ދެވަނަ ބުރަށް ދާނީ އިހުނަށްވުރެ ވަރުގަދަކޮށް ކަމަށް ރައީސް އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެއްޖެއެވެ.
އަލީ ޒާހިރު ކުރެއްވެވި ޓްވީޓެއްގައި ވިދާޅުވެފައިވަނީ އެއްބުރުން ނުނިމުނު ކަމަށާއި ދެވަނަ ބުރަށް ދާނީ އިހުނަށް ވުރެވަރުގަދަކޮށް ކަމަށެވެ. އަލީ ޒާހިރުގެ ޓްވީޓުގައި ވޯޓްގައި ބައިވެރިވި އެންމެހާ ފަރާތްތަކަށް ޝުކުރުއަދާކޮށްފައިވެއެވެ.
"ދެވަނަ ބުރުގައި އަޅުގަނޑުމެން ނިކުންނާނީ މިފަހަރު ވޯޓުގައި ބައިވެރިނުވެވުނު ހުރިހާ ބޭފުޅުންގެ ވޯޓާއި ވެސް އެކު"
ޗީފް އޮފް ސްޓާފް ޢަލީ ޒާހިރު
މީގެ އިތުރުން އަލީ ޒާހިރު ވިދާޅުވީ ދެވަނަ ބުރަކަށް ނުކުންނާނީ އެންމެން އެކުގައި ރައީސް އިބްރާހިމް މުޙައްމަދު ޞާލިޙާއި އެކު އުފާވެރި އަމާން ރާއްޖެއެއް ހޯދުމަށް ކަމަށެވެ.
އިއްޔެ ބޭއްވުނު ރިޔާސީ އިންތިޚާބުގެ ނަތީޖާ ދައްކާ ގޮތުން އިންތިޚާބު މިހާރުވަނީ ދެވަނަ ބުރަކަށް ގޮސްފައެވެ. ދެވަނަ ބުރުގައި ވާދަ ކުރައްވާނީ ރައީސް އިބްރާހިމް މުޙައްމަދު ޞާލިޙާއި ޕީއެންސީގެ ކެންޑިޑޭޓް ޑރ މުޙައްމަދު މުޢިއްޒެވެ.
އިންތިޚާބު ދެވަނަ ބުރަށް ދިޔުމާއި އެކު ދެ ކެންޑިޑޭޓުން ވެސް ވިދާޅުވެފައިވަނީ އެހެން ޕާޓީތަކާއި އެކު ކޯލިޝަން ހެއްދެވުމަށް މަޝްވަރާތައް ކުރައްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
