ރިޔާސީ އިންތިހާބުގެ ފުރަތަމަ ބުރުގައި ވާދަކޮށް ނާކާމިޔާބީ ލިބޭ ފަރާތްތަކާއި ސިޔާސީ ޕާޓީ ތަކުން، އިންތިހާބުގެ ދެވަނަ ބުރުގައި އެހެން ބަޔަކާ ބައިވެރިވާކަށް ކޮންމެހެން ނުޖެހޭ ކަމަށް، ދަ ޑިމޮކްރެޓްސް އުފެއްދުމުގައި އެންމެ އިސްކޮށް ހަރަކާތްތެރިވި ޕާޓީގެ މަސްޢޫލުވެރިޔާ، ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވިދާޅުވެއްޖެއެވެ. 

ނިމިދިޔަ ރިޔާސީ އިންތިހާބުގައި އެންމެ ގިނަ ވޯޓު ހޯދާފައި ވަނީ ޕީޕީއެމް/ޕީއެންސީގެ ކެންޑިޑޭޓް ޑރ މުހައްމަދު މުއިއްޒު އެވެ. ދެވަނަ އަށް އެމްޑީޕީީ ގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގޮސްފައިވާއިރު ތިންވަނަ އަށް އެންމެ ގިނަ ވޯޓު ލިބުނީ ދަ ޑިމޮކްރެޓްސް ގެ އިލްޔާސް ލަބީބު އަށެވެ. އޭނާއަށް 15,000 އަށްވުރެ ގިނަ ވޯޓު ލިބިލެއްވިއެވެ. 

އެހެންކަމުން ޕީޕީއެމާއި އެމްޑީޕީ އަށްވެސް އެންމެ ގިނަ ވޯޓު ލިބޭނީ އެ ޕާޓީން ގުޅުމުން ކަމަށް ފެންނަން އޮތް އިރު، އެކަމާއި ގުޅޭ މަޝްވަރާތައް ކުރުމަށް ޑިމޮކްރެޓްސްގެ އިންޓަރިމް ކައުންސިލްއިން މިއަދު ވަނީ ކުރިއަށް ގެންގޮސްފަ އެވެ. 

Advertisement

އެ ބައްދަލުވުމުގައި ވާހަކަ ދެއްކެވި ޑިމޮކްރެޓްސް ގެ ހުރިހާ މެންބަރުންވެސް ވަނީ ދެވަނަ ބުރުގައި ރައީސް ޞާލިހު ގެ ފަޅިއަށް ނޭރުމަށް ތާއީދުކޮށް ވާހަކަދައްކަވާފައެވެ. އަދި ގިނަ މެންބަރުން ވަނީ އެއްވެސް ފަޅިއަކަށް ނާރާ ފަދަ މޭރުމަކުން ވާހަކަދައްކަވާފައެވެ. 

މިއަދުގެ މީޓިންގް ގައި މިކަމާއި މެދު ގޮތެއް ނިންމަން ކޮމިޓީ އެއްވެސް ވަނީ އެކުލަވާލާފައެވެ. 

އެ ކޮމިޓީގައިވެސް ހިމެނިވަޑައިގަންނަވާ ހަސަން ލަތީފް މިއަދުގެ ބައްދަލުވުމުގައި ވާހަކަ ދައްކަވަމުން ވިދާޅުވީ، ޑިމޮކްރެޓްސް އަށް ރިޔާސީ އިންތިހާބުގައި ލިބުނު ކާމިޔާބީ އަކީ ވަރަށް ގިނަ ފަރާތްތަކުގެ މަސައްކަތުން ލިބުނު ކާމިޔާބީ އެއް ކަމަށާ، ދެންވެސް އެ ޕާޓީއަށް ވާން އޮތް ގޮތެއް އޮތީ އެ ބޭފުޅުންގެ އަތް މަތީގައި ކަމަށެވެ. 

މިއާއެކު ހަސަން ވިދާޅުވީ އިންތިހާބާ މެދު ގޮތް ނިންމަން ކޮމިޓީއެއް އެކުލަވާލިޔަސް، އެ ކޮމިޓީގެ މަޝްވަރާ ކުރާ ގޮތަށް ކައުންސިލްގެ މެންބަރުން އެއްބަސް ނުވާހާ ހިނދަކު އެ ނިންމުން ނުނިންމާނެ ކަމަށެވެ. އަދި ސިޔާސީ ޕާޓީތަކާއި އެކު މަޝްވަރާތައް ކުރިއަށް ގެންދިޔަ ނަމަވެސް ޕާޓީގެ ކަންކަމުގައި ގޮތް ނިންމާނީ ކައުންސިލުން ކަމަށް ހަސަން ވިދާޅުވި އެވެ.