އެޑިކްޝަންސް ނުވަތަ އެކި ކަންކަމަށް ދެވި ހިފުމުން، ދުރުހެލިކުރުވުމަށް އެހީވުމަށް ޕީސް ފައުންޑޭޝަން ގެ ފަރާތުން ހިންގާ ޑީނޭޖަރ ޕްރޮގްރާމް ގައި ބައިވެރި ވުމުގެ ފުރުސަތު ހުޅުވާލައިފި އެވެ. 

މިފަހަކަށް އައިސް އެންމެ ގިނައިން ދެކެވޭ އެއް ވާހަކައަކީ "އެޑިކްޝަން" ގެ ވާހަކައެވެ. ތަފާތު އެކިއެކި ކަންކަމަށް ޒުވާނުން ދެވިހިފާ ވާހަކައެވެ. ޑުރަގާއި، ޕޯނޮގްރަފީ އާއި ސޯޝަލް މީޑިއާ އާއި މިނޫނަސް ތަފާތު އެހެނިހެން ނުރަނގަޅު އާދަތަކުން ޒުވާނުންނަށް ދުރުނުވެވިގެން އުޅޭ ވާހަކައެވެ.

މިކަންކަމަކީ، އެކަންކަމަކުން ދުރުވުމަށްޓަކައި އެތައް ބަޔަކު އެކި ގޮތްގޮތަށް މަސައްކަތް ކުރަމުން ގެންދާ ކަންކަމެވެ. އެގޮތުން، ކައުންސެލިންގ އާއި އެކި ކަހަލަ ޓްރީޓްމަންޓްތައް ނަގަމުން ދާ މީހުން ގިނައެވެ. އަދި އެކި ސަބަބުތަކާހުރެ ފަރުވާއާއި ކުރިމަތިލާން ނުކެރޭ މީހުންވެސް މަދެއް ނޫނެވެ.

Advertisement

ކައުންސެލިންގ އާއި އެހެނިހެން ޓްރީޓްމަންޓް ތަކުގެ އިތުރުން، އިސްލާމީ ޢަޤީދާ ވަރުގަދަ ވުމާއި ދީނީ މަޢުލޫމާތު މުއްސަނދިވެ ޢަޤީދާ ވަރުގަދަ ވުމަކީ ވެސް މިފަދަ ނުރަނގަޅު އާދަތަކުން ދުރުވުމަށް ބާރު ލިއްބައިދޭ ކަމެކެވެ. 

އެގޮތުން، ޕީސް ފައުންޑޭޝަނުން ފަރުމާކޮށްފައިވާ "ދަ ޑީނޭޖަރ" ވޯކްޝޮޕަކީ އިސްލާމީ ޢަޤީދާ ބޭނުންކޮށް އެފަދަ ނުރަނގަޅު އާދަތަކުން ދުރުވާނެ ޙައްލުތަކެއް ޒުވާނުންނަށް ފޯރުކޮށްދިނުމުގެ މަޤްޞަދުގައި ފަރުމާ ކުރެވިފައިވާ ވޯކްޝޮޕެއް ކަމަށް އެ ޖަމިއްޔާއިން ބުނެއެވެ. 

މި ޕްރޮގްރާމަކީ 15 އަހަރާއި 20 އަހަރާ ދެމެދުގެ ދެ ޖިންސުގެ ޒުވާނުންނަށް ޚާއްޞަކޮށްގެން ކުރިޔަށް ގެންދާ 2 ދުވަހުގެ ވޯކްޝޮޕެކެވެ.

ޕީސް ފައުންޑޭޝަނުން ވަނީ ޑީނޭޖަރ ޕްރޮގްރާމުގެ 3 ވަނަ ބެޗަށް މިހާރު ހުޅުވާލާފައެވެ.

މި ޕްރޮގްރާމާބެހޭ އިތުރު މަޢުލޫމާތު ޕީސް ފައުންޑެޝަނުގެ ސޯޝަލް މީޑިއާ ޕްލެޓްފޯމްތަކުންނާއި، 9552949 މި ނަންބަރަށް ގުޅައިގެން ލިބިލައްވާނެ ކަމަށް އެ ޖަމިއްޔާ އިން މައުލޫމާތު ދެއެވެ.