ބޮޑުތިލަދުންމައްޗަށް ޚާއްސަ އިންވެސްޓްމެންޓް ބޭންކެއް ގެންނާނެ ކަމަށް ދަ ޑިމޮކްރޭޓްސްގެ ރިޔާސީ ކެނޑިޑޭޓް އިލްޔާސް ލަބީބުގެ ރަނިންގ މޭޓް ހުސެން އަމްރު މުހައްމަދު ރަޝާދު ވިދާޅުވެއްޖެއެވެ.
ތިލަދުންމަތީގެ ބައެއް ރަށްތަކަށް ކުރައްވަމުން ގެންދަވާ ކެމްޕެއިން ދަތުރުފުޅުގައި ހއ ދިއްދޫގައި ބޭއްވި ރެލީއެއްގައި ވާހަކަދައްކަވަމުން އަމްރު ވިދާޅުވީ ބޮޑު ތިލަދުން މައްޗަށް ގެންނަ ތަރައްގީ ފުރިހަމަ ވެގެންދާނީ އެ ސަރަހައްދަށް ޚާއްސަ ބޭންކެއް ގެނެވިގެންކަމަށެވެ.
" ބޮޑު ތިލަދުންމަތީގެ ތަރައްގީ އެކޮށް ފުރިހަމަވާނީ ތަރައްގީގެ ބޭންކެއް އަތުވެގެން. އެ ތަރައްގީގެ ބޭންކަކީ ބޮޑުތިލަދުންމައްޗަށް ޚާއްސަ ބޭންކަކަށް ވެގެންދާނެ."
ހުސެއިން އަމްރު
އަމްރު ވިދާޅުވީ އެ ބޭންކް ވެގެންދާނީ ބޮޑުތިލަދުންމައްޗަށް އިންވެސްޓްކުރުމަށް އަންނަ ފަރާތްތަކަށް ލޯނު ދޫކުރާ ބޭންކަކަށް ކަމަށެވެ.
މީގެ އިތުރުން އޭނާވަނީ ދައުލަތުން ލޯނުގެ ގެރެންޓީ ދޭންޖެހެނީ ހަމައެކަނި މަހުޖަނުން ރިޒޯޓް ހަދަން ނޫންކަމަށް ވިދާޅުވެފައެވެ.
އަމްރު ވިދާޅުވީ ޑެމޮކްރެޓްސްގެ ސަރުކާރެއްގައި ގެސްޓްހައުސް އެޅުމަށް ދައުލަތުން ގެރެންޓީ ދީގެން ލޯނު ދޫކުރާނެކަމަށެވެ.
ޑެމޮކްރޭޓްސްގެ މައިގަނޑު އެއް ވައުދަކީ ފަރުދުންގެ ތަނަވަސްކަން އިތުރުކުންކަމަށްވާއިރު ދިއްދޫގައިވެސް އަމްރުވަނީ އެ ވައުދު ތަކުރާރުކުރައްވާފައެވެ.
Advertisement
This content is created and paid for by advertisers and does not involve Voice Journalists
