ރިޔާސީ އިންތިހާބުގެ ދެވަނަ ބުރުގެ ހިސާބު، ވެރިކަން ކުރާ އެމްޑީޕީ އާއި ކޯލިޝަން ހަދާފައި އެމްޑީއޭއިން ޖަހައިފިއެވެ. 

ރިޔާސީ އިންތިހާބުގެ ފުރަތަމަ ބުރު އިއްޔެ ނިމިގެން ގޮސްފައިވާއިރު, 15,000 އަށްވުރެ ގިނަ ވޯޓުގެ ބޮޑު ފަރަގަކުން، އެ އިންތިހާބު ކާމިޔާބު ކުރައްވާފައިވަނީ ޑރ. މުޢިއްޒު އެވެ. އެއީ ހަތް ޕަސެންޓުގެ ފަރަގެކެވެ.

މުއިއްޒަށް ލިބިވަޑައިގެންނެވީ 100,122 ވޯޓެވެ. އެއީ 46.07 ޕަސެންޓެވެ. ރައީސް ސާލިހަށް 84,997 ވޯޓު ލިބިވަޑައިގެންނެވިއެވެ. އެއީ 39.11 ޕަސެންޓް ވޯޓެވެ.

އެކަމާއި ގުޅިގެން އެމްޑީއޭއިން ކޮށްފައިވާ ޓުވީޓެއްގައި ވަނީ، މީގެ ކުރިން ދެވަނަ ބުރަކަށް ގޮސްފައިވާ އިންތިޚާބު ތަކުގައި ކަންކަން ވެފައި އޮތް ގޮތުގެ ހިސާބުތައް ހާމަކޮށްފައެވެ. 

އެގޮތުން، 2008 ވަނަ އަހަރުގެ ފުރަތަމަ ބުރުގައި ކުރީގެ ރައީސް މަޢުމޫން އަބްދުލްޤައްޔޫމް %45 ހޯއްދެވިއިރު ދެވަނަ ބުރު ކާމިޔާބުކުރެއްވީ ފުރަތަމަ ބުރުގައި %25 ހޯއްދެވި ކުރީގެ ރައީސް މުހައްމަދު ނަޝީދު ކަމަށް އެ ޓުވީޓުގައި ބުނެފައިވެއެވެ. 
އަދި 2013 ވަނަ އަހަރުގެ އިންތިޚާބުގެ ފުރަތަމަ ބުރުގައި ރައީސް ނަޝީދު %47 ހޯއްދަވާފައިވަނިކޮށް ފަހަތުން އަރާ ދެވަނަ ބުރު ކާމިޔާބުކުރެއްވީ ފުރަތަމަ ބުރުގައި %25 ހޯއްދެވި ކުރީގެ ރައީސް ޔާމީން އަބްދުލްގައްޔޫމް ކަމަށް ވެސް ބުނެފައިވެއެވެ. 
"ތާރީޙުގައި ކަންހިނގާފައި އޮތްގޮތަށް ބަލާއިރު އިންޝާ الله ދެވަނަ ބުރު އަޅުގަނޑުމެންނަށް ކާމިޔާބު ކުރެވޭނެ!" އެމްޑީއޭ ގެ ޓުވިޓުގައި ބުނެފައިވެއެވެ. 

ރިޔާސީ އިންތިހާބުގެ ފުރަތަމަ ބުރުގައި ރައީސް ޞާލިހަށް ބޮޑު ތަނުން ކާމިޔާބީ ލިބޭނެ ކަމަށް ވެރިކަންކުރާ އެމްޑީޕީ އާއި އެޕާޓީއާއެކު ކޯލިޝަން ހެދި ޕާޓީތަކުން ބުނެފައި ވަނިކޮށް ބޮޑު ފަރަގަކުން އެމަނިކުފާނު ދަށް ވުމުން އެފަރާތްތަކުން އަންނަނީ ކުރިއަށް އޮތް ތަނުގައި އިތުރު މަސައްކަތް ކުރާނެ ކަމަށް ބުނަމުންނެވެ..