ރާއްޖެއަށް އިންޑިއާއިން ކަނޑައަޅާފައި ހުންނަވާ ސަފީރު މުނޫ މަހާވަރު އުޅުއްވަނީ އިސްތިއުމާރުގެ ޒަމާނުގައި އިސްތިއުމާރީ ބާރުތަކުގެ ގަވަރުނަރުން އުޅުއްވި ގޮތަށްކަމަށް ކުރީގެ އުއްތަމަފަނޑިޔާރު ޑރ.އަޙްމަދު ޢަބްދުالله ދީދީ ވިދާޅުވެއްޖެއެވެ.

އިންޑިއާ ސަފީރު ސަރުކާރުގެ ބައެއް ވަޒީރުންނާ ހޮޓެލް ޖެންގައި ބައްދަލުކުރައްވާ ކަމަށް އޮންލައިން ނޫހެއްގައި ލިޔެފައިވާ ޚަބަރެއް ހިއްސާ ކުރައްވައި ޑރ. އަހުމަދު ކުރެއްވި ޓްވީޓެއްގައި ވިދާޅުވީ، އިންޑިއާ ސަފީރު އަދާކުރައްވަމުންދާ ދައުރަކީ ސަފީރަކު އަދާކުރަންޖެހޭ ޑިޕްލޮމެޓިކް ދައުރެއް ނޫން ކަމަށެވެ. 

ޑރ. އަހުމަދު ވިދާޅުވީ ސަފީރަކު އަދާކުރައްވަންޖެހޭ ލ ދައުރު އަދާކުރުމުގައި ތަބާވާންޖެހޭ ޕްރޮޓްކޯލްތަކެއް ޤާއިމުވެފައި ހުންނާނެ ކަމަށެވެ. އެ ގޮތުން އޭނާ ތަބާވާ ދައުލަތުން ފޮނުވާ މެސެޖްތަކާއި އަންގާ އެންގުންތައް ޚާރިޖީ ވުޒާރާ މެދުވެރިކޮށް ފޯރުކޮށްދެވޭ އިންތިޒާމު ހަމަޖެހިފައި ހުންނަންވާނެ ކަން ޑރ. އަހުމަދު ފާހަގަކުރެއްވިއެވެ.

އަދި އެއްވެސް ޕްރޮޓްކޯލް އަކަށް ތަބާވުމެއް ނެތި، އިންޑިއާ ސަފީރު މިހާރު އެ އުޅުއްވަމުންދާ ގޮތަށް ދައުލަތުގެ މުއައްސަސާތަކުގެ ތެރެއަށް ވަދެ ބޭނުން އިރަކު ރައީސުލްޖުމްހޫރިއްޔާ އާއި ދައުލަތުގެ އިސް ވެރިންނާއި ބައްދަލުކޮށް އުޅެނީ އިސްތިޢުމާރީ ދުވަސްވަރު އިސްތިޢުމާރީ ބާރު ތަމްސީލުކުރަން ޢައްޔަންކޮށްފައި ހުންނަ ގަވަރނަރުން ފަދަ މީހުން ކަމަށްވެސް ޑރ. އަހުމަދު ކުރެއްވި އެވެ.

"ސުއާލަކީ މިހާރު ދިވެހިރާއްޖެ މިވަނީ އިންޑިއާ އިން އިސްތިޢުމާރު ކޮށްފައިތޯ؟ ސަފީރަކީ އިސްތިޢުމާރީ ބާރު ތަމްސީލުކުރާ ގަވަރނަރު ތޯ؟" ޑރ. އަހުމަދު ސުވާލު ކުރެއްވިއެވެ.