ދިވެހިރާއްޖެއިން 30 ހެކްޓަރުގެ ބިން، އިންޑިޔާ ސިފައިންނަށް ދިނުމަށް އެދި އިންޑިއާގެ ޚާރިޖީ ވަޒީރު ޑރ.ސުބްރަމަނިޔަން ޖައިޝަންކަރު ރާއްޖޭގެ ޚާރިޖީވަޒީރު އަބްދުالله ޝާހިދަށް ފޮނުއްވާފައިވާ، ސިޓީއެއް ލީކު ވެއްޖެއެވެ. 

މި ސިޓީ ފަށްޓަވަމުން ޖައިޝަންކަރު ވަނީ މިދިޔަ ޖުލައި މަހު ޝާހިދު އިންޑިއާއަށް ކުރެއްވި ދަތުރުފުޅުގައި އެ ދެ ބޭފުޅުންގެ މެދުގައި ކުރެވުނު މަޝްވަރާކުރެވުނު މަޝާވަރާގެ ތެރެއިން، ވަރަށް ގިނަ ކަންކަމުގައި އެއްބަސްވުމަކާއި ހަމައަށް އާދެވުނުކަން އުފަލާއި އެކު ފާހަގަ ކުރައްވާފައެވެ.

އަދި ދެ ގައުމުގެ ދެމެދުގައި އެއްބަސްވެފައިވާ އުތުރު ތިލަފަޅު އެއްބަސްވުމާއި 2019 ވަނަ އަހަރު ލައިން އޮތް ކްރެޑިޓް އަށް އިންޑިޔާ ގެ އެގްޒިމް ބޭންކުން ނަގާފައިވާ ލޯނު ދެއްކުމާއި ގުޅޭ ގޮތުން އިތުރު މައުލޫމާތު ސާފުކުރެއްވުމަށް ޝާހިދު އެދިފައިވާތީ އެކަން އެ ސިޓީގައި ހާމަކުރައްވާ ކަމަށްވެސް އޭނާ ވިދާޅުވި އެވެ. 

އެކަމުގެ ތަފްސީލް ހާމަކުރައްވައި ޖައިޝަންކަރު ވިދާޅުވީ, އެ  އެއްބަސްވުމަށް ގެނެވޭ ބަދަލާއި އެކު ދެ ޤައުމަށް ފައިދާވާ ގުޅުން އިތުރަށް ހަރުދަނާކޮށް ކުރިއަރައިގެންދާނެ ކަމަށެވެ. އަދި އެ ގެނައި ބަދަލާއެކު 4 ތާރީޚެއްގައި ސޮއިކޮށްފައިވާ އިންޑިއާގެ އެގްޒިމް ބޭންކުން ދޭ ލައިން އޮފް ކްރެޑިޓު ފުރިހަމައަށް ބޭނުންކުރެވޭނެ ގޮތް ހެދިގެންދާނެ ކަމަށްވެސް ބުނެފައިވެއެވެ. 

ސިޓީގައި ޖައިޝަންކަރު އިތުރަށް ވިދާޅުވެފައިވަނީ ރާއްޖެއަށް އެއް އަންމޭންޑް އެއިރިއަލް ވެހިކަލް ނުވަތަ ޑްރޯނެއް ދިނުމަށް އިންޑިއާއިން ރާއްޖެއާއެކު އެއްބަސްވެފައިވާކަމަށްށެވެ. 

ރައްޖެއަށް ދިނުމަށް އެއްބަސްވި މި ޑްރޯނުގެ އިތުރަށް އިތުރު 11 ޑްރޯނެއް ދިވެހި ސަރުކާރަށް ދިނުމުގެ ގޮތުން 550،000،000 އެމެރިކާ ޑޮލަރުގެ ލައިން އޮފް ކްރެޑިޓެއް ދިވެހި ސަރުކާރަށް ދިނުމަށް އިންޑިއާއިން އެއްބަސްވެފައިވާ ކަމުގައިވެސްއެ ސިޓީގައި ބުނެފައިވާއިރު، މި ޑްރޯނުތައް އޮޕަރޭޓުކުރުމަށް ހަމަޖެހިފައިވަނީ، އެކަމާ ގުޅޭ އެއްބަސްވުމުގައި ބުނެފައިވާ އުސޫލުގެ މަތިން އެމްއެންޑީއެފްގެ އޮފިސަރުންކަމަށް ޖައިޝަންކަރުގެ ސިޓީގައި ބަޔާންކުރައްވާފައިވެއެވެ.

އިންޑިޔާގެ ފޮރިން މިނިސްޓަރުގެ ސިޓީގައި ވިދާޅުވެފައިވަނީ ތަމްރީނާއި ކުރިއެރުމާއި އެހީތެރިކަން އެމްއެންޑީއެފްއަށް ފޯރުކޮށްދީ ޤާބިލުކަން އިތުރުކުރުމުގެ ގޮތުން އިންޑިއާއަށް ހދ.ހަނިމާދޫއާއި އައްޑޫ ސިޓީ ގަމުގެ އިންޓަނޭޝަނަލް އެއާޕޯޓު ކައިރިން ކޮންމެ ތަނަކުން މަދުވެގެން 15 ހެކްޓަރުގެ ބިން ކުއްޔަށް ދޫކުރަންވާނެ ކަމާއި މި ސިޓީގައި ސާފުކޮށް ބަޔާންކޮށްފައިވާ ގޮތުގައި މި ބިން ދޫކުރަންޖެހެނީ 99 އަހަރުގެ މުއްދަތަށް ކަމަށެވެ.

އެ ބިންތައް މިސިޓީގައި އިންޑިއާގެ ޚާރިޖީވަޒީރު ސިފަކުރައްވާފައިވަނީ "Our Sovereign domain" ނުވަތަ އަހަރުމެންގެ ސިޔާދަތީ ސަރަހައްދުގެ ގޮތުގައިކަން ފާހަގަކުރެވެއެވެ.

ޖައިޝަންކަރުގެ ސިޓީގައި ބަޔާންކުރައްވާފައިވަނީ މިހާރު ދީފައިވާ އަދި ދިނުމަށް ހުށަހަޅާފައިވާ 1،940،000،000 (އެއް ބިލިއަން ނުވަސަތޭކަ ސާޅީސް މިލިއަން) ޑޮލަރު ނުވަތަ 29.9 ބިލިއަން ދިވެހި ރުފިޔާގެ ކްރެޑިޓް ލައިން އެއްބަސްވުމުގެ ދަށުން އިންޑިއާއިން ޕޭމަންޓެއް ހެދުމުން، އެ ބިންތައް ފުރަތަމަ ދޭ 99 އަހަރު ހަމަވަމުން އިތުރު މުއްދަތަށްވެސް އެ ބިންތައް އިންޑިއާއަށް ލިބޭނެ ކަމަށެވެ. ކްރެޑިޓް ލައިނު އެއްބަސްވުމުގެ ދަށުން ޕޭމެންޓު ހަދާ ގޮތެއްކަމަށް މި ސިޓީން ފެންނަނީ ރާއްޖެއިން ދައްކަންޖެހޭ ފައިސާއިން މިންވަރެއް އިންޑިއާއިން މާފުކޮށްދިނުމެވެ. 

އެހެންކަމުން މިއީ ކުރިން ދުވަހަކުވެސް ދައުލަތުގެ ދަރަނި މައާފުނުކުރާ މިންވަރުގެ މައާފުކުރުމެއް ކަމުގައިވާނެ ކަމަށް މި ސިޓީގައި ބުނެފައިވެއެވެ. އަދި އެއީ ދިވެހި ރައްޔިތުންނާއި ދައުލަތަށް އޮތް ބޮޑު ބުރައެއް ފިލުވައިދިނުންކަމަށާއި، ދެ ޤައުމު އެކީގައި ކުރާ ދަތުރުގައި ތާރީޚީ މުހިއްމު ފިޔަވަޅަކަށް އެކަން ވާނެކަމަށްވެސް މި ސިޓީގައިބުނެފައެވެ.

މި ސިޓީގައި ބަޔާންކޮށްފައިވާ ގޮތުން ހަނިމާދޫއާއި ގަމުން އިންޑިއާއަށް ދޫކުރާ 15 ހެކްޓަރަށްވުރެ ބޮޑުނޫން ބިމަކީ އިންޑިއާގެ ފުރިހަމަ ބާރު ހިނގާ، އިންޑިއާގެ ސިޔާދަތީ ސަރަހައްދެކެވެ.