެވެ. 

އިންތިހާބުގައި ވާދަކުރާ ބައެއް ކެންޑިޑޭޓުންނާއި ގުޅިގެން، ހަގީގަތާއި ޚިލާފު ވާހަކަތައް ބައެއް މީޑިއާ ތަކުން ފަތުރަމުންދާތީ، އެކަމާއި ގުޅިގެން އެމްއެމްސީން ނެރުނު ބަޔާނެއްގައި ބުނީ،  09 ސެޕްޓެމްބަރު 2023 ގައި ބާއްވާ "ރިޔާސީ އިންތިޚާބު 2023" ގެ ވަގުތު ކުޑަތަންވެފައިވާއިރު، ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންނާއި ކެންޑިޑޭޓުންގެ ނައިބުންނާއި ގުޅުވައި ސައްޙަ ނޫން ޚަބަރާއި މައުލޫމާތު މީޑިއާތަކުން ފަތުރާކަމުގެ ޝަކުވާ، އެ ކައުންސިލަށް ލިބެމުންދާކަމަށެވެ.

އެހެންކަމުން، "ދިވެހި މީޑިއާގެ އަޚުލާގީ މިންގަނޑު" ގައި ބަޔާންކޮށްފައިވާ އުސޫލުތަކާއި ހަމަތަކުގެ ތެރެއިން ރިޔާސީ އިންތިޚާބުގެ ކެމްޕެއިން ޚަބަރުތައް ގެނެސްދިނުމަށާއި، ރިޔާސީ ކެންޑިޑޭޓުންނާއި ކެންޑިޑޭޓުންގެ ނައިބުންނާއި ގުޅުވައި ސާބިތު ނުހިފޭ ދޮގު ވާހަކަތައް ނުފެތުރުމަށް އެ ކައުންސިލުން ވަނީ އިލްތިމާސް ކޮށްފައެވެ. 

"މީޑިއާގައި ޝާއިޢުކުރާ މަޢުލޫމާތަކީ އިންޞާފުވެރިކަމާއި ތެދުވެރިކަމާއެކު ޝާއިޢުކޮށް ފޯރުކޮށްދެވޭ މަޢުލޫމާތެއްކަން ޤަބޫލުކުރުމުގެ ޙައްޤު އާންމުނަށް ލިބިގެންވީހިނދު، އެފަދަ މަޢުލޫމާތު އާންމުންނަށް ފޯރުކޮށްދެނީ ފަރުދުންނަށް ލިބިގެންވާ އަމިއްލަ މިނިވަންކަމުގެ ދާއިރާއަށް ޙުރުމަތްތެރިކޮށް ހިތޭ ގޮތެއްގައި އެފަރާތަކަށް ދޭންވާ ޙައްޤު ޤަދަރާއި އިޙްތިރާމް ދެވިގެންކަމުގައި ވާންޖެހެއެވެ. އެހެންކަމުން ރިޔާސީ އިންތިޚާބުގެ ކެމްޕެއިންގެ ތަރަހައިގެ ތެރޭގައިވެސް މި އުސޫލުތަކަށް ނޫސްވެރިންނާއި މީޑިއާތަކުން އިހުތިރާމްކޮށް، "އެންޓި-ކެމްޕެއިން" ކުރުމުން މުޅިން އެއްކިބާވާންޖެހެއެވެ." އެމްއެމްސީގެ ބަޔާނުގައި ވެއެވެ.

މިއާއެކު، ރިޔާސީ އިންތިޚާބު 2023 ގެ ތެރޭގައިވެސް، މީޑިއާތަކުން ދިވެހި މީޑިއާގެ އަޚުލާގީ މިންގަނޑާ ޚިލާފަށް، ޚަބަރާއި މައުލޫމާތު ފަތުރާނަމަ، މީޑިއާ ކައުންސިލުގެ އިޚްތިސާސްތެރޭގައި ހިމެނޭ މައްސަލަތައް ބަލާނެ ކަމަށް އެ ކައުންސިލުން ވަނީ ބުނެފަ އެވެ. އަދި އެ ކައުންސިލުގެ އިޚްތިސާސްތެރޭގައި ނުހިމެނޭ ބާވަތުގެ މައްސަލަތައް، އެކަމަކާ ގުޅޭ މުއައްސަސާތަކަށް ހުށަހަޅާނެކަމަށްވެސް ބުނެފައިވެއެވެ.